RIC ntiyemera ko hari uwayobora idini n’itorero atarize

  • KAYITARE JEAN PAUL
  • Ukuboza 5, 2023
  • Hashize amezi 6
Image

Ihuriro ry’Imiryango ry’amatorero, amadini na Kiliziya Gatulika mu Rwanda (Rwanda Inter-religious Council, RIC) ntiryemera ko umuntu yayobora itorero atarize.

Ni ingingo yaganiriweho n’abahagarariye RIC ku rwego rw’igihugu kugeza mu turere hamwe n’Urwego rw’igihugu rw’Imiyoborere (RGB) kuri uyu wa Kabiri tariki 05 Ukuboza 2023 mu Mujyi wa Kigali.

Iri huriro ritangaza ko rifite inzitizi zitandukanye zirimo imyigishirize idahwitse hakoreshejwe ikoranabuhanga nka YouTube n’izindi mbuga zitirirwa amadini.

Itegeko rigena ko abayobozi b’amadini n’amatorero bigomba kuba barize Kaminuza ryashyizweho mu 2018 ariko hashyirwaho igihe cy’imyaka 5 kugira ngo abatarize bagire umwanya wo kwiga.

Musenyeri Manasseh Gahima wa EAR Diyosezi Gahini, avuga ko badatunguwe kuko RGB yabibasobanuriye kandi ngo intego yabyo irumvikana.

Avuga ko igihugu kirimo gutera imbere, abanyarwanda bajijutse bityo ko bikenewe ko ugira icyo abwira abasenga, ababwira afite urwego na we ariho.

Ati “Uretse no kuvuga ijambo ry’Imana n’indi mirimo yose dushinzwe kuyikora kugira ngo duteze imbere abantu dushinzwe kuyobora, rero bikenera urwego rw’imyumvire n’imitekerereze”.

Ahamya ko mu myaka Itanu ishize, hari abamaze kuminuza ariko ko hari abakiri mu mashuri akaba ari urugendo rugikomeza.

Akomeza agira ati “Birumvikana igihe kirageze ngo bishyirwe mu bikorwa, hari aho bizagorana ariko ni urwego rudufashije natwe gukanguka kubera yuko abantu benshi bamaze kubona impamyabumenyi zikenewe”.

Avuga ko hari imyumvire ikwiye guhinduka yo kuvuga ngo umuntu yarahamawe nta mpamvu yo kwiga.

Agira ati “Kuki se hahamagarwa udafite ubushobozi? Uwahamagawe ntabwo yakwiyongera mu bumenyi akagira urwego nibura rufasha abantu?

Erega umuhamagaro urubakwa. None kuki umuntu ufite lisanse, akenera impamyabushobozi y’icyiciro cya Kabiri cya Kaminuza? Kuki akenera impamyabushobozi y’ikirenga (Phd).

Umuntu agenda azamuka mu myumvire, mu mitekerereze kandi uko urushaho gusobanuka mu myumvire, ni ko urushaho no gufasha abantu”.

Sheikh Nduhurambuga Hussen umuyobozi w’abayisilamu mu Karere ka Nyagatare mu Ntara y’Iburasirazuba akaba na Visi Perezida wa Kabiri wa RIC muri Nyagatare, yabwiye Imvaho Nshya abayobozi b’amadini n’amatorero bakwiye kuba barize kuko ngo ntawakora mu mufuka atambaye.

Ahamya ko mu Bayisilamu hari imvugo y’intumwa y’Imana ibabwira ngo ‘Icya mbere ubumenyi, mbere yo kujya gukora’.

Ati “Ibi ni ngombwa kandi birakwiye ngira ngo ni ko n’inzego z’igihugu zagiye ziyubaka. Impinduka zagiye zibaho abayobozi bikaba ngombwa bakagaruka bakiga kugira ngo bagere ku bushobozi.

Burya erega ngo utambaye ntakora mu mufuka, ibi ni byo”.

Ashimangira ko kuva aho byavugiwe ko abayobozi bagomba kwiga, hari abateye intambwe abantu bagaruka mu ishuri bariga.

Hari abashoboye kurangiza Kaminuza hari n’abafite aho bageze ariko ngo hari n’abatarabishoboye kubera impamvu zabo zitabaturutseho kimwe n’uko hari abagize ubunebwe ntibige n’abatarabishatse.

Agira ati “Abatarabishoboye bazahigamira abandi, uko byagenda kose kuba igihugu cyarabisabye hakaba hashize imyaka Itanu, uko byagenda kose bigomba kujya mu bikorwa”.

Musenyeri Philippe Rukamba, umuyobozi wa RIC ku rwego rw’igihugu, avuga ko abayobozi b’amadini n’amatorero bafite ikintu gikomeye bagomba gukora nkuko RGB yabibibukije.

Ati “Tugomba gutuma ba bantu bigisha baba abantu bashoboye, baba abantu babifitiye ubumenyi buhagije, ni cyo Leta yasabye”.

Yavuze ko ikintu RIC igiye gukora, ari ukumvikana hagati yabo ku buryo wawundi utabishoboye, udafite ubumenyi buhagije akora ibireshya n’ubumenyi afite.

Ati “Baduhaye urugero uko byagenze muri ADEPR n’ahandi. Umuntu nakore ibireshya n’ubumenyi afite”.

Dr Usta Kayitesi, Umuyobozi Mukuru wa RGB, yavuze ko mu 2018 habayeho igenzura ry’imikorere y’imiryango ishingiye ku myemerere itandukanye, bigaragara ko harimo imikorere itari myiza.

Abantu bafunguraga amatorero uko biboneye, bakayafungura aho babonye ndetse nta n’ibipimo byubahirizwa.

Avuga ko uko abanyarwanda bakomeza gutera imbere bikwiye ko bigishwa mu iyobokamana n’abantu nabo babifitiye ubumenyi.

Asobanura ko habayeho kuvugurura itegeko ryari ririho mu 2012 haganirwa ku biri mu itegeko, hazamo ko abayobozi b’amadini n’amatorero bakwiriye kuba bafite ubumenyi bw’iyobokamana.

Ati “Mu kuganira hashyizweho igihe cyo kubiganiraho. Itegeko ryasohotse mu 2018 ritanga igihe cy’imyaka Itanu, umuyobozi w’itorero ku rwego rw’igihugu agomba kuba yarize iyobokamana cyangwa yarize ibindi akongeraho iyobokamana”.

  • KAYITARE JEAN PAUL
  • Ukuboza 5, 2023
  • Hashize amezi 6
TANGA IGITEKEREZO
Niyomufasha says:
Ukuboza 8, 2023 at 6:53 am

Murakoze,nibyiza Ibyo RIC isaba kuba umuntu afite ubumenyi kurwego rwa Kaminuza rwose cg na high school ahandi ariko ayo madini akwiye gufasha ababyifuza kwiga aho bishoboka bakishyurirwa nkuko leta Ibikora itegura abakozi ikabaha amahugurwa abandi ikabohereza imahanga kwihugura no kwiga ariko amadini nuko bikorwa?sinzi gusa byahawe igihe gito kubwanjye hari gutanga imyaka nka 15 kuko n,ubundi bizikora uko igihugu gitera imbere nemerako uvuga ubutumwa akwiye no kumenya indimi z,amahanga kuko Yesu yadutumye mumahanga yose.

Andika igitekerezo

AMATEGEKO AGENGA IYANDIKA RY'IGITEKEREZO CYAWE