RHA yasabwe gukemura ikibazo cy’inzu za Leta zidakoreshwa

  • Imvaho Nshya
  • Ugushyingo 9, 2023
  • Hashize amezi 4
Image

Abadepite bagize Komisiyo ishinzwe kugenzura imikoreshereze y’ingengo y’imari ya Leta (PAC), basabye Ikigo cy’Igihugu cy’Imiturire (RHA) gukemura ikibazo cy’inzu za Leta zidakoreshwa zikenewe kuba zavugururwa, ibyo bikazatuma Leta idakomeza gutanga amafaranga y’ubukode bw’ibiro.

Raporo y’Umugenzuzi Mukuru w’Imari ya Leta, y’umwaka w’ingengo y’imari wa 2021/2022, igaragaza ko inyubako za Leta 49,937 zasuzumwe, izisaga 1000 zidakoreshwa, zishaje bikabije, ku buryo hari izishobora no gusenywa.

Tariki ya 2 Ugushyingo 2023, Abadepite bagaragaje ko hari inyubako za Leta zisaga 1000 zidakoreshwa ziboneka hirya no hino mu gihugu, inzego zifite aho zihuriye n’imicungire y’inzu n’ibikoresho bya Leta zagize icyo zibivugaho.

Umuyobozi Mukuru w’Ikigo cy’Igihugu cy’Imiturire (RHA) Rukaburandekwe Alphonse, atangaza ko hari gahunda yo kubyaza umusaruro inyubako za Leta zitagikoreshwa, ariko hakaba hari n’izasenywa.

Yagize ati: “Twabaruye inyubako za Leta zitagikoreshwa ndetse dusuzuma uko zimeze. Ubu turi gusuzuma izishobora kuvugururwa zikongera gukoreshwa, mu gihe izindi zishobora gusenywa kugira ngo ubutaka zari ziriho bube bwakoreshwa mu bundi buryo”.

Umwe mu Badepite bagize Komisiyo ishinzwe kugenzura imikoreshereze y’ingengo y’imari ya Leta (PAC), Hon. Uwanyirigira Gloriose, yavuze ko inyubako za Leta zidakoreshwa zigomba kwitabwaho.

Ati: “Ikibazo cy’inyubako za Leta zidakoreshwa kigomba kwitabwaho byihutirwa. Ikigo gishinzwe Imiturire mu Rwanda kigomba kwerekana uburyo bunoze bwo gukemura iki kibazo”.

Kuri iki kibazo, Umuyobozi wa RHA Rukaburandekwe yavuze ko hari inzego za Leta zamaze kwimukira mu nzu za Leta zamaze kuzura ndetse hari n’izindi zigiye kwimuka.

Umuyobozi w’Urugaga rw’Abagenagaciro mu Rwanda John Mugisha yasobanuye ko umutungo utimukanwa ushobora kwangirika cyane igihe utarimo gukoreshwa, bikaba byanagera aho agaciro ko kuwusana gasumba agaciro k’umutungo ubwawo.

Visi Perezida wa PAC, Hon. Beline Uwineza yanagaragaje ko hari inyubako za Leta zigifite imyanya hadakoreshwa, asaba ko harebwa uko hakoreshwa ikibazo kigakemura bitarenze amezi 3.

Yagize ati “Inyubako ya RURA iracyafite ahantu hadakoreshwa kandi yarubatswe hagamijwe kugabanya umutwaro w’amafaranga, ku bigo bya Leta bigikodesha ibiro. Ibibazo bituma aho hantu hadakoreshwa bigomba gukemurwa mu gihe cy’amezi atatu”.

Inyubako ya Rura iracyafite ahantu hadakorerwamo

Abadepite bo muri Komisiyo ya PAC batangaje kandi ko kuba inzu Leta ifite zishobora kuvugururwa byakorwa, kuko byagabanya akayabo k’amafaranga isohora yishyura ubukode bw’aho ibigo byayo bikorera.

Hatanzwe urugero rw’ibigo bimwe na bimwe bya Leta bifite inzu zishobora kuba zavugururwa nk’izo mu Kigo cy’Igihugu gishinzwe guteza imbere Ubuhinzi n’Ubworozi RAB, gifite inyubako 308 zikeneye kuvugururwa.

Inzego za Leta zigizwe na Minisiteri ndetse n’ibigo byayo 164, izigera ku 138 zikorera mu nyubako za Leta mu gihe 26 igihugu cyizishyurira ubukode bwa miliyari zisaga 13 z’amafaranga y’u Rwanda ku mwaka, kandi ifite inzu zayo zisaga 1 000 ziri hirya no hino mu gihugu zitabyazwa umusaruro.

NYIRANEZA JUDITH

  • Imvaho Nshya
  • Ugushyingo 9, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE