Politiki yo kurwanya ruswa imaze imyaka 10 yasabiwe kuvugururwa

  • Imvaho Nshya
  • Mata 20, 2022
  • Hashize imyaka 2
Image

Abadepite basabye inzego zibishinzwe kuvugurura Politiki yo kurwanya ruswa yo mu mwaka wa 2012, ibi bakaba babisabye bashingiye ku bibazo bikigaragara byakiriwe n’Urwego rw’Umuvunyi mu mwaka wa 2020/2021.

Iyi Politiki y’Igihugu yo kurwanya ruswa yo mu mwaka wa kabiri yashyizweho ihagarariye ukwiyemeza k’u Rwanda mu rugendo rwo kugera ku cyerekezo 2020 cyo kugera ku miyoborere myiza binyuze mu gukumira no kurwanya ruswa.

Ni Politiki yibanda cyane ku iterambere rya muntu, Inzego n’imiryango, no kubaka umuco aho ubudahemuka n’ubunyangamugayo bihabwa agaciro bikwiye ndetse na ruswa ikwangwa urunuka. Ni Politiki yashyiriweho gushyigikira iterambere ry’Igihugu rirambye, abaturage bakagira ubuzima burushijeho kuba bwiza, igihugu kikubaka ubukungu buhamye ndetse inzego za Leta z’izabikorera zigatanga serivisi zinoze.

Ubwo Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu mu Nteko Ishinga Amategeko, Umutwe w’Abadepite, yagezaga ku Nteko Rusange raporo ku isesengura rya raporo y’Urwego rw’Umuvunyi y’umwaka wa 2020/2021, abagize Inteko Ishinga Amategeko bagaragaje ko hakiri ibibazo byinshi bibangamiye abaturage mu bijyanye n’akarengane na ruswa, bityo hakwiye gushyirwamo imbaraga kugira ngo bikemuke.

Depite Mukabalisa Germaine yagize ati: “Twabonye muri raporo ko hari ibibazo by’abaturage batarishyurwa bubatse amashuri, bikagaraga ko amafaranga yari gutangwa mu ngengo y’imari ikurikiyeho ibi ni ibintu bibaje cyane kuko no mu ngendo twakoze, aho nagiye muri Burera twabonye abaturage batabonye amafaranga yabo kandi amashuri amaze igihe yigirwamo.”

Depite Frank Habineza: “Reka mbabaze iki gihano cyatanzwe cyo kugawa niba ari icyo gikwiye, kuko niba uyu muco wo kutamenyekanisha umutungo uhaniwe kugawa gusa n’abandi bajya babikora bakagawa gusa ntibyaba ari byiza kandi tubizi ko hashobora kuvamo ibyaha bya ruswa n’ibindi birenze.

Banahereye kuri ibi, iyi komisiyo yasanze ibyakozwe n’Urwego rw’Umuvunyi muri uwo mwaka biri ku rwego rushimishije ariko basanga mu byashyirwamo imbaraga harimo kurwanya ruswa mu kazi ndetse no mu Nzego zibanze, ibi bakabishingira ku kuba kugeza ubu imibare yuru rwego igaragaza ko ruswa mu kazi iri ku ku kigero cya 37,7% no mu nzego z’ibanze ikaba mu kigero cya 27,9%, nkuko bisobanurwa na Mukamana Elisabeth vice Perezida wa komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu ari na yo yakoze iri sesengura.

Ati: “Ku bijyanye n’akazi no mu Nzego z’ibanze haracyagaragara ruswa nubwo ari nkeya rero ntidushobora guceceka, turasaba ko biganirwaho bigakosorwa ku buryo bugaragara.”

Mu kuvugutira umuti ibibazo bikidindiza urugamba rwo kurwanya ruswa n’akarengane, abagize Inteko Ishinga Amategeko basabye inzego zibishinzwe zirimo na Minisiteri y’Ubutabera kuvugurura Politiki yo kurwanya ruswa.

Urwego rw’Umuvunyi rugaragaza ko mu mwaka wa 2020/2021 rwakiriye ibibazo 852 birimo ibibazo 408 byakiriwe mu nyandiko n’ibibazo 444 byakiriwe muri gahunda yo gukumira no kurwanya akarengane na ruswa.

Kugera mu mpera za Kamena 2021, ibibazo 449 byari byarakemutse, ibibazo 377 byoherezwa mu nzego bireba kugira ngo zibikemure, naho 26 byari bitarasesengurwa.

Ibyinshi mu bibazo byakiriwe birebana n’ubutaka, bikaba bingana na 36.5%. Ibindi bibazo byiganje ni ibifitanye isano no kwimura abantu kubera impamvu z’inyungu rusange biri ku ijanisha rya 12%.

Mu gusesengura imanza zisabirwa gusubirishwamo ku mpamvu z’akarengane, Urwego rw’Umuvunyi rwasesenguye imanza 343 kuri 361 zakiriwe muri 2020-2021 zisabirwa gusubirwamo ku mpamvu z’akarengane.

Muri zo, imanza 42 (12.2%) ni zo Urwego rw’Umuvunyi rwabonyemo akarengane ruzisabira gusubirwamo ku mpamvu z’akarengane naho mu manza 301 (87.8%) nta karengane kagaragayemo.

© RBA

  • Imvaho Nshya
  • Mata 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE