Rubavu: Abagore n’abakobwa babyariye iwabo bihuriye mu mukino wa gishuti

  • Imvaho Nshya
  • Nzeri 22, 2023
  • Hashize amezi 8
Image

Ku Munsi Mpuzamahanga wahariwe Amahoro wabaye ku wa Kane taliki ya 21 Nzeri 2023, abagore n’abakobwa biganjemo ababyariye iwabo mu Karere ka Rubavu bihuriye mu mukino wa gishuti hagamijwe kwimakaza amahoro no kurwanya amakimbirane mu miryango.

Abo bagore n’abakobwa biganjemo ababyariye iwabo bafashwa n’Umuryango AKWOS wimakaza amahoro no kugarura icyizere mu Banyarwandakazi binyuze muri Siporo, kwitabira gahunda zo kuboneza urubyaro, kurwanya virusi itera SIDA n’izirebana no kunoza imirire.

Muri uwo mukino wabereye mu Murenge wa Rugerero, abo bagore n’abakobwa bacakiranye n’abagore bakora mu Nzego zitandukanye z’ubuyobozi ndetse n’iz’umutekano mu Murenge wa Rugerero.

Ubuyobozi bw’Umuryango AKWOS bwasabye imiryango ituye mu Karere ka Rubavu kubana mu Mahoro barwanya amakimbirane kuko ari mu bidindiza iterambere.

Rwemerika Félicité washinze akaba n’Umuyobozi Mukuru w’Umuryango AKWOS nyuma y’umukino yasabye buri wese kuba umusemburo w’amahoro aho atuye no kurwanya amakimbirane.

Yagize ati: “Kuri uyu munsi wahariwe amahoro ndasaba buri wese kuba umusemburo w’amahoro, ufite amahoro ayaha na mugenzi we agaharanira ko aho ari hose ahaba, turasabwa kurwanya amakimbirane mu ngo zacu.”

By’umwihariko abakobwa babyariye iwabo bamaze kugaragaza impinduka nyuma y’aho dufashijwe n’Ubuyobozi bwiza tukabegera, bakomeze biteze imbere baharanira ko amateka atakwisubira, twakinnye umukino kandi dukunda kwifashisha imikino kuko idufasha guhura turi benshi tugasangira ubutumwa bukagera kuri benshi.”

Giramata Feza, umwe mu bakobwa babyariye iwabo utuye muri Kabirizi mu Murenge wa Rugerero, ashima Umuryango AKWOS kuko ubafasha gutera imbere no kuva mu bwigunge.

Yemeza ko ahanini bimwe mu byatumye agwa mu mutego wo kubyarira mu rugo byatewe n’uko amahoro yari yarabuze mu rugo.

Agira ati: “Ababyeyi bahoraga mu makimbirane bituma aho tuyahungiye tuhahurira n’ibigusha byatumye tubyarira mu rugo. Turifuza ko Ingo zose zabamo amahoro azira amakimbirane, ikindi ndashima AKWOS kuko mbere bataraduhugura twari twugarijwe n’ubwigunge dutotezwa ariko byararangiye.”

Umuryango AKWOS ufite intego zirimo gutinyura no kongerera abari n’abatagarugori imbaraga binyuze muri Siporo aho ufite ibikorwa bitandukanye mu Karere ka Rubavu n’ahandi hatandukanye mu gihugu.

  • Imvaho Nshya
  • Nzeri 22, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE