Ruhango: Abahinze imbuto y’urutoki ivuguruye kuri hegitari 453 barakirigita ifaranga

  • Imvaho Nshya
  • Ugushyingo 14, 2023
  • Hashize amezi 6
Image

Abahinzi b’Intangarugero b’urutoki bo mu Karere ka Ruhango bakomeje gukirigita ifaranga nyuma y’uko bafashijwe kubona insina nziza za FIA 17 na FIA 25 bakareka guhinga insina zitatangaga umusaruro.

Mu nsina baretse nyuma yo guhabwa imbuto igezweho harimo izahawe amazina Kajaganya n’Ingamike.

Harindintwari Boniface w’imyaka 61 ni umwe muri abo bahinzi uhinga urutoki kuri hegitari 40, utuye mu Mudugudu wa Nyamirambo, Akagari ka Muyunzwe, Umurenge wa Kinihira, uvuga ko insina za Fia 17 na Fia 25 zabahinduriye ubuzima bakaba baratangiye gukora ku ifaranga.

Yagize ati: “Mbere yuko duhabwa amahugurwa yo kuvugurura urutoki twahingaga urutoki tukeza umusaruro muke kuko wasangaga ibitoki bitanu byeze wabiterurira hamwe. Ariko baduhaye insina za FIA turazitera, zirarumbuka ku buryo tworoje abaturanyi bacu kugira ngo na bo babashe kwiteza imbere”.

Akomeza avuga ko umusaruro abona utandukanye n’uwo yabonaga kuko ubuhinzi bwamugejeje kuri byinshi byanatumye abasha  kwishyurira amafaranga y’ishuri abana 3 be biga mu yisumbuye no kwizigamira nibura 30,000 buri kwezi abikuye ku mineke agemura mu mashuri, mu dusanteri twa Gafunzo na Muyunzwe, Kirwa, Nyakogo no muri Santeri  ya Buhanda.

Muteteri Violette uhinga kuri hegitari ebyiri mu Mudugudu wa Dusenyi, Akagari ka Rukina mu Murenge wa Kinihira, avuga ko mbere yo guhabwa insina nziza yahoranaga amadeni yatse mu baturanyi.

Yagize ati: “Mbere yo guhabwa izi nsina nziza nkazihinga byampinduriye ubuzima kuko mbere nahoranaga amadeni nabaga natse abaturanyi banjye, ariko byabaye amateka kuko sinkiguza. Ndashimira Umukuru w’Igihugu kuko yita ku byiciro byose harimo natwe abahinzi, bakaduha imbuto nk’iyi iduha ibiroki by’imineke n’ibiduha umutobe wanavamo urwagwa”.

Avuga ko urwo rutoki rwamufashije kwiyubakira inzu nshya ifite ibyumba bitanu, akaba yaratinyutse no kuba rwiyemezamirimo ugomba kwiteza imbere.

Umuyobozi w’Akarere ka Ruhango, Habarurema Valens, avuga ko Leta ishishikariye gufasha abakora ubuhinzi bw’urutoki kubona imbuto nziza zo guhinga, kandi ko no mu ifumbire bakeneye hashyizwemo Nkunganire kugira ngo babone umusaruro mwiza ukwiye.

Yagize ati: “Icyo twakoze ni uko Leta ishishikajwe no gufasha abahinzi kubabonera imbuto bitewe n’ibyo bahinga, ariko twafashije aba bahinzi kubaha imbuto nziza ya FIA 15 itanga imineke kugira ngo badufashe no kurwanya imirire mibi, ariko twanabashakiye FIA 25 kugira ngo babone n’umutobe wanavamo urwagwa rwatunganywa n’inganda.”

Meya Habarurema avuga ko mu Mirenge ya Bweramana, Kinihira na Kabagari hari gahunda yo kuyiteza imbere  mu buhinzi n’ubworozi nk’imwe mu mishinga izakorerwa muri kiriya gice yitezweho guteza imbere abaturage.

Kugeza ubu Akarere ka Ruhango gafite ubuso bungana na hegitari 1,625 zihinzeho urutoki, ariko hamaze kuvugururwa hegitari 453.5 muri uyu mwaka wa 2023, zivuye kuri hegitari 135 zasazuwe mu mwaka wa 2022.

AKIMANA JEAN DE DIEU

  • Imvaho Nshya
  • Ugushyingo 14, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE