RGB yanenze abatega abaturage televiziyo aho kubaha serivisi

  • Imvaho Nshya
  • Ugushyingo 2, 2023
  • Hashize amezi 7
Image

Urwego rw’Igihugu rw’Imiyoborere (RGB) rusanga hari ibikwiye guhinduka mu gutanga servisi, amafaranga ashorwa mu kugura televiziyo cyangwa se intebe z’aho abantu bicara bategereje guhabwa servisi akaba yashorwa mu ngamba zo kwihutisha serivisi.

Umuyobozi Mukuru wa RGB Dr. Usta Kaitesi, yabigarutseho ku wa Gatatu taliki ya 1 Ugushyingo ubwo yagezaga ku  Nteko Inshinga Amateko, imitwe yombi, ibikubiye mu bikorwa bya RGB by’umwaka wa 2022-2023 na gahunda y’ibikorwa y’umwaka wa 2023/2024.

Dr.  Kaitesi yavuze ko nta mpamvu y’uko hashorwa amafaranga menshi mu kugura  ibikoresho  bifasha abaturage gutegereza umwanya munini mu gihe bagiye kwaka serivisi, ahubwo ko hakwiye kujyaho uburyo bwose bushoboka bwatuma abaturage bahabwa serivisi ku gihe aho kubategurira televisiyo yo kwihanganira serivisi zatinze.

Yagize ati: ”Si ukuvuga ngo abantu bareke kwihangana ariko kunshishikariza kwihangana bitari ngombwa kugira ngo ntakaze umwanya…. hari impaka twigeze kujya ku kazi, bashaka ko twagura televiziyo z’ahantu bazajya bategerereza.Ariko kuki abantu baza bagategereza? Ubu dufate amafaranga tuyashyire  mu televiziyo  z’aho abantu baza kwicara bategereje, aho gushyiramo  imbaraga z’uko batari butegereze?”

Yakomeje agira ati: “Niba ugiye kugura intebe z’aho abantu bazicara bagutegereje wakubaka ute uburyo abantu baza ntibategereze, ntibibe ngombwa ko ubarangaza?  Kuko buriya televiziyo ureba ntabwo areba iby’ingenzi ahubwo areba ibyo bamushyiriyeho mu buryo bwo kumurangaza”.

Uwo muyobozi kandi yanagaragaje ko hakiri icyuho gikomeye mu mitangire ya servisi z’ubutaka ndetse n’imikoranire n’izindi nzego zirimo iz’abikorera imiryango itari iya Leta.

RGB ivuga ko serivisi zitangwa mu buhinzi zigashimwa ku kigero cyo hasi kuko muri mu cyegeranyo cy’ibipimo by’urwego rw’imiyoborere (CRC) cya 2022 cyari kuri 61.1%, naho muri cya 2023 kiri kuri 63.2%.

Abaturage bazi serivisi z’ubutaka n’imiturire bazishima ku kigero cya 60.4% kivuye kuri 60.5% mu cyegeranyo cya 2022, kikaba ari cyo cyiciro gishimwa ku kigero cyo hasi.

Haracyagaragara imbogamizi mu mikorere n’imikoranire hagati y’inzego bituma politiki na gahunda za Leta zidashyirwa mu bikorwa mu buryo bukwiye.

 Nanone kandi haracyagaragara imbogamizi mu ishyirwa mu bikorwa ry’ibikubiye mu masezerano y’ubufatanye hagati ya Leta na ba nyir’amavuriro afashwa na Leta ku bw’amasezerano nk’uko byagaragajwe na 80% bya ba nyiri amavuriro na 71% by’abakozi bashinzwe ubuzima mu turere twakorewemo igenzura,

Amavuriro yagaragaje ko ibigo by’ubwishingizi bitinda kwishyura serivisi zahawe abanyamuryango babyo.  Ubushakashatsi bwagaragaje ko hakiri ikibazo mu mikoranire hagati ya sosiyetez’ubwishingizi  n’abikorera kuko iyi mikoranire iri ku kigero cyo hasi cya 37.81%.

Abagize Inteko Ishinga Amategeko basabye RGB gufasha inzego zitandukanye kugira imikoranire no kuzamura urwego rw’imitangire ya servisi.

Mu bipimo by’urwego rw’imiyoborere by’ubushakashatsi bikorwa buri mwaka ku nkingi 8 z’imiyoberere mu Rwanda, ubuheruka bwagaragaje ko Inkingi y’Ireme ry’imitangire ya serivisi yaje  ku mwanya wa 7 n’amanota 78.28%.

ZIGAMA THEONESTE

  • Imvaho Nshya
  • Ugushyingo 2, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE