Rayon Sports yasinyishije Umunyezamu ukomoka muri Sénégal

  • SHEMA IVAN
  • Mutarama 9, 2024
  • Hashize amezi 2
Image

Ikipe ya Rayon Sports yasinyishije umunyezamu Khadime Ndiaye ukomoka muri Sénégal,  amasezerano y’amezi atandatu kugeza umu mwaka w’imikino wa 2023-2024 urangiye.

Aya masezerano yashyizweho umukono kuri uyu wa Kabiri tariki 9 Mutarama 2024 nyuma y’aho uyu mukinnyi ageze mu Rwanda mu gitondo cy’uyu munsi.

Uyu mukinnyi yakiniraga Guédiawaye FC yo mu cyikiro cya mbere muri Senegal, ubu iri ku mwanya wa gatanu muri shampiyona aho ifite amanota 16 mu mikino 11 imaze gukina.

Ndiaye wakiniye Ikipe y’Igihugu ya Sénégal y’Abatarangeje imyaka 20, yasinyiye Gikundiro nk’umusimbura wa Hakizimana Adolphe uheruka gutandukana n’iyi kipe akajya muri AS Kigali.

Uyu mukinnyi wo muri Sénégal agomba guhatanira umwanya na Simon Tamale usanzwe ari nimero ya mbere ndetse na Hategekimana Bonheur.

Uyu mukinnyi abaye umukinnyi wa gatatu werekeje muri Rayon Sports mu isoko ryo muri Mutarama, nyuma ya Alsény Camara Agogo na Alon Paul Gomis bombi bakina bataha izamu.

Rayon Sports ikomeje kwitegura imikino yo kwishyura muri shampiyona izatangira yakira Gasogi United ku wa Gatanu tariki 12 Mutarama 2024, kuri Kigali Pele Stadium.

Iyi kipe yasoje imikino ibanza ya shampiyona iri ku mwanya wa Kane n’amanota 27.

  • SHEMA IVAN
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE