Rayon Sports yatsinze Police FC mu mukino w’ikirarane

  • SHEMA IVAN
  • Ugushyingo 28, 2023
  • Hashize amezi 3
Image

Ikipe ya Rayon Sports yatsinze police FC ibitego bibiri kuri kimwe mu mukino w’ikirarane w’umunsi wa gatanu utarabereye igihe kubera ko Rayon Sports yari mu mikino ya CAF Confederations Cup.

Uyu mukino wabaye kuri uyu wa Kabiri tariki 28 Ugushyingo 2023, kuri Kigali Pele Stadium.

Saa cyenda zuzuye ni bwo umusifuzi Ngabonziza Jean Paul yatangije umukino hagati y’impande zombi.

Mu mukino uryoheye ijisho amakipe yatangiye asatirana ku mpande zombi.

Ku munota wa 8′ Rayon Sport yafunguye amazamu ku igitego cya mbere cyatsinzwe na Musaa Esenu, nyuma y’uburangare bw’umuzamu Rukundo Onesme wasohotse nabi.

Ku munota wa 17′, Police FC yabonye amahirwe yo kwishyura igitego ku mupira watakajwe na Rayon Sports, Muhadjiri awuteye ukubita igiti cy’izamu ujya hanze.

Muri iyi minota Police FC yakomeje gusatira cyane ishaka igitego cyo kwishyura harimo na Coup Franc yabonye ku munota wa 29, ku ikosa  Nshuti Savio yakorewe na Muhire Kevin inyuma y’urubuga rw’amahina,  Ndahiro Derrick, yateye umupira ufatwa neza n’umuzamu Simon Tamale.

Ku munota wa 37, Umusifuzi Ngabonziza yafashe icyemezo cyo guhagarika umukino kubera imvura nyinshi yagwaga i Nyamirambo.

Umukino wongeye gusubukurwa ku munota wa 37′ nyuma yaho imvura yari imaze guhita.  Mbere y’uko igice cya mbere kirangira, umusifuzi wa kane yongeyeho iminota ine.

Muri iyi minota Police FC yasatiriye cyane izamu rya Rayon Sport harimo umupira Muhadjiri yateye atunguye umuzamu wa Rayon Sport ariko ufata igiti cy’izamu.

Igice cya mbere cyarangiye Police FC itsinzwe na Rayon sports igitego 1-0.

Mu gice cya kabiri Rayon Sport yatangiranye impinduka havamo Kanamugire Roger asimburwa na Kalisa Rachid.

Ku munota wa 57′ Rayon Sports Ojera yaguye mu rubuga rw’amahina ku mupira akuweho na Kwitonda Ally, umusifuzi yemeza ko ari koruneri mu gihe abakinnyi ba Rayon Sports basabaga Penaliti.

Ku munota wa 89′ yabonye igitego cya kabiri cyatsinzwe Luvumbu ku mupira mwiza yahawe na Musa Esenu, acenga Kwitonda, ahita aroba umunyezamu Rukundo Onesme.

Mbere yo kurangiza umukino umusifuzi wa kane yongeyeho iminota ine.

Ku munota wa 90+2′ Police FC yabonye igitego cyatsizwe na Bigirima Abedi ku mupira yahawe na Hakizimana Muhadjiri, ashyiraho umutwe, uruhukira mu nshundura.

Umukino warangiye Rayon Sports itsinze Police FC Ibitego 2-1.

Rayon Sport yahise igira amanota 20 ifata umwanya wa Kane, mu gihe Police FC yagumye ku mwanya wa gatatu n’amanota 22.

Kuri uyu wa Gatatu hari undi mukino w’ikirarane w’umunsi wa gatanu uzahuza Sunrise FC na APR FC kuri Sitade ya Nyagatare saa cyenda.

  • SHEMA IVAN
  • Ugushyingo 28, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE