RMB yahagaritse impushya 10 kuri Kompanyi 7 zarenze ku mabwiriza y’ubucukuzi

  • AKIMANA JEAN DE DIEU
  • Mutarama 3, 2024
  • Hashize amezi 5
Image

Ikigo gishinzwe Mine, Peteroli na Gaze mu Rwanda (RMB) cyatangaje ko cyahagaritse impushya  zo gucukura amabuye y’agaciro kuri Kompanyi 7 zikorera mu Turere  two mu Ntara zitandukanye kubera kurenga ku mabwiriza y’ubucukuzi bw’Amabuye y’Agaciro.

Nkuko bigaragazwa n’itangazo rigenewe abanyamakuru ryasohotse kuri uyu wa Gatatu tariki ya 03 Mutarama 2024, bigaragara ko impushya zose zahagaritswe ari 10 kuri Kompanyi z’ubucukuzi bw’Amabuye y’agaciro mu Turere twa Bugesera, Ngororero, Kamonyi, Rutsiro na Rubavu.

Zimwe mu mpamvu zigaragazwa n’uko izi kompanyi zananiwe  gushyira ku murongo ibibazo by’umutekano, gukora ubucukuzi butangiza ibidukikije, kubahiriza amategeko ajyanye  n’umurimo ndetse hakiyongeraho ko bamwe batigeze bahuza n’ibyo biyemeje bajya gushora imari muri ubu bucukuzi.

Mu ntara y’Iburengerazuba hahagaritswe kompanyi yutwa DEMIKARU yari ifite impushya 2 mu Turere twa Ruvavu na Rutsiro, hahagarikwa na Kompanyi zakoreraga ubucukuzi mu Karere ka Ngororero harimo Ngali Mining Limited yacukuraga amabuye ya Ametthys, ETs MUNSAD Minerals yari ifite uruhushya rumwe Ngororero Mining company (NMC) yakoreraga ubucukuzi i Nyamisa na Nyabisindu muri Ngororero.

Mu Ntara y’Iburasirazuba hahagaritswe impushya 2 za  kompanyi ya ETs R.M& Sons yakoreraga ubucukuzi mu Karere ka Bugesera.

Mu Ntara y’Amajyepfo hahagaritswe uruhushya rwa Kompanyi ya FX TUGIRUBUMWE yakoreraga ubucukuzi mu Karere ka Kamonyi  na yo yarenze ku mabwiriza yo kubahiriza y’ubucukuzi bw’amabuye y’agaciro mu Rwanda.

Iri tanganzo rigenewe abanyamakuru ryaciye ku rubuga rwa X rwahoze ari Twitter rigaragaza ko hanahagaritswe uruhushya 1 rwa  Kompanyi yitwa Union Stone  yacukuraga i Rwankuba.

Icyo cyemezo kije gikurikira ikindi cyemezo cyatangajwe ku wa 13 Ugushyingo 2023, ubwo hahagarikwaga impushya 13 zari zifitwe na kompanyi 10.

Iri tangazo rigaragaza ko ibi byakozwe mu rwego rwo gushyira mu bikorwa ingamba zo gukora ubucukuzi bw’Amabuye y’agaciro mu buryo bwa Kinyamwuga.

Ubuyobozi bwa RMB buvuga ko buzakomeza gukorana n’izindi nzego kugira ngo ibirombe byahagaritswe bicungirwe umutekano mu gihe hazaba hategerejwe ko hahabwa abandi bashoramari kugira ngo bahakorere mu buryo bukurikije amategeko agenga ubucukuzi mu Rwanda.

RMB kandi iributsa abasanzwe bafite impushya zo gucukura amabuye y’Agaciro gukomeza kubahiriza ibyo basabwa kugira ngo ubucukuzi bukomeze gutanga umusanzu mu iterambere ry’Igihugu.

  • AKIMANA JEAN DE DIEU
  • Mutarama 3, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE