Ruhango: Abatishoboye bagiye guhabwa imbuto y’imyumbati ku buntu

  • AKIMANA JEAN DE DIEU
  • Ukuboza 1, 2023
  • Hashize amezi 3
Image

Nyuma yaho bamwe mu bahinzi babwiriye ubuyobozi ko badafite ubushobozi bwo kwibonera imbuto y’imyumbati kubera ubushobozi buke, bijejwe n’ubuyobozi bw’Intara ko bagiye guhabwa imbuto ku buntu bivuye ku rwego rw’Umudugudu babyakirana yombi.

Bamwe mu babuze imbuto batangarije Imvaho Nshya ko iki kibazo bari bafite bijejwe n’ubuyobozi bw’Intara ko kigiye gukemuka mu byumweru bibiri.

Mugabe Tharcisse avuga ko yahinze yizeye ko azabona imbuto kubera uburwayi bwahise bumufata bituma amafaranga yari afite ayivuzamo birangira atabonye uko yigurira imbuto yo gutera agashimira ko bijejwe kuyihabwa. 

Ati: “Njyewe mfite ubuhinge bumaze ibyumweru 3 mbuhinze ariko nahise ndwara n’abana tujya mu bitaro turangije guhinga amafaranga nari narateganyije ko naguramo imbuto y’imyumbati nyatanga nishyura ubuvuzi birangira ibijyanye n’imbuto mbyibagirwa, kuko ntaho nakura ayandi yo kwifashisha ariko kuba bagiye kuriduha tugahinga biradushimishije cyane”.

Mukarukundo Athanasie avuga ko imbuto y’imyumbati ihenze bityo abafite ubushobozi buke batabasha kuyigondera kuko unasanga ufite ubutaka bwaterwa n’imyumbati yagura ibihumbi 200 kandi wenda ufite 50 bigatuma uhinga hato.

Ati: “Iyo urebye igiciro duherwaho imyumbati usanga gihenze ku muntu bitewe n’ubutaka ahinga kuko nkanjye mbona habayeho nkunganire ku mbuto byadufasha kuko nkubu nshobora kuba mfite ibihumbi 50 gusa, kandi nsabwa ibihumbi 200 kugira ngo ntere ubuhinge bwanjye bwose ariko nibishoboka nzahinga hato cyane bitewe n’ubushobozi mfite ariko batwijeje ko bagiye kuduha imbuto”.

Mugengana Albert avuga ko hashize igihe babwiye ubuyobozi ko bakwiye gufashwa bagahabwa imbuto bitewe nuko bari mu bihe bugarijwe n’ubukene ndetse no kurya bibasaba kujya ku isoko.

Yagize ati: “Ubuzima tubayemo buradusaba byinshi harimo amafaranga y’ishuri ku bana n’ibikoresho byabo kandi tukongera gusabwa kurya tuvuye ku isoko ndetse ibi bibazo twanabigejeje ku buyobozi mu gihe cyose badusuraga badusaba guhinga”.

Umuyobozi w’Akarere ka Ruhango Habarurema Valens yemeje ko ikibazo cy’imbuto bamaze igihe bakivugutira umuti ku buryo banamaze iminsi bazenguruka mu bice byose by’akarere.

Akomeza avuga ko ubusanzwe ingeri imwe y’umwumbati itarenza amafaranga 12 ni ukuvuga ko umufuka w’ibilo ijana utarenza hagati ya 16000-18000 by’amafaranga y’u Rwanda, uyiguhaye akayikugereza ku buhinge bwawe ugatera kandi ku gihe bitewe n’igihe wayakiye kandi twizeye ko uwayihawe ku gihe kiza azabasha kubona umusaruro mwiza utubutse.

Guverineri w’Intara y’Amajyepfo, Kayitesi Alice mu ntangiriro z’iki cyumweru yasuye abahinzi b’icyitegererezo ndetse n’amakoperative ahinga imyumbati kandi anatemberezwa ubuso buhinzeho imyubati mu Murenge wa Ntongwe, abwira aba bahinzi ko ikibazo cy’imbuto y’imyumbati bafite kigiye kubonerwa umuti urambye mu byumweru bibiri, abatarayibona bakayihabwa ku buntu ariko igahabwa abafite ubushobozi buke kurusha abandi.

Yagize ati: “Ni byo muragaragaza ko mufite ikibazo cy’imbuto y’imyumbati ariko natwe twifuza ko abahinzi b’intangarugero ku giti cyabo cyangwa abari muri Koperative bakora ibishoboka byose kugira ngo haboneke umusaruro wakoreshwa n’uruganda rwa Kinazi abaturage bahawe n’Umukuru w’igihugu cyacu.

Ikindi bahawe uru ruganda kugira ngo bazaruhaze n’umusaruro w’ibyo beza utangiritse ngo bahombe kandi twizeye ko mu bufatanye bwacu n’inzego bireba haboneka igisubozo kirambye mu byumweru bibiri kugira ngo mwese mubashe guhinga”.

Ntabwo ubuyobozi bwicaye burimo gukora ibishoboka byose ngo imbuto igaruke kandi igere kuri bose bahinge neza kandi n’udafite  ubushobozi bwo kuyigura nawe afashwe ariko twongere twihaze ku mbuto y’imyumbati nk’uko igice cy’Amayaga cyahoze kihariye ku gihingwa cy’imyumbati kigatunga benshi bahatuye n’abandi bo mu bindi bice bitandukanye by’Igihugu ndetse ubugari busigaye bwoherezwa habze y’Igihigu.

Mu Karere ka Ruhango hose hamaze guterwa imyumbati ku buso bungana na hegitari ibihumbi 11 mu gihembwe cy’ihinga 2024A, mu gihe hari hateganyijwe ko hahingwa hegitari ibihumbi 16 mu gihembwe cy’ihinga 2024 A na B.

  • AKIMANA JEAN DE DIEU
  • Ukuboza 1, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE