Rubavu : Harabera Imurikagurisha ryinjiza abantu mu minsi mikuru 

  • NTAWITONDA JEAN CLAUDE
  • Ukuboza 19, 2023
  • Hashize amezi 5
Image

Mu Karere ka Rubavu Hatangijwe imurikabikorwa n’imurikagurisha EXPO 2023 ryinjiza abaturage b’Intara y’Iburengerazuba n’abayigera mu minsi mikuru bishimye. 

Ubwo hatangirwaga EXPO 2023 yo ku rwego rw’Intara y’Iburengerazuba iri kubera Ku nkengero z’ikiyaga cya Kivu ahazwi nka RUbavu Public Beach, Uhagarariye abikorera mu Ntara Nkurunziza Ernest, yashimye Abagize uruhare ngo ibeho nyuma y’imyaka igera kuri ibiri yikurikiranye itabaho. 

Nkurunziza Ernest yavuze ko bamaze igihe bategura ryo murikagurusha n’imurikabikorwa ryari rimaze imyaka ibiri ritaba, bafatanyije n’Ihuriro ry’Abafatanyabikorwa mu Iterambere ry’Akarere ka Rubavu, yizeza ko rizagenda neza cyane ko bizaba muri iyi minsi yose mikuru.

Yagize ati: “Twateguye iki gikorwa tugamije gufasha abatuye Intara, igihugu n’abanyamahanga kurushaho kuryoherwa n’iminsi mikuru ya Noheli n’Ubunani. Imyiteguro yagenze neza kandi twizeye ko bazarushaho kwishima kuko ibyiciro byose twabitekerejeho twarabazirikanye buri wese arisanga.”

Uyu muyobozi ashima ubuyobozi bwiza bubaha amahirwe yo gutekereza bagashira mu bikorwa batekanye kuko asanga ari amahirwe bahabwa n’igihugu.

Guverineri w’Intara y’Iburengerazuba Dushimimana Lambert, yashimye abateguye iri murikagurisha n’imurikabikorwa abasaba kuribyaza umusaruro no gukoresha amahirwe bahabwa n’igihugu cyiza gishyira umutekano w’abacyo imbere.

Yagize ati: “Uyu ni umwanya mwiza wo kumenyekanisha ibyo mukora kuruta gucuruza. Ugira amahirwe ni ubona aho amenyekanishiriza ibye ubundi abakiliya bakamugana. Dufite umutekano, dufite uburyo bwo kubona amafaranga n’ibindi byinshi, ni amahirwe dukesha ubuyobozi bwiza murasabwa kubyaza umusaruro ibyo byose.”

Yakomeje agira ati: “Iyi Expo izaniye ibyishimo mu baturage cyane muri ibi bihe by’iminsi mikuru abaturage babona aho basohokera, aho bahahira mubibyaze umusaruro.”

Bamwe mu bamurika nubwo bashima ariko banenga ihanika ry’ibiciro ku mwanya wo gukoreramo bagasaba ko ubutaha byazitabwaho.

Munyaneza Yussuf umwe mu bamurika yagize ati: “Umwanya urahenze akabare bagaciye miliyoni yose ni menshi. Icyumba gito bagishyira ku mafaranga ibihumbi 150 ni menshi cyane, byaciye intege abantu benshi bituma batitabira. Turasaba ko byazigwaho ubutaha bakagabanya kuyagaruza ntabwo byoroshye.”

Biteganyijwe ko iri murikabikorwa ryatangiye kuwa 14 Ukuboza 2023 rizasozwa kuwa 29 Ukuboza 2023, ryitabiriwe n’Abanyarwanda ndetse n’abanyamahanga bagera ku 10 bazanye ibumurikwa binyuranye nk’umwihariko w’iwabo.

Usibye kumurika hateganyijwe aho abana bidagaduririra ndetse abitabiriye basusurutswa n’abahanzi buri munsi.

  • NTAWITONDA JEAN CLAUDE
  • Ukuboza 19, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE