Rubavu: Yanyereye ku kiraro cyangijwe n’ibiza ahakura ubumuga n’ibihombo

  • NGABOYABAHIZI PROTAIS
  • Ukuboza 21, 2023
  • Hashize amezi 5
Image

Ingaruka z’ibiza byibasiye Akarere ka Rubavu mu mezi agera kuri arindwi ashize, ziracyagaragarira mu bagerwaho n’akaga ko kuba hari ibikorwa remezo byasenyutse bikaba bitarongera gusanwa.

Muri abo baturage harimo Bigirimana Prosper utuye mu Kagari ka Busoro, Umurenge wa Nyamyumba, Akarere ka Rubavu, wasigiwe ubumuga no kunyerera ku ibuye ryo hafi y’ahahoze ikiraro cya Busoeo muri uyu Murenge,agerageza gushaka uko yambuka umworera wasigayemo hagati, none ubu akaba agendera ku mbago.

Bigirimana avuga ko ubwo yagerageza kwambuka yaguye muri uwo muhora akavunika ukuguru, birangira ajyanywe mu Bitaro bya Gisenyi na byo bimwohereza mu Bitaro byitiriwe Umwami Faisal.

Kwisanga muri ibyo bibazo bimutunguye, byamusize mu bibazo bikomeye byaje byiyongera ku bumuga kuko yisanze mu ideni ry’amafaranga y’u Rwanda asaga 600,000.

Yagize ati: “Urabona ko ngendera ku mbago ni ingaruka zo kuba naraguye muri iki kiraro cya Busoro. Nabanjemo amaguru ndashengagurika njya kwivuriza mu bitaro bya Rubavu, barananirwa banyohereza muri Fayisali. Byansabye kubanza kugurisha umurima, nagize ubumuga kubera iki kiraro. Ubuyobozi niburebe yenda uko bwashyiraho ibiti mu gihe dutegereje ko hajyaho beto”.

Bigirimana akomeza avuga ko nta muntu ugeze mu za bukuru wakwirirwa avuga ngo arasura mugenzi we yambutse icyo kiraro kubera ko aho bigeze abakiri bato ni bo biyemeza kuhagenda, bakambuka ahahanamye bagaca mu muferegi wacukuwe n’amazi.

Yagize ati: “Tekereza nk’ubu urabona ko uriya musore yari yambukanye ibisheke, bimusabye kubikuraho akikorera igare kubera ko aracyari umusore; none nka njye ubu navuga ngo ngiye gushora imari mu bucuruzi ntari bubashe guhanama kuri uyu musozi werekeza mu kiraro se? Abasheshe akanguhe twahisemo kwigumira mu rugo, ikindi nakubwira ubu no kujya ku ivuriro bidusaba kuzenguruka, cyangwa tukigumira mu ngo zacu tukavuguta ibyatsi tukabona tworohewe.”

Abasore bava ku magare bakayikorera kugira ngo bambuke mu muhora waciwe n’amazi

Abaturage bo mu urenge wa Nyamyumba, bavuga ko babangamiwe n’iyangirika ry’icyo kiraro, bakemeza ko cyahagaritse ubuhahirane.

Banavuga ko impungenge z’impanuka zikiri zose ku bantu bahambuka, bakaba basaba inzego bireba kuba bacyubaka, cyane ko icyari kihasanzwe ibiza byagisenye.

Mukamwiza Drocella yavuze ko iki kiraro kibangamiye ubuzima bwabo bwose kuko batakibasha no guhahirana n’Akarere ka Rutsiro.

Yagize ati: “Twe turi abahinzi hano hera ibisheke, ibitunguru, ibirayi mbese imyaka myinshi. Ariko ubu nta kundi byagera hakurya muri Rutsiro, abanyeshuri bo ni ukugenza bisekagura ku bitare kugira ngo barebe uko bakwambuka kino kiraro.

Mu bihe by’imvura bwo abana biganyira kujya ku ishuri, nta muntu ukigutumira nko muri ibi bihe by’imvura ngo urambuka ujye kumutahira ubukwe, aho kugira ngo uhatakarize ubuzima uhitamo kwigumira mu rugo”.

Umuyobozi w’Akarere ka Rubavu Mulindwa Prosper, na we uvuga ko iki kibazo barimo kukiganiraho n’inzego bireba.

Yagize ati: “Ikibazo cya kiriya kiraro kimwe n’ibindi byangiritse muri Rubavu; twabigaragarije RTDA kugira ngo harebwe uburyo byasanwa, biriya ni ibiraro byasenywe n’ibiza, ubu rero turimo kubiganiraho ngo turebe uburyo kiriya kiraro cyakongera kuba nyabagendwa”.

Akarere ka Rubavu ni kamwe mu twibasiwe n’ibiza muri Gicurasi 2023, aho abaturage bagera ku 135 bahitanywe n’ibiza, inzu z’abaturage zirasenyuka kimwe n’ibikorwa remezo bitandukanye birahatikirira

  • NGABOYABAHIZI PROTAIS
  • Ukuboza 21, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE