Ruhango: Abarenga 5 bacuruzaga urumogi baracakiwe abaturage bariruhutsa

  • Imvaho Nshya
  • Ugushyingo 17, 2023
  • Hashize amezi 3
Image

Abatuye mu gace gaherutse kwandikwaho inkuru ko gacururizwaho urumogi ku manywa y’ihangu, baravuga ko bamwe mu barucuruzaga bamaze gutabwa muri yombi bituma ubu hari umutuzo nta ntambara y’abarucuruza iharangwa bagashimira inzego zatabaye n’itangazamakuru ryagaragaje iki kibazo.

Mu kiganiro na Imvaho Nshya bavuze ko bishimiye akazi kakozwe kuko bari babangamiye ituze ry’abatuye i Rumbasha.

Uwahawe izina rya “Paul” yabwiye Imvaho Nshya ko kuva  Imvaho Nshya isohoye inkuru abahirirwaga bacuruza urumogi batangiye gufatwa buke buke naho abandi barahunga kugira ngo na bo badafatwa.

Ati: “Hari umunyamakuru wahanyuze arangije akora inkuru ntabwo byamaze iminsi ibiri batangira kubafata ndumva icyo gihe harafashwe 2 bacuruzaga urumogi naho abandi batafashwe batangira guhunga twumva ko na bo bagiye babatoragura”.

Uwahawe izina rya “Soline” avuga ko mbere bataratangira gufata umwe kuri umwe wasangaga hirirwa abantu benshi b’inkorabusa banasinze ariko ubu bose baragiye ntiwamenya aho bagiye.

Yagize ati: “Urabona ndi umukecuru rwose ariko hano dutuye hahoraga inkomati y’abasore n’inkumi birirwa bacuruza bananywa amatabi arimo n’urumogi, naho abandi ugasanga barimo kunywa inzoga z’amoko yose ariko kuva batangira kubaroba bamwe barahunze hari na bo tutamenye aho bari tukavuga tuti buriya na bo barabafashe nawe reba uyu mutekano ugera nijoro rwose nta kibazo”.

Uwahawe izina rya “Malayika” avuga ko Polisi na Dasso baje bagafata bamwe bigatuma n’abandi bahirirwaga bose bagenda, barahunga none umutekano warabonetse kuko twamenye amakuru ko abagera kuri 7 bose bafashwe n’inzego z’umutekano.

Yagize ati: “Twarabyutse dukora uturimo twacu tubona haje abantu batangira gufata abari aho tugiye kubona tubona haje n’abapolosi ndetse na Dasso bafata benshi bagera kuri 7 barabajyana bamwe baragaruka abandi barabasigarana ariko natwe ubu tugomba kujya dutanga amakuru kuko bari barishe abana bacu babagurisha ibiyobyabwenge”.

Umunyamabanga Nshingwabikorwa w’Umurenge wa Ruhango, Kayitare Wellars yabwiye Imvaho Nshya ko amakuru y’itabwa muri yombi y’abakekwaho gucuruza urumogi i Rumbasha ari yo.

Yagize ati: “Abakekwaho gucuruza urumogi i Rumbasha, ayo makuru ni yo ndetse abagera kuri 6 bamaze gufatwa mu bihe bitandukanye harimo n’abafatanywe udupfunyika 43 tw’urumogi bahita  bashyikirizwa Urwego rw’ubugenzacyaha kugira ngo bakurikiranweho ibyaha byo kunywa no gucuruza ibiyobyabwenge birimo n’ibyo bafatanywe”.

Ingingo ya 263 mu itegeko riteganya ibyaha n’ibihano muri rusange, ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge aba akoze icyaha.

Iyo abihamijwe n’urukiko ahanishwa igifungo kitari munsi y’imyaka irindwi ariko kitarenze imyaka 10 n’ihazabu y’amafaranga y’u Rwanda atari munsi ya miliyoni 5 ariko atageze kuri miliyoni 10 ku byerekeye ibiyobyabwenge byoroheje n’igifungo cya burundu n’ihazabu y’amafaranga y’u Rwanda miliyoni 20 z’amafaranga y’u Rwanda ariko atarenze miliyoni 30 ku biyobyabwenge bihambaye.

Aha bita i Rumbasha haherereye mu Kagali ka Nyamagana mu Murenge wa Ruhango inyuma y’ahacururizwa inyama mu Ruhango hafi y’isoko rya Ruhango.

AKIMANA JEAN DE DIEU

  • Imvaho Nshya
  • Ugushyingo 17, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE