Rubavu: Umuhanda Busasamana–Rubavu uteza igihombo ku bahinzi

  • NGABOYABAHIZI PROTAIS
  • Ukuboza 19, 2023
  • Hashize amezi 3
Image

Abaturage bo mu Murenge wa Cyanzarwe mu Karere ka Rubavu, bavuga ko babangamiwe n’iyangirika ry’umuhanda Busasamana-Rubavu wangijwe n’ibiza, none bikaba birimo kubateza igihombo ku musaruro wabo.

Uyu muhanda uhuza igice gikorerwamo ubuhinzi n’ubworozi, ukaba unyuzwamo umusaruro ugezwa mu Mujyi wa Rubavu, abahinzi bavuga ko muri ibi bihe nta modoka zipfa kujyayo kubera ko umuhanda wuzuye ibinogo.

Uwitwa Mukamwezi avuga ko kuba buwo muhanda warangijwe n’ibiza bibahangayikishije, kuko ahantu henshoi hatakiri nyabagendwa.

Yagize ati: “Uyu muhanda ni kimwe mu bituma dukomeza umwuga wacu w’ubuhinzi kuko imodoka zituruka Musanze zinjiriye ku Kabari ni wo zikoresha kimwe n’iziva Rubavu, ubu rero nk’uko nawe ubibona ibiza byarawangije ni ubwo bari bagerageje gushyiramo igitaka, rigole zarashwanyutse, ibi rero bituma nta modoka zipfa kuza ino kubera ibi binogo.”

Uyu muturage akomeza avuga ko byaba byiza uyu muhanda ugiyemo kaburimbo kuko ngo byatuma biteza imbere.

Yagize ati: “Ndi umuhinzi w’ibitunguru n’ibirayi, kubera rero ko hari bamwe mu bashoferi batinya kuzana imodoka zabo ino urumva iyo twejeje umusaruro udupfira ubusa tugahitamo kuwuha abamamyi kuri make. Twe twifuza ko uyu muhanda washyirwamo kaburimbo kandi byazamura iterambere ryacu cyane, twakubaka n’inzu nziza zibyazwa umusaruro kuko kaburimbo na yo ni iterambere.”

Nsengimana Eulade ni umushoferi, avuga ko akunda gukoresha umuhanda Busasamana–Rubavu ariko ngo asanga imodoka ye ihangirikira cyane.

Yagize ati: “Ibi binogo byo muri uyu muhanda bitwicira imodoka ni yo mpamvu nanjye kuza hano mba nsa n’uwihebye kandi urumva imodoka ntiyaza hano ku giciro gito. Ibi rero bihombya umuturage ku musaruro we, twifuza ko uyu muhanda wakorwa kuko iki gice ni cyo kigega cy’Akarere ka Rubavu mu buhinzi.”

Ntabwo ari abahinzi bafite ikibazo kuri uyu muhanda Busasamana-Rubavu kuko n’abagenzi bakoresha moto bataka ibiciro bihanitse.

Uwayo Arsene yagize ati: “Kuba uyu muhanda udakoze bituma ducibwa amafaranga menshi ku ngendo cyane moto. Nk’ubu kugira ngo uve mu Mujyi wa Rubavu baduca amafaranga ibihumbi bibiri na magana atanu. Iyo ukomeje ujya ku ishuri rya Busasamana ni 3500, kubera ko hatagendeka; ubuyobozi bukwiye kudufasha uyu muhanda ukitabwaho yenda ingengo y’imari itaha ugakorwa.”

Umuyobozi w’Akarere ka Rubavu Mulindwa Prosper, na we ashimangira ko uriya muhanda uteza igihombo abahinzi cyane ko ngo n’imbaraga Leta yari yashyizeho ushyiramo igitaka n’imiyoboro y’amazi byangijwe n’ibiza.

Yavuze ko uriya muhanda uri ku rwego rw’Igihugu bityo kuri bo go babivuganaho n’Inzego bireba harimo Ikigo cy’Igihugu gishinzwe Iterambere rya Taransiporo (RTDA), bikaba biteganijwe ko uzashyirwamo kaburimbo.

Yagize ati: “Uriya muhanda uri mu yo duteganya kuzashyiramo kaburimbo; ni umuhanda uri ku rwego rw’Igihugu, hari amapiganwa yakozwe ariko nta rwiyemezamirimo uratsindira isoko. Twebwe rero icyo dukora ni ugukomeza gukora ubuvugizi birazwi ko kariya gace karimo amazi menshi ubwo hazakomeza no kwiga uburyo ariya mazi yakumirwa kugira ngo adakomeza kuza mu Mujyi wa Rubavu, iki kibazo cy’uyu muhanda wo turimo kuwutekerezaho cyane.”

Umuhanda Busasamana-Rubavu uramutse ushyizwemo kaburimbo, umusaruro w’abahinzi wajya ugurwa ku giciro cyiza cyane ko muri kariya gace keramo ibitunguru byinshi  n’ibirayi.

Meya Mulindwa Proseper yizeza abaturage ko ikibazo cy’uyu muhanda bagifite mu migambi yo kuwubaka.

  • NGABOYABAHIZI PROTAIS
  • Ukuboza 19, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE