RRA irategurirwa kuba ikigo mpuzamahanga

  • NTAWITONDA JEAN CLAUDE
  • Gicurasi 13, 2022
  • Hashize imyaka 2
Image

Komiseri Mukuru w’Ikigo cy’Igihugu cy’Imisoro n’Amahoro (RRA) Bizimana Ruganintwari Pascal, yatangaje ko iki kigo kirimo gutegurirwa kuba mpuzamahanga.

Yabigarutseho mu kiganiro aherutse kugeza ku bahagarariye abacuruzi mu byiciro bitandukanye, mu mwiherero wabereye i Bugesera mu Ntara y’Iburasirazuba.

Bizimana yabwiye abikorera mu Rwanda ko Ikigo cy’Igihugu cy’Imisoro n’Amahoro cyagiye kiba ikigo gisa nk’aho gitera abantu ubwoba bigatuma batacyiyumvamo uko bikwiye, bityo imikorere mishya igishyira ku rwego mpuzamahanga ikaba izahindura iyo sura mbi bagifiteho cyane ko kizaba gifite imikorere mishya.

Ati: “Turabona hageze ko ikigo tukivugurura natwe, tugashyiraho imikorere ijyanye n’uko mubyifuza. Turi muri gahunda yo kuvugurura ikigo, tukagira ikigo cyacu gikora ku rwego mpuzamahanga kandi cyiyubashye. Aho tugeze ni uko twamaze gukora ishusho nshya y’ikigo (Structure)”.

Ubuyobozi bwa RRA buvuga ko abasora banini n’abasora bato ibyo byavuyeho ahubwo ko ngo hashyizweho inshingano nko kuba hariho abashinzwe ibaruramari ry’abacuruzi.

Hari abashinzwe kumenyekanisha umusoro bakaba banashinzwe abasora bose ariko bakaba ari inzobere (Specialists).

Akomeza agira ati: “Mu by’ukuri ni ikigo kizaba cyubatswe mu buryo bushyashya mu minsi iri imbere, ikindi ni uko muri gahunda yacu ari ukongera umusaruro”.

Kugeza ubu ibijyanye na politiki birimo gukurikiranwa na Minisiteri y’Imari n’Igenamigambi. Harimo amategeko arimo kuvugururwa ya VAT, n’itegeko ry’umusoro ku nyungu.

Ubuyobozi bw’Ikigo cy’Igihugu cy’Imisoro n’Amahoro busobanura ko hari ibyo burimo gukora bijyanye no guhuza ikoranabuhanga ndetse no guhuza n’ibisabwa ku rwego mpuzamahanga.

Ikigega Mpuzamahanga cy’Imari (IMF) kiza kugenzura ibintu hafi 9, kikareba niba koko RRA ari ikigo gikora ku buryo mpuzamahanga ndetse no ku buryo bwubahiriza amahame asabwa kugira ngo kibe ikigo mpuzamahanga.

Komiseri Mukuru Bizimana agira ati: “Baragisuzuma mu nzira hafi 32 kugira ngo bemeze ko koko ari ikigo gifite imikorere iri ku rwego mpuzamahanga. Kugira ngo tugere kuri urwo rwego ikiba gikurikiyeho ni uguhura namwe (Abacuruzi) tukabasobanurira”.

Ikigo k’Imisoro n’Amahoro kigiye kuba ikigo mpuzamahanga (Foto Internet)
  • NTAWITONDA JEAN CLAUDE
  • Gicurasi 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE