Rubavu: Sosiyete yavuye mu gihombo cya miliyoni 32 Frw inunguka miliyoni 160 Frw

  • NTAWITONDA JEAN CLAUDE
  • Kanama 16, 2023
  • Hashize amezi 9
Image

Nyuma y’umwuka mubi waranzwe muri Sosiyete y’abahoze ari abakozi b’Uruganda rwa BRALIRWA bavuye mu kazi, SOSERGI Ltd (Société des Services de Gisenyi), abanyamuryango barishimira ko Komite batoreye gusubiza ibintu ku murongo yabakuye mu bihombo biremereye ndetse igatuma bunguka amafaranga y’u Rwanda arenga miliyoni 160.

Komite imaze umwaka iyobora iyo Sosiyete ikorera mu Karere ka Rubavu, yashyizweho tariki ya 10 Nyakanga 2022 nyuma y’aho abo basimbuye bagenzuwe n’abanyamuryango ndetse n’Urwego rushinzwe Iterambere mu Rwanda (RDB), bakabakuraho bashinjwa amakosa aremereye.

Bimwe mu byo bashinjwaga harimo imiyoborere mibi, amacakubiri no kwimakaza icyenewabo kimwe n’andi makosa ajyanye n’imicungire idahwitse y’umutungo wa Sosiyete byatumaga ihora mu bihombo ndetse ikaba yari igeze aharindimuka.

Karekezi Salomon wari uyoboye inzibacyuho akaba yongeye kugirirwa icyizere, yavuze ko Sosiyete yari ihagaze nabi ubwo bahabwaga kuyiyobora, aho yari ifite igihombo cya miliyoni 32 z’amafaranga y’u Rwanda, ariko uyu munsi ahamya ko bagikuyemo bunguka agera kuri miliyoni 162.

Yagize ati: “Twarwanyije ahasohokeraga amafaranga bitari ngombwa, twavuguruye imikorere cyane ko twagiye mu nshingano dufite inshingano zo kugaruza ikigo cyari cyarahombye, twibanze kuvana kompanyi ku rwego rwo gutezwa cyamunara. Twabigezeho ari na byo twishimira byatumye abanyamuryango batugirira icyizere cyo kubayobora mu myaka itatu iri imbere kubera aho tubagejeje.”

Karekezi yemeza ko bimwe mu byatumaga SOSERGI Ltd ihomba, harimo kuba Komite yarumvikanaga ku kuzamura ibiciro aho indorerwamo z’amaso (Lunette) zigura 8,000 Frw bazigurishaga 16,000 Frw.

Mu bindi byatumye bahomba ngo ni uko hacuruzwaga Dreche cyangwa ibisigazwa by’ibikatsi biva mu ruganda bikagaburirwa amatungo, ariko bamwe bakwishyura akajya mu mifuka ya bamwe ntajye kuri konti ya Sosiyete, ndetse harimo icyenewabo n’itonesha byatumaga hakora bamwe mu gihe hari n’imyanya yakoreshaga ba baringa.

Niyonsaba Mabete Dieudonne Perezida w’Urugaga rw’Abikorera (PSF) muri Rubavu, ashima ibyakozwe na Komite y’Inzibacyuho kuko ngo yakoze akazi kenshi gatanga icyizere mu bikorera ndetse bigaha imbaraga abifuza kwishyira hamwe.

Yagize ati: “Kwishira hamwe ni byiza, nka hano hari abanyamigabane barenga 189 bafite ibikorwa. Ni bo ba mbere bashyize ibikorwa by’iterambere bigezweho muri Rubavu; kuba imicungire y’umutungo wabo iri kugenda neza biratuma abashaka kwishyira hamwe bagira ishyaka. Turabasaba gukomeza guteza imbere abanyamuryango babo baba icyitegererezo ku bandi.”

Umwe mu banyamuryango ba SOSERGI Ltd, yagize ati: “Twakomeje kugirira icyizere Komite yari mu nzibacyuho, kuko ni ubwa mbere twakora Inteko Rusange irimo umutuzo, tugahabwa raporo isukuye. Ikindi ababanje batwerekaga ibihombo gusa kugera n’aho abanyamuryango bose bumvaga bakwiye kugurisha imigabane yabo ariko twese twafashe umwanzuro wo gukomeza guharanira iterambere.”

SOSERGI Ltd yabanje kwitwa Koperative (COSERGI) ariko kubera kwinjira mu bucuruzi, ihindura umurongo. Igizwe n’abanyamuryango 189 babarizwamo abakozi ba Bralirwa n’abagiye bahakorera, gusa kuri ubu abanyamigabane bagenda biyongeramo barimo abacuruzi batandukanye.

Iyi Sosiyete ifite ibikorwa bitandukanye birimo na Banki yitwa FISA CO LTD.

  • NTAWITONDA JEAN CLAUDE
  • Kanama 16, 2023
  • Hashize amezi 9
TANGA IGITEKEREZO
Danford says:
Kanama 20, 2023 at 5:44 pm

Hari andi makuru batabahaye neza kuko SOSERGI niyo Societe ifite umubare munini w’abakozi bacyenerwa muri Main d’oeuvres umushahara w’sbakozi nyacyo umaze ni intica n’intikize kandi habamo icyenewabo mu gutangamo akazi ni ikimenyane cyane njyewe mumbaze nakozemo nk’umunyakabyizi !

Andika igitekerezo

AMATEGEKO AGENGA IYANDIKA RY'IGITEKEREZO CYAWE