Rubavu: Batunguwe no kumva ko n’abagabo bacuruzwa

  • NGABOYABAHIZI PROTAIS
  • Ukuboza 15, 2023
  • Hashize amezi 5
Image

Bamwe mu bagabo bo mu Murenge wa Cyanzarwe, Akarere ka Rubavu bavuga ko batumvaga ukuntu umuntu w’umugabo yacuruzwa, bakaba bahumuwe amaso n’ubutumwa abakozi b’Urwego rw’Igihugu rw’Ubugenzacyaha (RIB) rwabagejejeho.

Abo baturage bavuga ko batunguwe no kumva ko hari abagabo bacuruzwa mu gihe bo bumvaga wenda abacuruzwa ari abana bato, abagore n’abakobwa bashobora kujyana mu busambanyi.

Ugirirabino Evariste  wo mu Kagari ka Ryabizige, yagize ati: “Ntabwo njye nakeka ko umuntu w’umugabo yacuruzwa, menyereye ko hacuruzwa abakobwa kuko na  bo hano baricuruza bakabishyura nyuma yo kubasambanya, ariko umuntu w’umugabo kuba yagurishwa ntabwo nari mbizi.”

 Hamugisha Jean de Dieu we avuga ko icuruzwa ry’abagabo ryamutunguye cyane ariko ngo asanga nanone hari bamwe mu bagabo bicuruza ngo ni ubwo bitari byagera ku rwego rwo, uba umuntu yahatakariza ubuzima mu Rwanda.

Yagize ati: “Icuruzwa ry’abagabo ntitwari tuzi ibyo ari byo, ariko numvise ko hari n’ubwo bagukura hano ukajya kwibona ukisanga nko mu mitwe y’iterabwoba. Rero ntibikwiye ko n’abagabo dukomeza kiwigira ibiharamagara ngo ntitwagurishwa, ngo nta soko. Nyamara batubwiye ko hari ibihugu bitagira abagabo cyangwa se abasore benshi, ikindi ni uko icyo namaze kubona ni uko hari bamwe mu bagabo bicuruza ubwabo nk’abazwi ku izina ry’abapfubuzi, abo na bo bagenda bazenguruka mu bagore bafite kashi njye mbibona nko kwicuruza”.

Umukozi wa RIB mu Ishami Rishinzwe Gukumira Ibyaha, Ntirenganya Jean Claude, asaba abaturage gukumira  icuruzwa ry’abantu by’umwihariko ku Turere twegereye imipaka, maze akangurira abagabo kutirara ngo bo ntibashobora gucuruzwa.

Yagize ati: “Hari bamwe mu bagabo bazi ko badashobora kugurishwa, bibaho cyane rwose. Umugabo bashobora kumugura akajya gukoreshwa imirimo y’agahato akora ubutaruhuka, turabafite Leta ijya igarura binyuze muri za Ambasade z’u Rwanda mu mahanga, ibihugu tutagiramo Ambasade na we urabyumva bashobora kugwayo.

Yavuze kandi ko abasore bashobora kujyanwa mu bihugu bifite abasaza benshi bakajya gukoreshwa imirimo inyuranye, cyangwa bakabakuramo ibice by’umubiri bakabigurisha.

Yakomeje agira ati “Kandi uzarebe nta muntu batwara adafite ubuzima buzira umuze, ni yo mpamvu buri wese  gukumira icuruzwa ry’abantu akwiye kurigira irye”.

Yasabye abaturage kuba maso no kugira amakenga batangira amakuru ku gihe kugira ngo bakumire uwo ari wese wacuruza abantu.

Yagize ati: “Ababajyana babizeza ubukire, ndetse n’ibindi bishuko yewe hari n’abajya gucuruzwa batabizi ariko mugomba kuba maso uwo waketseho iki cyaha ugomba kumenyesha inzego z’ubutekano zikwegereye ndetse yaba iz’ibanze, RIB ndetse n’abandi bayobozi.”

Ubukangurambaga ku bijyanye no gukumira icuruzwa ry’abantu bwakorewe  mu Turere twa Nyagatare na Nyaruguru,  Rubavu, bukazasorezwa mu Turere twa Kirehe na Gisagara, by’umwihariko bukaba bwibanda mu Mirenge yegereye imipaka.

  • NGABOYABAHIZI PROTAIS
  • Ukuboza 15, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE