Pyramids FC yo Misiri yegukanye CAF Champions League ku nshuro ya mbere mu mateka, nyuma yo gutsinda Mamelodi Sundowns yo muri Afurika y’Epfo ibitego 3-2 mu mikino yombi.
Uyu mukino wa nyuma wo kwishyura wabaye ku mugoroba wo ku Cyumweru, tariki ya 1 Kamena 2025 i Cairo Misiri.
Iyi kipe yo mu Misiri yawugiyemo ihabwa amahirwe kuko ubanza amakipe yombi yanganyije igitego 1-1, bityo itegeko ry’igitego cyo hanze ryashobora kuyirengera.
Pyramids yatangiye umukimo neza isatira bikomeye ariko itabasha kureba mu izamu.
Ku munota wa 23, Mohamed Sharaf Eldin yahinduye umupira imbere y’izamu, Teboho Mokoena ntiyawuhamya neza usanga Fiston Mayele atera ishoti atsinda igitego cya mbere.
Igice cya mbere cyarangiye Pyramids FC yatsinze Mamelodi Sundowns igitego 1-0.
Ikipe yo mu Misiri yakomeje gukina neza no mu gice cya kabiri, ikomeza gusatira ishaka igitego cya kabiri .
Ku munota wa 56, Waldi Elkarti yateye coup franc nziza umupira usanga Ahmed Samy akina n’umutwe atsinda igitego cya kabiri.
Mu minota 70, Mamelodi yatangiye gusatira bikomeye ishaka uko yakwishyura ibitego byari kuyifasha kwegukana igikombe kubera gutsindira hanze ibitego byinshi.
Bidatinze ku munota wa 75, Iqraam Raynes yishyuye igitego cya mbere ku burangare bw’ab’inyuma ba Pyramids.
Iyi kipe yo muri Afurika y’Epfo yakomeje gusatira cyane ariko umunyezamu Ahmed Naser Elshenawi ayibera ibamba kuko yakuragamo imipira myinshi.
Umukino warangiye Pyramids FC yatsinze Mamelodi Sundowns ibitego 3-2 mu mikino yombi, yegukana CAF Champions League ku nshuro ya mbere mu mateka.
Yabaye ikipe ya kane yo mu Misiri yegukanye iri rushanwa.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE