Rubavu: Hari ababyeyi bagihishira abatera inda abana babo ngo batiteranya

  • NGABOYABAHIZI PROTAIS
  • Ukuboza 20, 2023
  • Hashize amezi 2
Image

Bamwe mu babyeyi bo mu Murenge wa  Cyanzarwe, Akarere ka Rubavu, bavuga ko bafite abana batewe inda n’abagabo ariko ngo kubashyikiriza ubutabera ntibiborohera kuko  abenshi ari abaturanyi ndetse n’inshuti bagahitamo kubyihorera.

Hari abaturage bavuga ko batakwiteranya n’abaturanyi babo bajya kubarega; ahubwo bagahitamo kumvikana bikarangirira mu miryango.

Mpalirwa Robert wo mu Kagari ka Ryabizige, avuga ko umwana we bamuteye inda ariko ngo kubibwira inzego zibishinzwe yasanze atari ngombwa ahitamo ubwiyunge.

Yagize ati: “Bantereye umwana inda ku myaka 18 ubu ni bwo amaze kuzuza 22. Sinigeze njya kurega kuko burya iyo byarangiye umukobwa yagize inda nta mpamvu yo gukomeza gukurururana ufungisha umwana w’umuvandimwe, ahubwo uhitamo ko yazajya afasha umwana akamwiyandikaho, nta muntu wajya kwiteranya ngo arajya mu nkiko.”

Mukamwezi Josephine we asanga gukurikirana uwateye umwana w’umukobwa inda bikomeye kandi bishobora gukurura inzangano z’akarande.

Yagize ati: “Kuri ubu hari bamwe mu bana b’abakobwa na  bo bananiranye. Aragenda agakundana n’umugabo mukuru umurusha nk’imyaka 50 amushukisha amafaranga kugeza ubwo amutera inda, nyuma y’aho umubyeyi yaba adashoboye no kubona itike imujyana mu manza agahitamo kumvikana n’uwateye inda  kuko twe tubona ari hahandi.

Harimo abagabo babihakana bikagusaba kujya muri RIB nayo ngo bazasuzuma ADN, ugasanga ari inzira ndende uhitamo kumvikana n’uwateye inda umwana gasubira mu ishuri ntawajya kwiteranya”.

Umuyobozi w’Akarere ka Rubavu Mulindwa Prosper,  yamaganira kure ba ntiteranya, ahubwo akabamenyesha ko guhishira uwateye umwana inda ari icyaha gihanwa n’amategeko,

Yagize ati: “Tujya twumva ko hari bamwe mu baturage bunga abavandimwe aho umuhungu aba yateye umwana inda, ibi birahanirwa cyane kandi uzabifatirwamo azahanwa. Ntabwo gufata umwana ku ngufu, gutera umwana inda binyura mu bwiyunge kuki iki cyaha ni inshinjabyaha. Ndasaba abaturage rwose kwirinda gukomeza gukora iri kosa kandi twarabihagurukiye”.

Imibare igaragaza ko mu mwaka wa 2022, mu Karere ka Rubavu hagaragaraye abana bahohotewe 378, naho abatewe inda ni 172, hakaba harafashwe bagejejwe mu nkiko bagera kuri 70.

Itegeko Nº68/2018 ryo kuwa 30/08/2018 riteganya ibyaha n’ibihano muri rusange, mu ngingo yaryo ya 123, rivuga ko umuntu uhamwe n’icyaha cyo gufata umwana ku ngufu ahanishwa igifungo kitari munsi y’imyaka makumyabiri (20) ariko nanone itarenga makumyabiri n’itanu.

Iyo umwana wasambanyijwe ari munsi y’imyaka 14, uwabikoze ahanishwa igihano cya burundu.

Ababyeyi bo mu Murenge wa Cyanzarwe ngo bahishira abasambanya abana babo ngo badakurura inzigo mu baturanyi
  • NGABOYABAHIZI PROTAIS
  • Ukuboza 20, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE