RRA yakomoje kuri EBM isaba buri mucuruzi kuyikoresha

  • NTAWITONDA JEAN CLAUDE
  • Werurwe 10, 2022
  • Hashize imyaka 2
Image

Ikigo cy’Imisoro n’Amahoro (RRA) cyavuze ku ikoranabuhanga rya EBM kinasaba abakora ibikorwa by’ubucuruzi bubyara inyungu kujya bakoresha inyemezabuguzi ya EBM. Byagarutsweho na Komiseri w’Imisoro imbere mu gihugu Batamuliza Hajara, mu kiganiro yagiranye na RBA mu gitondo cyo ku wa 09 Werurwe 2022.

Asobanura ko EBM ari uburyo bwashyizweho n’Ikigo k’Imisoro n’Amahoro mu gukora inyemezabuguzi zemewe.  

Ati: “Abantu bose bakora ibikorwa by’ubucuruzi bibyara inyungu basabwa gukoresha EBM”.

RRA isobanura ko kuva mu 2013, hatangiriwe ku banditse ku musoro nyongeragaciro (TVA) kugira ngo bakoreshe EBM.

Kugeza ubu, EBM ikoreshwa n’abacuruzi bose bakora ibikorwa by’ubucuruzi.

RRA igaragaza ko hari uburyo bubereye buri munyarwanda ukora ibikorwa by’ubucuruzi kuko ngo kera hari hataraboneka ikoranabuhanga ryagera kuri bose.

Ishimangira ko ari yo mpamvu hari haraherewe ku bacuruzi banditse muri TVA.

Nubwo ngo hari abakora ubucuruzi buciriritse nk’abacuruza imboga n’ibindi, igihe kizagera nabo bakoreshe EBM.

RRA itanga ikoranabuhanga rya EBM kandi ikaritangira ubuntu k’uwari we wese ukora ibikorwa by’ubucuruzi. Icyiyongeraho ni uko uyihawe ayigishirizwa ubuntu.

Komiseri Batamuliza yagize ati: “Iyo ugiye kuyikoresha tuguha inyigisho zose za ngombwa kugira ngo ubashe kuyikoresha neza kandi ku buntu”.

Ikigo cy’igihugu cy’Imisoro n’Amahoro gisaba abasora bose gukoresha inyemezabuguzi ya EBM

Kugeza ubu harabarurwa ikoranabuhanga riri mu bwoko butanu mu gutanga inyemezabuguzi ya EBM.

Hari uburyo bukoreshwa na telefoni ngendanwa, uburyo bukoresherezwa kuri mudasobwa, ubukoresherezwa kuri POS no kuri Notepads zisanzwe.

Icyangombwa ngo ni uko ziba zishobora kwakira ikoranabuhanga rya EBM.

Ati: “Ubwo buryo bwose bukoreshwa n’ibyiciro by’abasoreshwa batandukanye kubera ko hari abakora inyemezabuguzi nkeya cyane cyane nk’abakora serivisi cyangwa bakora ibikorwa bike cyane ku mwaka nk’abakodesha inzu, abakora serivisi by’igihe gitoya.

Ibi ntibigusaba kuba ufite telefoni ngo utange inyemezabuguzi ya EBM”.

Avuga ko kuva EBM yatangira gukoreshwa mu Rwanda mu 2013, RRA yirinze guhana abacuruzi batayikoresha ahubwo yashyize imbaraga mu kwigisha abaturage.

RRA yishimira ko abacuruzi bamaze gutera imbere kubera ko bafite ababaruramari babafasha mu mirimo y’ubucuruzi no gusohora inyemezabuguzi.

Abatwara moto cyangwa tagisi vuwatiri (Taxi voiture) bafite uburyo bw’ikoranabuhanga bwa Yego Moto ikoreshwa nayo mu gutanga inyemezabuguzi.

Batamuliza agira ati: “Iyongiyo yakorewe ihuzanzira na EBM ku buryo uyifite wese ashobora gutanga inyemezabuguzi kandi nayo ikaba ari na EBM, aho nta mpungenge tuhafite”.

EBM ifasha kumenya ibisigaye mu bubiko  

Komiseri Batamuliza asobanura ko iyo bavuze ibicuruzwa bibitse mu bubiko biba biri no mu ikoranabuhanga rya EBM.

Batamuliza Hajara, Komiseri w’Imisoro imbere mu gihugu (Foto RRA)

RRA itangaza ko kugeza ubu ikoranabuhanga rya EBM ryahujwe n’ikoranabuhanga ricishwamo ibicuruzwa muri gasutamo y’abantu barangura, ku buryo buri muntu wese waranguye hanze ibicuruzwa bye byinjizwa ako kanya mu ikoranabuhanga rya EBM.

Ati: “Iyo aguze imbere mu gihugu arangura, nabwo asabwa kubishyira mu ikoranabuhanga rya EBM bityo ibyo yaguze byose biba biri muri rya koranabuhanga yabibitsemo.

Umucuruzi ucuruza adatanga inyemezabuguzi ya EBM bya bicuruzwa ntibisohoka mu bubiko (Store) kuko muri rya koranabuhanga rya EBM haba harimo ububiko.

Iyo ucuruje udatanga inyemezabuguzi ya EBM ntibisohoka ariko mu bubiko bwawe ibicuruzwa ugasanga byashizemo”.

Icyo RRA ikora mu bugenzuzi bwayo, Batamuliza avuga ko begera umucuruzi bakamwereka ko ibicuruzwa bye bikigaragara mu ikoranabuhanga rya EBM bareba mu bubiko bwe bagasanga ntabyo afite.

“Turamubwira tuti wacuruje udatanga inyemezabuguzi ya EBM, kora inyemezabuguzi y’ibi bintu kugira ngo bisohoke”.

Bivuze ko ngo umucuruzi aba yarakoze uburiganya mu gihe cyo gucuruza ntatange inyemezabuguzi ya EBM.

Aho ngo habamo ibihano ariko RRA isaba abacuruzi gutanga inyemezabuguzi za EBM hanyuma bagasohora bya bicuruzwa mu bubiko no mu ikoranabuhanga rya EBM.  

Kuva gahunda ya ’EBM kuri Bose’ yatangizwa mu mwaka wa 2021, imaze guhabwa abasora bagera ku 2,400 bari mu cyiciro cy’abatumiza n’abohereza ibicuruzwa hanze.

Ikigo cy’Imisoro n’Amahoro kigaragaza kandi ko abasora banditse ku musoro ku nyongeragaciro (TVA) bagera ku 31,768 mu gihe abakoresha ikoranabuhanga rya EBM barenga 26,000.

Ingingo ya 17 y’itegeko No. 026/2019 rigena uburyo bw’isoresha ivuga ko umuntu ukora ibikorwa bisoreshwa agomba gutanga inyemezabuguzi ikozwe mu buryo bw’ikoranabuhanga bwemewe n’ubuyobozi bw’imisoro ari yo EBM.

Naho ingingo ya 18 ivuga ku nshingano z’ukoresha ubwo buryo, harimo ko agomba kugira no gutanga inyemezabuguzi ikoreshejwe ikoranabuhanga ryabugenewe ku muntu wese uguze hatitawe ku kuba ayisabye cyangwa atayisabye.

  • NTAWITONDA JEAN CLAUDE
  • Werurwe 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE