REG WBBC yatsinze umukino wa kabiri mu mikino Nyafurika

  • SHEMA IVAN
  • Ukuboza 12, 2023
  • Hashize amezi 5
Image

REG WBBC yatsinze Inter Clube yo muri Angola amanota 95- 89 mu mukino wa kabiri mu itsinda C mu mikino Nyafurika ya ‘Africa Women’s Basketball League 2023.”

Uyu mu mikino wabaye kuri uyu wa Kabiri tariki 12 Ukuboza 2023, mu Mujyi wa Alexandria mu Misiri.

Ni umukino Ikipe ya Sosiyete y’Igihugu Ishinzwe Ingufu yatangiye neza ariko igerageza kugenda imbere ya Inter Clube mu manota, nubwo ku isegonda rya nyuma yinjijwe amanota abiri igasoza Agace ka Mbere zombi zinganya 27 kuri 27.

Nia Clouden yatangiranye ingufu mu gace ka kabiri, bituma afasha REG WBBC kukinjiramo itsinda amanota yongera kuyisubiza imbere ya Inter Clube.

Tiffany Mitchell witwaye neza mu mukino ubanza yisanze muri aka gace ka kabiri atangira guha bagenzi be imipira ivamo amanota kugeza karangiye ari REG WBBC ikinjijemo 33-19.

Mu gace ka gatatu REG WBBC yatangiye gushyiramo ikinyuranyo  abakinnyi bakinana icyizere ari na ko umutoza Mukaneza Espérance ahinduranya abakinnyi harimo Feza Ebengo na Jane Dusabe basimburanaga na Nadine Rutagengwa na Betty Kalanga.

Aka gace REG WBBC yakegukanye itsinze Inter Clube amanota 74-66.

Mu gace ka nyuma Cristina Matiquite yagerageje gufasha iyi kipe yo muri Angola gutsinda aka kane ariko biba iby’ubusa REG WBBC ikomeza kwihagararaho.

Umukino warangiye REG WBBC yatsinze Inter Clube amanota 95-89 yegukana intsinzi ya kabiri muri iri rushanwa.

Muri uyu mukino Tiffany Mitchell ni we watsinze menshi, angana na 34, atanga imipira itanu yavuyemo andi manota, akora na ‘rebounds’ umunani.

REG WBBC Izagaruka mu kibuga ikina umukino wa gatatu na Equity Bank  yo muri Kenya ku wa Gatatu, tariki 13 Ukuboza 2023.

  • SHEMA IVAN
  • Ukuboza 12, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE