Polisi yasabye abarangije amahugurwa yo gucunga umutekano gukora kinyamwuga

  • KAYITARE JEAN PAUL
  • Mutarama 25, 2024
  • Hashize amezi 4
Image

CP John Bosco Kabera, Komiseri wa Polisi ushinzwe umutekano w’ibikorwa remezo n’ibigo byigenga bicunga umutekano, yasabye abarangije amahugurwa muri kampani ya Top Sec kurangwa n’imyitwarire myiza aho bagiye gukorera.

Yabigarutseho mu gitondo cyo kuri uyu wa Kane tariki 25 Mutarama 2024, ubwo inkumi n’abasore 112 barangizaga amahugurwa amaze amezi Atatu.

Yaberaga mu ishuri ry’amahugurwa rya Top Sec mu Murenge wa Nyarugunga mu Karere ka Kicukiro mu Mujyi wa Kigali.

Yitabiriwe n’ubuyobozi bwa Kampani Top Sec, abarimu ndetse n’abakozi ba Top Sec.

CP Kabera yabasabye kurinda iby’abandi no guhora bihugura kuko ngo kwihugura ari uguhozaho.

Ati “Tuzakomeza gukorana n’ibigo byanyu kugira ngo abantu bakomeze bahugurwe ndetse n’abakozi bakomeze gukora neza”.

Yasabye abarangije amasomo yo gucunga umutekano abo baha serivisi bakwiye kubabona nk’abantu bigishijwe kinyamwuga.

Ku rundi ruhande, CP Kabera yababwiye kujya batanga amakuru kuri polisi iri hafi y’aho bakorera.

Akomeza agira ati “Mugomba kwakira ababagana mubabwira neza ariko mwubahiriza gahunda (Protocoles) z’uko binjira n’uko basohoka”.

Basabwe kandi guhora bari maso no kureba icyahungabanya umutekano w’aho bakorera.

Tuyishime Gad Samuel avuga ko yahisemo kwitabira amahugurwa ya Top Sec agamije gutanga umusanzu we mu kubaka igihugu, atanga serivisi zo gucunga umutekano mu kigo akorera.

Amasomo yize avuga ko agiye kumufasha mu buryo bwo kwirinda ndetse no kubana na bagenzi be.

Ati “Mu masomo nize harimo gutanga serivisi ndetse no gutahura ibisasu.

Hari amoko menshi y’ibisasu twize tutari tuzi ariko ubu twagiye tuyamenya. Nk’ubu umuntu ashobora kukuzanira agacupa k’amazi ukagira ngo ni amazi naho ni igisasu”.

Uwiringiyimana Charlotte ukomoka mu Karere ka Rutsiro mu Murenge wa Gihango, yarangije amashuri yisumbuye mu ishami ry’Amateka, Ubukungu n’Ubumenyi bw’Isi ariko ntiyahita abona akazi.

Yishimiye ko yamaze kuba umukozi wa Top Sec.

Agaragaza ko hari ibyiza yakuye mu mahugurwa amazemo iminsi.

Ati “Hano nahakuye ubumenyi butandukanye, uburyo nakwirwanaho ndi mu kazi kandi nta bikoresho mfite”.

Mu yandi masomo yize, ni ajyanye no gukunda igihugu n’uko yagiteza imbere, kurwanya inkongi y’umuriro n’uburyo yayikumira.

Aya masomo ngo azamufasha mu buzima bwe bwose.

Ati “Amasomo mvanye hano azamfasha mu buzima bwanjye, niteze imbere nanateza imbere kampani yanyakiriye, nteze imbere n’igihugu cyanjye.

Nkurikije uko banyigishije mu mahugurwa mazemo amezi atatu, nzabikora neza cyane nshingiye ku bumenyi bampaye”.

Ashishikariza abakobwa bagenzi be gutinyuka bakaza gukora umwuga wo gucunga umutekano.

Nyamurangwa Fred, umwe mu bagize inama y’ubutegetsi ya Top Sec, avuga ko ibigo bicunga umutekano muri iki gihe ari ibigo bikiyubaka mu rwego rwa kinyamwuga.

Yavuze ko kurinda umutekano w’abanyarwanda bisaba ubufatanye n’inzego zose z’umutekano.

Ati “Kurinda abanyarwanda n’ibyabo ni ugufatanya n’izindi nzego z’umutekano zishinzwe kurinda igihugu cyacu”.

Mbabazi Mathias, Umuyobozi Mukuru wa Top Sec, yavuze ko kampani ibonye amaraso mashya agiye mu kazi.

Yabwiye itangazamakuru ko bafite gahunda yo guhugura abasanzwe mu kazi.

Yavuze ko abagiye mu kazi bahawe amasomo abafasha kurangiza neza inshingano zabo, kwizigamira no kubana n’abandi.

Abarangije amahugurwa batangiye ari 129, harangiza 112 habariwemo 86 b’igitsinagore. Abari mu kazi hanze babarirwa mu 3,500.

Bahawe amasomo abafasha kwirwanaho mu gihe basagariwe mu kazi kabo
Mbabazi Mathias, Umuyobozi Mukuru wa Top Sec atanga Certificate ku musore witwaye neza mu masomo yo gucunga umutekano
Nyamurangwa Fred, umwe mu bagize inama y’ubutegetsi ya Top Sec
CP John Bosco Kabera, Komiseri wa Polisi ushinzwe umutekano w’ibikorwa remezo n’ibigo byigenga bicunga umutekano

Amafoto: Irene

  • KAYITARE JEAN PAUL
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE