RGB yahishuye impamvu umutekano ukomeje kuba ku isonga

  • Imvaho Nshya
  • Ugushyingo 1, 2023
  • Hashize amezi 7
Image

Urwego rw’Igihugu rw’Imiyoborere RGB ruvuga ko kuba inkingi y’umutekano n’umudendezo w’abaturage ikomeje kuza imbere y’izindi nkingi z’imiyoborere uru rwego rukoraho ubushakashatsi buri mwaka, biterwa n’uko abaturage bafite icyizere kuri iyi nkingi ndetse no kuba abakora mu nzego z’umutekano kenshi bakora kinyamwuga.

Mu bushakashatsi bw’uyu mwaka inkingi y’umutekano n’umutuzo ni yo iri imbere ku gipimo cya 93.63% muri icyo cyegeranyo ngarukamwaka gikorwa hashingiwe ku nkingi umunani, ikaba ari yo yagiye inahiga izindi mu byegeranyo byakozwe mu myaka 10 ishize.

Umuyobozi Mukuru w’Urwego rw’Igihugu rw’Imiyoborere (RGB) Dr Usta Kayitesi yagaragaje ko impamvu inkingi  y’umutuzo n’umutekano ikomeza kuza imbere y’izindi ari uko ifitiwe icyizere n’abaturage kuko ari na bo batanga amakuru mu gihe cyo gukora ubushakashatsi.

Uyu muyobozi kandi anahamya ko abakora mu nzego z’umutekano benshi bakora kinyamwuga bityo bigatuma bakomeza kugira amanota meza mu gihe cy’ubushakashatsi ku miyoborere y’u Rwanda bityo ko n’abakora mu zindi nzego bakwiye kubigira mu kwimakaza imiyoborere myiza.

Yagize ati: ”Ni icyizere, umutekano w’igihugu urizewe, ntabwo bitangaje kuba icyizere kuri Polisi uyu mwaka cyarazamutseho 3% ariko ntibikuyeho ko hari abapolisi bafatiwe ibyemezo kubera ko bakoze amakosa yo kutubahiriza umwuga bakanafatirwa ibyemezo byo kuva muri Polisi kubera ko batakoze kinyamwuga.

Bisubira kuri wa muco wo kubaka umwuga ariko na wa muco wo guhana, ngira ngo inzego zidakora kuri urwo rugero ni ho bikwiye kugaragarira iyo urebye hari abaturage bavuga ko hari ruswa mu nzego za Polisi, ariko nanone bavuga ko Polisi ari iya mbere mu kurwanya ruswa, ugasanga hari aho bavuga  ruswa mu Nzego z’ibanze ariko itarwanywa uko bikwiye”.

RGB kandi yongeraho ko abaturage bafitiye icyizere gihagije inzego nkuru z’igihugu, bagifitiye Perezida wa Repubulika, Inteko Ishinga Amategeko   ndetse n’Inzego z’umutekano muri rusange.

Ubushakashatsi bw’ibipimo by’Imiyoborere mu Rwanda bukorwa hagamijwe kugaragaza ishusho y’uko imiyoborere ihagaze mu gihugu mu byiciro bitandukanye no kugaragaza ingamba mu gushyiraho politiki mu nzego zitandukanye z’igihugu.

Inkingi y’Iyubahirizwa ry’Amategeko ni yo iza ku mwanya wa kabiri n’amanota 88.89%, igakurikirwa n’iyo kurwanya ruswa no gukorera mu mucyo ku mwanya wa kane n’amanota 88.97%. Uburenganzira mu bya Politiki n’ubwisanzure bw’abaturage ifite amanota 88.01%, Imiyoborere Idaheza kandi Abaturage bagizemo uruhare ku mwanya wa  gatanu n’amanota  84.04%.

Inkingi ya gatandatu ni Imiyoborere mu bukungu n’ubucuruzi ifite amanota 79.98%, ireme ry’imitangire ya serivisi ku mwanya wa 7 n’amanota 78.28%, mu gihe Kuzamura imibereho myiza y’abaturage byaje ku mwanya wa 8 n’amanota 75.51%.

ZIGAMA THEONESTE

  • Imvaho Nshya
  • Ugushyingo 1, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE