Rubavu: Abitumaga ku gasozi nk’inka basanze kwari nko kubana n’igisasu

  • NGABOYABAHIZI PROTAIS
  • Mutarama 24, 2024
  • Hashize amezi 4
Image

Bamwe mu basigajwe inyuma n’amateka bo mu Murenge wa Mudende, Akarere ka Rubavu, bavuga ko bahinduye imyumvire bakemera gutunga ubwiherero maze bikabahinrurira ubuzima kuko baciye ukubiri n’inzoka zo mu nda bahoraga barwaye.

Bamwe mu bavuganye n’Imvaho Nshya, bagaragaje ko baje gusobanukirwa ko kubaho umuntu adafite ubwiherero ari nko kubana n’igisasu kuko igihe babaga muri ubwo buzima bari barazonzwe n’inzoka zo mu nda n’izindi ndwara zituruka ku mwanda.

Kalimingenge Francois, umwe mu basigajwe inyuma n’amateka wo mu Mudugudu wa Binyove, mu Kagari ka Bihogwe, avuga ko bamaze imyaka myinshi bituma mu bihuru bakumva  nta kibazo bitwaye ubuzima bwabo.

Yagize ati: “Twamaze imyaka myinshi mu mashyamba tutazi icyo gucukura ubwiherero bimaze. Twitumaga ku gasozi nk’inka kuko nta n’ubwo twageraga mu bandi bantu, ariko nyuma y’aho Kagame adutuje kumwe n’abandi anyarwanda, byatumye tumenyeraho ko gusenga ari ngombwa mu rusengero twamenye Imana ariko batubwira ko dukwiye no kugira ubuzima bwiza tugira isuku ni n’aho twatorejwe kugira ubwiherero ndetse baranabutwubakira, ntabwo nari nzi ko kuba nta bwiherero ari nko, ubana n’igisasu munzu, umunsi umwe kikazaguturikana.”

Nyiramayabo Belancile we avuga ko ubwiherero ari isoko y’ubuzima. Yagize ati: “Mbere rwose kubwira uwasigajwe inyuma n’amateka ko ubwiherero kuri we ari ngombwa byari nko kwandika mu mazi. Njyewe ubwiherero bucukuye, butinze neza kandi bwubakiye, mbubonye kuri Leta iyobowe na Perezida Kagame.

Yavuze ko Imiyoborere myiza irangajwe imbere na Perezida Kagame yabafashije guhindura imyumvire, maze batangira kugira isuku mu mibereho yabo bahereye aho baba bakageza n’aho biherera.

Nyiramayabo akomeza avuga ko baje gusanga inzoka bahoraga bataka zaraterwaga n’umwanda wazanwaga n’amasazi yavaga mu mwanda wo mu bihuru.

Yagize ati: “Uzi kugira ngo usange ukikijwe n’umwanda hirya no hino kuko wituma mu gihuru kiri hafi y’iwawe, umuturanyi na we bikaba uko? Mbese ugasanga mwituriye mu mwanfda w’ibyo muba mwitumye nawe urabyumva umunuko uba ari mwinshi. Abana bacu bagahora inda zimeze nk’umupira wa Ruhago zihagirije, ariko aho tuboneye ubwiherero bwiza ndetse tukaba dukaraba intoki uko tuvuye kwituma byatumye indwara zigabanyuka.”

Aba baturage banashimira uruhare rw’amadini yabafashije mu rugendo rwo guhindura imyumvire.

Rev. Pst. Nsanzimana Etienne, Umushumba w’Itorero ry’Abavandimwe rimwe mu bafasha abaturage guhindura imyumvire ku bijyanye n’isuku mu Karere ka Rubavu, avuga ko bakimara kubona ko bariya basigajwe inyuma n’amateka imyumvire ku bijyanye n’isuku ikiri hasi, bahisemo kubafasha ndetse banabereka ibibi by’umwanda.

Yagize ati: “Mu minsi yashize hano muri Munyove isuku n’isukura twasanze iri hasi cyane   ndetse n’indwara zibugarije twatangiye kubasobanurira uburyo bagomba kwigirira isuku kugira ngo barwanye indwara zikururwa n’umwanda aho bamaraga igihe badakaraba, batamesa mbese byari ibintu bikomeye cyane, ariko ubu bakaba barabisobanukiwe kuko basigaye baza gusenga bakarabye bityo indwara nk’inzoka ndetse n’izindi zikururwa n’umwanda bakaba batagihura nazo.”

Umukozi w’Ikigo cy’Igihugu cy’Ubuzima (RBC), na we ashima uruhare rw’amadini mu guteza imbere isuku n’isukura, ishami rishinzwe guhuza ibikorwa bya NTD-WASH, Nathan Hitiyaremye na we asanga amadini ari bamwe mu bafatanyabikorwa ndetse bituma n’imyumvire izamuka mu buryo bwihuse.

Yagize ati: “ Roho nzima itura mu mubiri muzima, ni ibintu bizwi, abavuga ijambo ry’Imana ni bamwe mu bafasha umuturage kumva gahinda nziza za Leta ndetse n’imibereho myiza… Bityo ntabwo wakwigisha abafite umwanda ku mubiri batakarabye ngo wumve ko ibyo ubigisha bazabyumva, tuzakomeza rero natwe gufatanya na  bo mu rugamba rwo gukumira indwara ziterwa n’umwanda.”

Ubushakashatsi bugaragaza ko indwara ku migero cya 90% ziba zakomotse ku mwanda, bityo abaturage bakaba basabwa kugira ubwiherero no gukaraba intoki, igihe cyose bavuye mu bwiherero ndetse n’igihe bagiye kurya.

  • NGABOYABAHIZI PROTAIS
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE