Ruhango: Abantu bafite ubumuga bashinze koperative ibarinda gusabiriza

  • AKIMANA JEAN DE DIEU
  • Mutarama 10, 2024
  • Hashize amezi 2
Image

Abantu bafite ubumuga bwo kutumva no kutavuga 25 banze guheranwa n’ibibazo bisanzemo, bahitamo guharanira iterambere bashinga Koperative yabarinze gusabiriza ikabafasha no kuba intangarugero ku murimo.

Koperative Zamuka Utere Imbere Ruhango (KOZURU), yashinzwe mu mwaka wa 2018, ifite abagore bakora ubudozi bw’imipira n’ubudozi bw’imipira n’abagabo bakora amasanduku mu mabati (malles).

Yatangiye ikora neza ariko ikomwa mu nkokora n’Icyorezo cya COVID-19. Mu 2021 bongeye kubyutsa umutwe ku buryo uyu munsi bamaze kugira miliyoni zirenga 5 z’amafaranga y’u Rwanda kuri konti.

Bavuga ko binjiza nibura amafaranga y’u Rwanda 700.000 buri kwezi,  bagahemba abakozi 20 ku byo bakoze,  bakabika kuri konti nibura amafaranga ari hagati y’ibihumbi 200 na 300.

Bavuga kandi ko uko umukozi yakoze atahana amafaranga kuri buri gikorwa yakoze aho ukora isanduku ntoya ayihemberwa amafaranga 700 naho ukora inini agahembwa amafaranga 1500.

Bamwe mu banyamuryango ba KOZURU bavuganye n’Imvaho Nshya hifashishijwe umusemuzi w’ururimi rw’amarenga Hakizimana Elie, bagaragaje ko bakora neza ku buryo hari abatahana amafaranga y’u Rwanda arenga 100,000 buri kwezi, ucyura make akabona nibura ibihumbi 45,000.

Bavuga ko ibyo byose babikesha ibanga ryo gukunda umurimo no gukura amaboko mu mufuka, ndetse ko bamaze gusobanukirwa ko umuntu ufite ubumuga ari uw’agaciro.

Umukobwa Innocentine w’imyaka 25, yavuze ko ataraza muri koperative yahoraga ategereje kubona umufasha mu bibazo, ariko ubu asigaye yifasha mu kazi akora k’ubudozi akanatanga akazi.

Yagize ati: “Njyewe ntaraza muri koperative nahoraga nigunze ntegereje uwamfasha gukemura ibibazo birimo kubona imyambaro, ndetse rimwe na rimwe no kurya bikankomerera. Ariko ubu ndakora ngatahana amafaranga ku byo nadoze hano, bya bibazo byose nsigaye mbyikemurira. Nanone kandi ibyo dukora binaha abandi akazi kuko turabitanga bakabigurisha bakagaruka gutwara ibindi.”

Umukobwa Innocentine w’imyaka 25 yemeza ko kujya muri koperative byamuhinduriye ubuzima

Akomeza avuga ko hakiri abandi bantu bafite ubumuga butandukanye batarabasha kugira ibyo bakora, akabasaba kurushaho kwegera abandi bagafatanya kwiteza imbere.

Hitimana Modeste w’imyaka 28 y’amavuko ni Visi Perezida wa KOZURU ifite abanyamuryango 25 barimo abagabo 14 n’abagore 11, yemeje ko bishyize hamwe bagamije kwiteza imbere aho gusabiriza.

Yagize ati: “Iyi Koperative tujya kuyishinga twashakaga guhurira hamwe tukavugana ibibazo byacu. Twanze kujya mu mihanda gusabiriza ahubwo tubona ko dukwiye gukoresha amaboko yacu tukiteza imbere bivuye mu bwenge bwacu nubwo tutumva cyangwa ngo tubashe kuvuga, byaradufashije ku buryo dutunze imiryango yacu.”

Akomeza avuga ko kuva bakwishyira hamwe bagiye bakora imishinga itandukanye kandi igahabwa ibihembo bitandukanye, harimo uwo bamuritse mu irushanwa bitabiriye ku rwego rw’Umudugudu mu Karere ka Ruhango, wabahesheje miliyoni imwe y’amafaranga y’u Rwanda.

Banitabiriye irushanwa rya Youth Connekt ryabereye i Musanze, batahana umwanya wa kabiri, banunguka abantu benshi bagaragaje ko bifuza gukorana na bo.

Hitimana yongeraho ko Akarere ka Ruhango kababa hafi, ndetse n’ibigo by’amashuri bikaba bibagana bakabidodera impuzankano.

Yagize Ati: “Dufite isoko ryagutse mu Turere twinshi harimo Nyaruguru, Nyamagabe, Huye, Ngororero, Muhanga n’utundi ndetse n’amasanduku tuyakora neza bakayakunda bakatugurira”.

Umuyobozi wungirije w’Akarere ka Ruhango ushinzwe Imibereho myiza y’Abaturage, Mukangenzi Alphonsine, avuga ko iyi Koperative yabereye urugero rwiza abantu bose bafite ubumuga.

Yagize ati: “Tugereranyije n’izindi Koperative zigizwe n’abantu bafite ubumuga usanga KOZURU ifite umwihariko kuko ibamo abantu bafite ubumuga bwo kutumva no kutavuga bakunda umurimo kandi bakumvikana, bakagirana inama, kuko usanga barakiriye imiterere yabo.”

Yongeyeho ko abanyamuryango ba KOZURU bahereye ku busa ariko ubu ngo ni koperative yiyubatse, ikaba ari n’imwe muri Koperative z’abantu bafite ubumuga zihabwa amafaranga kugira ngo zibashe gukomeza gukora neza.

Nyiransabimana Immaculee, Umuhuzabikorwa w’Inama y’Igihugu y’Abantu bafite ubumuga (NCPD) akaba ahagarariye abantu bafite ubumuga mu nama Njyanama y’Akarere ka Ruhango, avuga ko mu Karere kose hari koperative 15 z’abantu bafite ubumuga.

Yashimye uburyo KOZURU icunga neza umutungo wayo kandi ikanagira uruhare mu gushishikariza abantu bafite ubumuga kunoza umurimo.

Yongeraho ko buri mwaka nibura hafashwa koperative enye, buri imwe muri zo igahabwa miliyoni y’amafaranga y’u Rwanda, kugira ngo zizamure ibikorwa by’abanyamuryango.

Ibarura Rusange rya 5 ku mibereho n’Imiturire ryabaye mu mwaka wa 2022 ryagaragaje ko u Rwanda rutuwe n’abantu bafite ubumuga butandukanye barenga ibihumbi 391.

Iri barura kandi ryerekanye ko abantu bafite ubumuga ku rwego rw’Igihugu bagana na 3.4% uhereye ku myaka 5 kuzamura, by’umwihariko abafite ubumuga bwo kutavuga no kutumva bakaba barenga ibihumbi 100 mu Rwanda.

Abagore bakora ubudozi bavuga ko ubuyobozi bubaba hafi, ubu basigaye bafite isoko rinini
Abakora imbabura n’amasanduku y’ibyuma na bo bishimira ko ibyo bakora bikunzwe ku isoko
  • AKIMANA JEAN DE DIEU
  • Mutarama 10, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE