RDC: Undi mukandida yiyunze kuri Ponyo ashyigikira Katumbi

Seth Kikuni, kandida Perezida mu matora y’Umukuru muri Repubulika iharanira Demokarasi ya Congo (RDC) kuri uyu wa Mbere tariki ya 20 Ugushyingo 2023, yatangaje ko yikuye mu matora amajwi ayaha  Moïse Katumbi.

Mu gutangaza ko yikuye mu matora ku rukuta rwa X yagaragaje ko yabikoze agendeye ku rugero rwa mugenzi we Matata Ponyo na we watangaje ko azashyigikira Moise Katumbi mu guteza imbere igihugu.

Seth Kikuni yatangaje ko abona ko Moïse Katumbi ari we mukandida utavuga rumwe n’ubutegetsi uzatsinda amatora ya tariki 20 Ukuboza 2023, kandi uzashobora guhagarika ibibazo birimo gusahura igihugu akagihindura gishya kigana ku iterambere.

Ashingiye kuri ibi Seth Kikuni yahamagariye abandida bose batavuga n’ubutegetsi buriho kwifatanya bakabasha gutsinda amatora.

Seth ahaye amajwi Moise Katumbi nyuma y’amasaha 24 mugenzi we Matata Ponyo Augustin na we atangaje ko amajwi ye azayaha Moise Katumbi ndetse asaba abamukunda ko bazaba ari we baha amajwi.

Ponyo yavuze ko yizeye ko abandi bakandida b’uruhande rutavuga rumwe na Leta, na bo bagera ikirenge mu cye bagashyigikira Katumbi.

Ponyo na Katumbi yabaye abayobozi ku butegetsi bwa Joseph Kabila, umwe ari Minisitiri w’Intebe, naho Katumbi ari Guverineri w’Intara ikize ku mabuye y’agaciro ya Katanga.

Perezida Felix Tshisekedi, arashaka manda ya kabiri, ku cyumweru yatangije ibikorwa byo kwiyamamaza.

Imiryango itari iya Leta ivuga ko Leta ya Congo ikoresha imbaraga mu gukorera ibikorwa bibi bihungabanya uburenganzira bwa muntu abatavuga rumwe na yo.

ZIGAMA THEONESTE