Real Madrid yegukanye Super Coupe ya Espagne inyagiye FC Barcelona

  • SHEMA IVAN
  • Mutarama 15, 2024
  • Hashize amezi 4
Image

Real Madrid yatsinze umukeba FC Barcelona ibitego 4-1, yegukana igikombe kiruta ibindi muri Espagne cyakinirwaga muri Arabie Saoudite mu ijoro ryo kuri iki Cyumweru, tariki 14 Mutarama 2024.

Amakipe yombi yatangiye uyu mukino FC Barcelona ari yo ifite igikombe giheruka cya 2023. Mu nshuro zose cyakinwe kuva mu 1982, FC Barcelona yagitwaye inshuro 14 naho Real igitwara inshuro 12.

Real Madrid yatangiye umukino isatira cyane izamu rya FC Barcelona ibona uburyo bwo gutsinda igitego.

Ku munota wa 7 Real Madrid yafunguye izamu ku igitego cyatsinzwe na Vinicius Junior ku mupira mwiza yacomekewe na Jude Bellingham hagati ya ba myugariro acenga umuzamu Inaki Pena, ahita ashyira umupira mu rushundura.

Real Madrid yarushakaga cyane FC Barcelona muri iyo minota yabonye igitego cya kabiri ku munota wa 10 ku mupira wazamukanywe na Rodrygo ku ruhande rw’iburyo awucomekera Vinicius Junior wari uhagaze neza ahita ashyira umupira mu izamu.

FC Barcelona yabonye uburyo bwo gutsinda igitego ku munota wa 27 ku ishoti rikomeye yatewe na Ferran Torres ikurwamo n’umuzamu Andriy Lunin wari uhagaze neza.

Ku munota wa 33 FC Barcelona yabonye igitego cyatsinzwe na rutahizamu Robert Lewandowski ku mupira wagaruwe nabi na Ferland Mendy ahita atera ishoti rikomeye umupira ujya mu izamu.

Nyuma y’iminota 4 Real Madrid yabonye Penaliti nyuma y’ikosa myugariro Ronald Araujo yakoreye Vinicius Junior mu rubuga rw’amahina, umusifuzi ahita atanga Penaliti.

Ku munota wa 39 ‘Real Madrid yabonye igitego cya gatatu kuri Penaliti yatsinzwe na Vinicius Junior watsindaga igitego cya gatatu cye mu mukino.

Igice cya mbere cyarangiye Real Madrid itsinze FC Barcelona ibitego 3-1 byose bitsinzwe na Vinicius Junior.

Mu gice cya kabiri FC Barcelona yatangiye isatira ishaka kugabanya ikinyuranyo ari na ko Real Madrid ishaka kongera umubare w’ibitego.

Ku munota wa 64 ‘Real Madrid yabonye igitego cya kane cyatsizwe na Rodrygo ku mupira watewe na Vinicius Junior ugarurwa ukurwaho nabi na myugariro Jules Kunde usanga ari wenyine ahita atera ishoti umupira uruhukira mu rushundura.

Ku munota wa 71 myugariro Ronald Araujo wa FC Barcelona yahawe ikarita y’umuhondo kabiri ibyara itukura, nyuma y’ikosa yari akoreye Vinicius Junior wabagoye cyane muri uyu mukino.

Ku munota wa 79 FC Barcelona yabonye amahirwe yo gutsinda igitego cya kabiri ku ishoti rikomeye ryatewe na Jaoa Felix umupira ukurwamo n’umuzamu Andriy Lunin.

Umukino warangiye Real Madrid inyagiye FC Barcelona ibitego 4-1 yegukana igikombe kiruta ibindi muri Espagne ku nshuro ya 13 mu mateka.

Aya makipe yombi azongera guhura tariki 21 Mata 2024, bakina umukino wa Shampiyona ya Espagne.

Vinícius yatsinze igitego cya mbere abanje gucenga umunyezamu wa FC Barcelona Iñaki Peña Sotorres
Vinícius Junior yishimira igitego cya mbere yatsinze ku munota wa karindwi
Robert Lewandowski yatsinze igitego cy’impozamarira cya FC Barcelona
  • SHEMA IVAN
  • Mutarama 15, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE