Ruhago: Uko Abanyarwanda bakina hanze bitwaye mu mpera z’icyumweru

  • SHEMA IVAN
  • Werurwe 11, 2024
  • Hashize ukwezi 1
Image

Myugariro w’ikipe y’Igihugu Amavubi na Shkupi na kapiteni Djihad Bizimana ukinira Kryvbas yo muri Ukraine bari mu bakinnyi b’Abanyarwanda bitwaye neza mu mpera z’icyumweru gishize.

Mu mpera ziki cyumweru dusoje mu bihugu bitandukanye, imikino ya shampiyona yarakinwe n’andi marushanwa arakomeza nubwo hari bimwe mu bihugu biri mu karuhuko.

Uko ni na ko bimeze ku bakinnyi b’Abanyarwanda bagiye gukina hanze y’u Rwanda bafashije amakipe yabo nubwo hari abo shampiyona zabo zitahiriye muri iyi minsi.

Ku Cyumweru tariki 10 werurwe 2024 mu gihugu cya Macedonia shampiyona yakomezaga hakinwa umunsi wa 23, myugariro Rwatubyaye Abdul ukinira Shkupi yafashije ikipe ye gutsinda Rabotnicki ibitego 3-2 mu mukino yatsizemo ibitego bibiri wenyine.

Igitego icya mbere cyinjizwa na Rwatubyaye Abdul ku munota wa 21, icya Kabiri gutsindwa na Erik Gronner ku munota wa 29 mbere y’uko igice cya mbere kirangira ikipe ya Rabotnicki na yo yatsinze igitego cya mbere cyo kwishyura.

Mu gice cya kabiri Rabotnicki yatsinze igitego cya kabiri ku munota 71, mbere y’uko umukino urangira Rwatubyaye Abdul yatsindiye ikipe ye igitego cya gatatu cyatanze intsinzi, kiba icya kabiri cye muri uyu mukino. 

Muri Ukraine, FC Kryvbas Kryvyi Rih ikinamo Kapiteni w’ikipe y’Igihugu Amavubi Djihad Bizimana, yatsinze Obolon igitego 1-0 mu mukino Djihad yakinnye iminota yose.

Iyi kipe irimo Kapiteni w’Amavubi yagumye ku mwanya kabiri, igira amanota 40 iganya na Shakatar Donetsk ya mbere inafite imikino ibiri y’ibirarane.

Mu gihugu cy’u Bubiligi, St. Liège ikinamo umusore Hakim Sahabo yatsinzwe GenK ibitego 1-0, uyu Munyarwanda ukina hagati yakinnye iminota 61 arasimburwa.

Ku rundi ruhande, Umunyezamu Maxime Wenssens ukinira Royale Union SG ntiyigeze agaragara mu kibuga mu mukino ikipe ye yanganyijemo na Gent igitego 1-1, igakomeza kuyobora Shampiyona y’u Bubiligi n’amanota 69.

Ku wa Gatandatu, muri Kenya hakinwe imikino ya shampiyona yari igeze ku munsi wa 24, AFC Leopards ikinamo Rutahizamu w’Amavubi Gitego Arthur yatsinzwe na Tusker igitego 1-0.

Ku rundi ruhande, Gormahia ikinamo Abanyrwanda bibiri Bayisenge Emery na Sibonama Patrick uheruka mu Mavubi azakina imikino ibiri ya gicuti na Bostwana na Madagascar muri uku kwezi, yatsinzwe na Bandari FC igitego 1-0. Sibomana Patrick ni we wakinnye wenyine  asimburwa ku munota wa 63.

Nubwo Gormahia yatsinzwe ni yo iyoboye urutonde rwa shampiyona n’amanota 50.

Muri Morocco, Myugariro w’Amavubi Imanishimwe Emmanuel, ukinira ikipe ya FAR Rabat iyoboye urutonde rwa shampiyona muri icyo gihugu, yafashije ikipe ye gutsinda Youssoufia Berrechid ibitego 2-0 akina iminota yose y’umukino. 

FAR Rabat ni yo iyoboye urutonde rwa shampiyona n’amanota 55.

Manzi Thierry ukinira Al Ahli Tripoli muri Libya, yakinnye iminota yose mu mukino ikipe ye yatsinzemo Al Bashayer ibitego 2-0. Iyi ntsinzi ya gatanu yikurikiranya yatumye baguma ku mwanya wa mbere wa Shampiyona ya Libya n’amanota 38.

Muri Afurika y’Epfo, TS Galaxy ikinamo Umunyezamu Ntwali Fiacre yanganyije na Richards Bay FC ubusa ku busa mu mukino w’umunsi 21 akina iminota yose y’umukino.

Byiringiro Lague na Mukunzi Yannick bafashije ikipe yabo ya Sandvikens IF kuzamuka mu cyiciro cya kabiri ntibaratangira Shampiyona.

Uku ni na ko bimeze ku Ikipe ya FC Jerv ikinamo myugariro Mutsinzi Ange yamanutse mu cyiciro cya kabiri muri Norvége.

  • SHEMA IVAN
  • Werurwe 11, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE