Rayon Sports yanganyije na Kiyovu Sports

  • SHEMA IVAN
  • Ukuboza 12, 2023
  • Hashize amezi 6
Image

Rayon Sports yanganyije na Kiyovu Sports igitego kimwe kuri kimwe mu mukino w’umunsi wa 15 wa shampiyona, yuzuza imyaka ine idatsinda Kiyovu Sports muri shampiyona.

Uyu mukino wabaye ku mugoroba wo kuri uyu wa Kabiri tariki 12 Ukuboza 2023, kuri Kigali Pele Stadium.

Amakipe yatangiye asatirana ku mpande zombi ariko Kiyovu Sports ikiharira umupira cyane.

Ku munota wa 12 Kiyovu Sports yafunguye amazamu ku gitego cyatsinzwe na Sheriff Bayo ku mupira mwiza wahinduwe na Kilongozi Richard  mu rubuga rw’amahina, Bugingo Hakim awukuraho nabi usanga Sheriff Bayo wenyine ahita atera  ishoti rikomeye rijya mu nguni y’izamu rya Simon Tamale.

Kiyovu Sports yarushakaga cyane Rayon sports muri iyi minota yabonye amahirwe yo gutsinda igitego cya kabiri kuri Coup-Franc ku ikosa Charles Bbaale yakoreye Tansele Mosengo hafi y’urubuga rw’amahina, rihanwe na Kilongozi Richard, umupira uca ku ruhande rw’izamu.

Ku munota wa 26 yabonye amahirwe yo gutsinda igitego cyo kwishyura ku mupira mwiza Bugingo Hakim yahinduye mu rubuga rw’amahina, Ojera Joackiam abanza kuwufunga, ateye ishoti ryo hasi rijya ku ruhande rw’izamu.

Mbere y’uko igice cya mbere kirangira Rayon Sports yongeye kubona andi mahirwe yo gutsinda igitego ku mupira Luvumbu yahinduye mu izamu, Nzeyurwanda agorwa no kuwufata ariko atuma Esenu atawutsinda, ujya mu rundi ruhande.

Igice cya mbere cyarangiye Kiyovu Sports iyoboye umukino n’igitego kimwe ku busa cya Sheriff Bayo.

Mu gice cya kabiri Kiyovu Sports yaje ishaka igitego cya kabiri ari na ko Rayon Sports ishaka igitego cyo kwishyura.

Ku munota wa 49 Mosengo Tansele wa Kiyovu Sports yahawe umupira ari muri metero nka 30, arahindukira atera ishoti rikomeye, Umunyezamu Tamale Simon awushyira muri koruneri.

Ku munota wa 65 yabonye uburyo bwo gutsinda igitego  ku mupira mwiza Luvumbu yateye, umuzamu Nzeyurwanda Djihad arasimbuka awukoraho, awushyira muri koruneri.

Mu minota icumi ya nyuma y’umukino Rayon Sports yasatiriye cyane izamu rya Kiyovu Sports yakiriniraga inyuma cyane.

Ku munota wa 87 Rayon Sports yabonye igitego cyo kwishyura cyatsizwe na Ngendahimana Eric n’umutwe ku mupira mwiza wahinduwe na Joackiam Ojera.

Mbere y’uko umukino urangira Rayon Sports yabonye amahirwe yo gutsinda igitego cy’itsinzi ku mupira Ojera yahinduye mu rubuga rw’amahina, Luvumbu awukozeho urengera ku ruhande nyamara yarebanaga n’izamu.

Umukino warangiye Rayon Sports inganyije na Kiyovu Sports igitego kimwe kuri kimwe yuzuza imyaka ine idatsinda Kiyovu Sports muri Shampiyona.

Rayon Sports yahise igira  amanota 27 isoza imikino ibanza ku mwanya wa kane, naho Kiyovu Sports isoza imikino ibanza ifite amanota 21 ku mwanya wa gatandatu.

Indi mikino yabaye uyu munsi

Bugesera 2-0 Etoile de l’Est

Marines 1-1 Sunrise FC

Mukura VS 0-1 Gorilla

Muhazi United 0-0 AS Kigali

Police FC 3-0 Musanze FC

Ku wa Gatatu tariki 13 Ukuboza 2023

Etincelles izakira Gasogi United saa cyenda kuri Stade umuganda.

  • SHEMA IVAN
  • Ukuboza 12, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE