RDC yahamagaje ba Ambasaderi bayo muri Kenya na EAC kubera Ihuriro AFC

  • NTAWITONDA JEAN CLAUDE
  • Ukuboza 17, 2023
  • Hashize amezi 5
Image

Guverinoma ya Repubulika Iharanira Demokarasi ya Congo (RDC) ivuga ko yahamagaje ambasaderi wayo muri Kenya ngo bagirane ibiganiro, nyuma yuko muri Kenya hashingiwe ihuriro ry’imitwe yitwaje intwaro irwanya ubutegetsi bwa Kinshasa.

Umuvugizi wa Minisiteri y’Ububanyi n’Amahanga ya RDC Alain Tshibanda, yavuze ko igihugu cye cyanahamagaje ugihagarariye mu Muryango w’Afurika y’Iburasirazuba (EAC), ufite icyicaro i Arusha muri Tanzania.

Ibi bibaye nyuma ‘ ku wa Gatanu i Nairobi mu Murwa Mukuru wa Kenya, Corneille Nangaa Yobeluo wahoze ari Umuyobozi wa Komisiyo y’Igihugu y’AMatora ya RDC, agaragaye atangiza Ihuriro rya Politiki na gisirikare ryiswe ‘Alliance Fleuve Congo’ (AFC), ryiteguye gufatanya n’inyeshyamba za M23 mu kurwanya Leta ya RDC.

Nangaa, umaze amezi aba mu buhungiro, yavuze ko iryo huriro ririmo imitwe nibura icyenda yitwaje intwaro, rigamije “kongera kubaka Leta” no “kugarura amahoro” kubera ko ubuyobozi bwabanje byabunaniye, nkuko byatangajwe n’Ibiro Ntaramakuru by’Abafaransa (AFP).

Mu gutangiza AFC, Nangaa yari ari kumwe n’abarimo Bertrand Bisimwa, Umukuru wa Politiki w’Umutwe w’Inyeshyamba wa M23, usanzwe urwanya ubuyobozi bwa RDC.

Mbere y’aho Minisitiri w’Ububanyi n’Amahanga wa RDC Christophe Lutundula, yari yabwiye itangazamakuru ko Leta ya Kenya ishobora “kwirengera ingaruka” zava ku kwemera ishingwa ry’iryo huriro rigamije guhirika ubutegetsi.

Yagize ati: “Guverinoma yacu ifite ishingiro mu gusaba ibisobanuro Guverinoma ya Kenya, by’umwihariko kuko Bwana Corneille Nangaa yigambye ubufasha bahawe na guverinoma ya Kenya…”

Hagati aho, Ambasaderi w’Amerika i Kinshasa Lucy Tamlyn, yavuze ko iyo Ambasade “ihangayikishijwe bikomeye” n’itangazwa ry’ishingwa rya AFC, irimo Nangaa na Michel Rukunda (unazwi nka Makanika), Umuyobozi w’umutwe witwaje intwaro wa Twirwaneho.

Bombi basanzwe barafatiwe ibihano n’Amerika, nkuko bimeze no ku Mutwe wa M23.

Mu butumwa ku rubuga nkoranyambaga X, Ambasaderi Tamlyn yavuze ko ishingwa rya AFC ari “igitutsi ku baturage ba Congo”, mu gihe bitegura amatora yy’Umukuru w’Igihugu ku wa Gatatu tariki 20 Ukuiboza.

Yasabye “abashaka by’ukuri kurangiza ikibazo cy’umutekano mucye mu burasirazuba bwa RDC”, “gukurikiza ibikorwa byo mu karere bigamije amahoro… nka gahunda ya Luanda na Nairobi”.

Yongeyeho ko Amerika iteganya gufatira ibihano uwo ari we wese uzabangamira demokarasi cyangwa amahoro n’umutekano bya Congo n’akarere kayikikije.

Bintou Keita, Intumwa yihariye y’Umunyamabanga Mukuru w’Umuryango w’Abibumbye, akaba n’Umuyobozi w’Ingabo zoherejwe mu Butumwa bw’Umuryango w’Abibumbye (MONUSCO), na we yamaganye iryo huriro.

Yashishikarije AFC “kureka igikorwa icyo ari cyo cyose cy’urugomo gishobora guhungabanya umutekano” wa RDC, anasaba M23 gukurikiza gahunda y’ibiganiro ya Luanda no “gushyira intwaro hasi nta kindi ibanje gusaba”.

Corneille Nangaa ni we wari Muyobozi wa Komisiyo y’Igihugu y’Amatora ya RDC, ubwo Félix Tshisekedi yatangazwaga ko ari we watsinze amatora ya Perezida yo mu Kuboza (12) mu 2018.

Muri Kanama uyu mwaka, Nangaa yabwiye Radio Okapi ko yahunze kuko atari acyizeye umutekano we, nyuma y’uko abapolisi bamurindaga bakuweho.

Muri Gashyantare, Nangaa yari yashinze ishyaka ‘Action pour la Dignité du Congo et de son Peuple’ (ADCP), ritavuga rumwe n’ubutegetsi.

Mbere yari yavuze ko aziyamamaza mu matora yo ku wa 20 Ukuboza. ariko muri icyo kiganiro na Radio Okapi yavuze ko “igikorwa cy’amatora kirimo kuba kirangwamo ukubogama” ikirego akanama k’amatora gahakana.

BBC

  • NTAWITONDA JEAN CLAUDE
  • Ukuboza 17, 2023
  • Hashize amezi 5
TANGA IGITEKEREZO
lg says:
Ukuboza 18, 2023 at 7:33 am

Congo yigize nkumwana udakurwa urutozi gitindi Kisekedi niwe ubwe wavuze ko ashaka gukuraho Prezida wacu none umuturage usanzwe avuze ko bazamukuraho arasaze uwo Bintou Keita na ONU bitagize icyo bimaze nawe ati M23 nibanze ishyire intwaro hasi ntabiganiro ntakindi isabye wagirango nawe akarana na Kisekedi na Muyaya iyo ntabiganiro ntusaba umwe gushyira intwaro hasi ngo undi akurase uhagaze aho ONU niba hali ikintu kitagize icyo kimaze niyo bishe abantu mu Rwanda bareba bica abantu muli Congo bareba bica abantu muli Gaza bareba aliko ntibagira isoni zo gusaba abicwa kumanika amaboko abapfa impunzi ntibareba M23 ni abanyecongo Kisekedi akavuga ko ali abanyarwanda bagomba kuhava cyangwa kwicwa aliko icyo cya ONU ntikivuga uko bahageze ububiligi ubudage ubwongereza baracecetse bazi uko abo bisanze haliya ntanahamwe ndumva icyo kivugwa kandi niho nigisubizo kiri abayobozi ba Congo wagirango batoranya abafite ubwenge bungana u Rwanda rwarabihoreye kuko usubiza injiji agaceceka ngo u Rwanda bazarufata bananiwe na M23 bene wabo birirwa babirukansa u Rwanda baruvuga bikinis kuko bararuzi none bikomye Kenya itariye indimi ibasaba ko niba bashaka ambasaderi wabo bihuta akagenda uwabo agataha ntabisobanuro bindi reka rero murebe ngo agahuru kimbwa ngo karashya

Andika igitekerezo

AMATEGEKO AGENGA IYANDIKA RY'IGITEKEREZO CYAWE