RAB ishishikariza abahinzi gukoresha ifumbire y’imborera ivanze n’iy’imvaruganda

  • ZIGAMA THEONESTE
  • Ukuboza 14, 2023
  • Hashize amezi 3
Image

Ikigo cy’Igihugu cy’Iterambere ry’Ubuhinzi n’Ubworozi (RAB) kirashishikariza abahinzi ko mu gihe cyo gufumbira ubutaka bajya bakoresha ifumbire mvaruganda bakayivanga n’imborera kuko ari byo bitanga umusaruro kurushaho.

Umuyobozi Mukuru wa RAB Dr Ndabamenye Telesphore yagaragaje ko ubutaka bw’u Rwanda kimwe n’ibindi bihugu mu karere ruherereyemo bugikeneye ko havangwamo imborera kuko busa n’ubwashaje.

Yagize ati: “Buriya ibihingwa dukenera kenshi, biracyakenera imyungungugu ituma bikura vuba, ukurikije rero uko ubutaka bwacu bwashaje hari aho usanga mu bindi bihugu bugifite imyunyungugu myinshi”.

Yakomeje agira ati: “Ariko urebye ubutaka bwacu ndetse no mu bihugu byo muri Afurika y’Iburasuzuba byose ni ubutaka bwatangiye gusaza”.

Mu mpamvu RAB itangaza zitera kugabanyuka kw’imyunyungugu mu butaka harimo kuba yatwarwa n’isuri, cyangwa kuba irimo idahagije bigasaba kongeramo indi hakoreshejwe ifumbire.

Dr Ndabamenye kandi agaragaza ko gukoresha ifumbire y’imborera bifasha ubutaka kongera imyunyungungu.

Ati: “Iyo mborera rero tuvuga akamaro kayo, iyo twakoresheje n’imvaruganda tuyishyiramo na yo kugira ngo byunganirane. Ubushakashatsi bwagiye bukorwa bwagaragaje ko aho babivanze bikora neza”.

RAB ihamya ko ari byiza kuvanga ifumbire zombi kugira ngo bitume igihingwa kibona imyunyu ngugu, kandi ni ibyihutirwa kugira ngo ubutaka bumere neza na byo biboneke.

Dr Ndabamenye yagize ati: “Buriya ikintu ifumbire y’imborera ikora mu butuka ni ugutuma bugarura umwimerere wabwo. Iyo bugaruye umwimerere wabo hari byinshi bukora hazamo ibinyabuzima, ibyo binyabuzima biri mu butaka bifite akamaro kanini mu gutuma igihingwa kimera neza”.

RAB ikangurira abahinzi kujya bavanga ifumbire y’imborera n’Imvaruganda kandi bakabikora mu ngando nyayo kugira ngo bitanga umusaruro kurushaho.

Raporo yo muri 2022 y’ikigo gikora ubushakashatsi ku buhinzi n’ubworozi mu Rwanda (RCID), igaragaza ko abahinzi badakoresha ifumbire y’imborera uko bikwiye, kandi nyamara ngo guhinga ukeza bisaba kuvanga ifumbire y’imborera, imvaruganda no gukoresha imiti yica udukoko.

Hagati aho ariko abahinzi ndetse n’abashakashatsi mu by’ubuhinzi bagaragaza ko hakenewe ubumenyi buhagije, ku gukoresha ifumbire cyane cyane iy’imborera mu myaka, kuko igira uruhare mu kongera umusaruro w’ubuhinzi.

  • ZIGAMA THEONESTE
  • Ukuboza 14, 2023
  • Hashize amezi 3
TANGA IGITEKEREZO
Erneste says:
Ukuboza 18, 2023 at 3:38 pm

Nibyo rwose Doctor.

Andika igitekerezo

AMATEGEKO AGENGA IYANDIKA RY'IGITEKEREZO CYAWE