REG WBBC yasezerewe muri 1/2 mu mikino  Nyafurika

  • SHEMA IVAN
  • Ukuboza 18, 2023
  • Hashize amezi 3
Image

Ikipe y’abagore ya Sosiyete y’Igihugu Ishinzwe Ingufu mu mukino wa Basketball (REG WBBC) yatsinzwe na Kenya Ports Authority yo muri Kenya amanota 101-97, ibura amahirwe yo kugera ku mukino wa nyuma wa “FIBA Africa Women’s League”.

Uyu mukino wabaye kuri uyu wa Mbere tariki 18 Ukuboza 2023 i Alexandria mu Misiri.

Uyu mukino wa ½ watangiye ikipe ya KPA itsinda amanota menshi kuko yagize amanota icyenda indi itaratsinda inota na rimwe.

Agace ka mbere karangiye REG WBBC itsinzwe na Kenya Ports Authority amanota 29-24.

Mu gace ka kabiri, REG WBBC yatangiye gutsinda amanota ibifashijwemo na Destiney Philoxy na Tiffany Mitchell, ku rundi ruhande, Madina Okot na Natalie Mwangale ntabwo bari kure na bo bafashaga ikipe yabo.

Igice cya mbere cyarangiye Kenya Ports Authority iyoboye umukino n’amanota 54-47ya REG WBBC.

Mu gace ka gatatu, ikipe yo muri Kenya yakinishaga ubunararibonye ari na ko yafashwaga na Okot wakorerwagaho amakosa menshi ndetse akayabyaza umusaruro, Victoria Reynolds akamukorera mu ngata.

Philoxy na Nia Clouden bafashaga iyi kipe yo mu Rwanda ariko kuyobora umukino bikanga.

Agace ka gatatu karangiye Kenya Ports Authority ikiyoboye umukino n’amanota 83-74 ya REG WBBC.

Mu gace ka kane, mu minota itatu ya nyuma y’agace ka nyuma, Philoxy yatsinze amanota atatu yagabanyije ikinyuranyo gisigara ari amanota abiri gusa. Ku rundi ruhande Okot yakomeje gukorerwaho amakosa menshi ari na ko ‘lancer franc’ yahabwaga yazitsindaga.

Ku isegonda rya nyuma, Philoxy yakoze ikosa ryahesheje KPA ‘lancer franc’ bazitsinda zose neza.

Umukino warangiye REG WBBC itsizwe na Kenya Ports Authority amanota 101-97 isezererwa muri 1/2 mu mikino Nyafurika muri basketball y’abagore.

Iyi kipe yo mu Rwanda izahura n’itsindwa hagati ya Sporting Alexandria na Interclube mu mukino wo guhatanira umwanya wa gatatu uteganyijwe ku wa Kabiri, tariki 19 Ukuboza 2023.

  • SHEMA IVAN
  • Ukuboza 18, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE