RDB yerekanye uko ibikorerwa muri Afurika byakongera ubukungu

  • Imvaho Nshya
  • Kanama 16, 2023
  • Hashize amezi 9
Image

Umuyobozi Mukuru w’Urwego rw’Iterambere (RDB) Clare Akamanzi, umwe mu bitabiriye inama ‘Golden Business Forum’ irimo kubera i Kigali, yakomoje ku mahirwe ari mu gushyira imbaraga mu bikorerwa ku mugabane w’Afurika.

Avuga ko abikorera bagombye gutekereza n’ibyerekeranye uburyo bakwiteza imbere bashingiye ku guhanga udushya.

Ati : “Icyifuzo cyacu ni uko twagera kure. Ndatekereza ko guhanga imirimo n’udushya ari ibintu byiza cyane”.

Yavuze ko mu Rwanda hari ahantu ho gushakira imirimo.

Avuga ko abanyeshuri 300 biga muri Carnegie Mellon University, biga amashanyarazi, ikoranabuhanga n’ibindi. Abanyeshuri 80% bayirangijemo babona akazi ni mu gihe ngo 50% bo bahita babona akazi ugereranyije n’abarangije kwiga mu zindi kaminuza.

Aha ni ho ahera agira ati: “Tugomba gukora ibikorerwa muri Afurika ku buryo twiteza imbere”.

Avuga ko nko mu Rwanda mu kwezi k’Ukuboza hitezwe ko hazatangira uruganda rukora inkingo.

Yongeraho ko mu gihe haba hashyizweho uburyo bwo kongerera agaciro telefoni na za mudasobwa kandi bigakorerwa muri Afurika, ko ibyo nabyo byagira uruhare mu guteza imbere umugabane w’Afurika.

Agira ati: “Nituramuka dutahirije umugozi umwe tuziteza imbere ku buryo bwihuse”.

U Rwanda icyo rukora ni ugushyiraho ibikorwa remezo mu gushaka ibisubizo hagamijwe kongera ubukungu bwarwo.

Ku rundi ruhande agira ati: “Hari imikorere y’abikorera na Leta, mu ngendo zo mu kirere by’umwihariko hagati y’ubufatanye na Qatar na Guverinoma y’u Rwanda, gukorana na yo ni urundi rwego rushya rw’amahirwe.

Ikindi ni icyanya cyahariwe inganda cyitabirwa n’ibigo by’abikorera ku giti cyabo, namwe murabona ko hari ubwiyongere bw’ibigo by’abikorera. Ibyo tubikorera kugira ngo bashore imari mu Rwanda”.

Akamanzi, Umuyobozi Mukuru wa RDB, yavuze ko kubaka ibikorwa remezo byatumye ibicuruzwa abikorera bakuraga muri Tanzania bibatwaye ibyumweru bitanu, kuri ubu byihutishijwe.

Yashimye ko bimwe mu bikorerwa muri Afurika harimo n’Akabanga kugeza ubu kaboneka mu bihugu hafi ya byose muri Afurika, kakaba kambuka n’inyanja kakagera no ku yindi migabane.

Yanditswe na KAYITARE JEAN PAUL

  • Imvaho Nshya
  • Kanama 16, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE