Rayon Sports yatsinzwe na Gasogi United ibitego 2-1

  • SHEMA IVAN
  • Mutarama 12, 2024
  • Hashize amezi 5
Image

Ibitego bibiri bya Kabanda Serge byafashije Gasogi United gutsinda Rayon Sports ibitego 2-1 mu mukino w’umunsi wa 16 wa shampiyona.

Uyu mukino wabaye ku mugoroba wo kuri uyu wa Gatanu tariki 12 Mutarama 2024, kuri Kigali Pele Stadium.

Gasogi United yatangiye umukino isatira cyane, gusa ntibashe kubona uburyo bw’igitego bufatika, ku munota wa 19 Gasogi United yahushije uburyo bwabazwe, ku mupira wari utakajwe na Kalisa Rashidi, Malipangu awuha Kabanda Serge awuteye mu izamu akubita igiti cy’izamu.

Rayon Sports yahise isubiza kuri koroneri yatewe neza na Muhire Kevin, ariko Kalisa Rashid awuteye n’umutwe ujya hanze y’izamu.

Gasogi United yarushaga cyane Rayon Sports yakomeje kubona uburyo bukomeye  ari nako ikipe ya Rayon Sports, ikomeza gukora amakosa menshi mu bwugarizi bwayo.

Ku munota wa 29 Gasogi United yafunguye amazamu, ku mupira wazamukanywe na Mudeyi Akbar, awuhindura neza imbere y’izamu, Kabanda Serge awushyira mu rushundura.

Ku munota wa 35′ Gasogi United yongeye kugerageza uburyo bwo gutsinda igitego cya kabiri ariko umuzamu Hategekina Bonheur awukuramo.

Mbere y’uko igice cya mbere kirangira ku munota wa 44 Gasogi United yongeye kubona uburyo bwiza ariko Bonheur ababera ibamba awushyira hanze.

Igice cya mbere cyarangiye Gasogi United itsinze Rayon Sports igitego 1-0.

Mu gice cya kabiri Rayon Sports yatangiranye impinduka eshatu mu bakinnyi havamo Aimamble Nsabimana, Rashid Kalisa na Paul Alon Gomis hinjiramo Isaac Mitima, Héritier Luvumbu na Alsény Camara Agogo.

Ku munota wa 59′ ikipe ya Rayon Sports yongeye gukora amakosa mu bwugarizi, maze Kabanda Serge yongera kubona uburyo, atsinda igitego cya 2 cya Gasogi United ku mupira mwiza yahawe na Mugisha Rama Joseph.

Mu minota icumi ya nyuma Rayon Sports yakomeje gusatira cyane ishaka uko yishyura ariko uburyo yabonaga ntibwabyajwe umusaruro uko bikwiye.

Mu minota 6 y’inyongera Rayon Sports yabonye igitego ku munota wa 4 cyatsizwe na Héritier Luvumbu kuri ‘coup franc’.

Umukino warangiye Gasogi United itsinze Rayon Sports ibitego 2-1 mu mukino wa mbere w’umunsi wa 16 wa shampiyona.

Gasogi United yaherukaga gutsinda Rayon Sports muri shampiyona ku itariki 23 Ukuboza 2022, icyo gihe yatsinze igitego 1-0.

Gasogi United yahise igira amanota 21 ifata umwanya wa karindwi mu gihe Rayon Sports yagumye ku mwanya wa kane n’amanota 27.

Rayon Sports kandi yujuje imikino itatu nta ntsinzi muri shampiyona, iheruka gutsinda tariki 6 Ukuboza 2023 itsinda Muhazi United ibitego 2-0.

Indi mikino y’Umunsi wa 16 wa Shampiyona iteganyijwe

Ku wa Gatandatu, tariki ya 13 Mutarama 2024

Bugesera FC izakira AS Kigali

Musanze FC izakira Etoile de l’Est

Mukura VS izakira Amagaju FC

Gorilla FC izakira Etincelles

Ku Cyumweru, tariki 14 Mutarama 2024

Sunrise FC izakira Police FC

Muhazi United izakira Kiyovu Sports

APR FC yagombaga kwakira  Marines FC ariko umukino wagizwe Ikirarane bitewe nuko iyi kipe yari mu irushanwa rya Mapinduzi ryaberega muri Zanzibar.

  • SHEMA IVAN
  • Mutarama 12, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE