Police FC yegukanye igikombe cy’Intwari, imisifurire yongera kwikomwa 

  • SHEMA IVAN
  • Gashyantare 1, 2024
  • Hashize amezi 4
Image

Ibitego bibiri bya Peter Agblevor byafashije Police FC gutsinda APR FC Ibitego 2-1 mu mukino imisifurire itishimiwe, yegukana igikombe cy’Intwari ku nshuro ya mbere.

Uyu mukino wabereye kuri Kigali Pele Stadium ku mugoroba wo kuri uyu wa Kane tariki 1 Gashyantare 2024, mu kwisihiza Umunsi w’Intwari z’Igihugu ku nshuro ya 30.

Uyu mukino watangiye wihuta ku mpande zombi buri kipe igera ku izamu.

Ku munota wa karindwi APR FC yabonye uburyo bwo gutsinda igitego ku mupira Shaiboub yahaye Kwitonda Alain wawinjiranye, ashatse gukinana na Omborenga, Umunyezamu Rukundo arasohoka awukoraho.

Ku munota wa 12, APR FC yafunguye amazamu ku gitego cyatsinzwe na Nshimiyimana Yunussu n’umutwe, ku mupira wavuye ku ikosa ryahanwe na Ruboneka Bosco.

Nyuma yo gutsindwa igitego, Police FC yatangiye gusatira ishaka igitego cyo kwishyura.

Ku munota wa 17, Police FC yabonye amahirwe yo kwishyura ku mupira Nshimiyimana Yunusu yakuyemo  n’umutwe nyuma y’aho umunyezamu Pavelh Ndzila yari agonganye na Bigirimana Abeddy.

Ku munota wa 25, APR FC yabonye uburyo bwo gutsinda igitego kuri koruneri, umupira utewe usanga Pitchou usimbutse akawushyira ku mutwe, ugaruka kuri Niyigena Clement na we awutera agaramye, ku bw’amahirwe make ujya hejuru y’izamu.

Ku munota wa 43 Police FC na yo yongeye kubona andi mahirwe yo gutsinda igitego cyo kwishyura ku mupira Hakizimana Muhadjiri yahawe ari mu rubuga rw’amahina, ateye ishoti rikurwamo na Pavelh Ndzila wirambuye, ujya ku ruhande mbere yo kurenzwa na bagenzi be.

Mbere y’uko igice cya mbere kirangira Police FC yabonye amahirwe meza cyane ku ishoti rikomeye Nsabimana Eric Zidane yateye, umunyezamu Ndzila agorwa no kurifata mbere yo kwiyongeza inshuro ebyiri ndetse bamwe mu bafana bari bahagurutse bagaragaza ko warenze umurongo.

Igice cya mbere cyarangiye APR FC itsinze Police FC igitego 1-0 cya Nshimiyimana Yunusu

Mu gice cya kabiri Police FC yatangiye isatira izamu rya APR FC ari na ko na yo ishaka igitego cy’itsinzi.

Ku munota wa 53, APR FC yabonye uburyo bwo gutsinda igitego cya kabiri ku mupira Ruboneka yinjiranye mu rubuga rw’amahina, awuhaye Bacca akinanye na Shaiboub wari uwa nyuma, ateye ishoti rikomeye rijya hejuru y’izamu.

APR FC yakinaga neza muri iyo minota Yongeye kubona andi mahirwe yo gutsinda igitego ku mupira mwiza Omborenga Fitina yahinduye usanga Pitchou ateye ishoti, Umunyezamu Rukundo Onesime arasimbuka, awushyira muri koruneri.

Ku munota wa 71 , APR FC yahushije igitego cyabazwe ku mupira mwiza Omborenga Fitina yahinduye umupira mu rubuga rw’amahina, Ruboneka Bosco awufunze ahita awukurwaho na Djibrine Akuki.

Nyuma yo gushaka ubwo buryo ku munota wa 75 Peter Agblevor yishyuriye Police FC ku mupira muremure yatsindishije umutwe wavuye kuri Akuki.

Iminota 10 ya nyuma y’umukino yihariwe cyane n’ikipe ya Police FC yasatiraga izamu rya APR FC ariko ba myugariro bihagararaho.

Ku munota wa 90+1 police FC yatsinze igitego cya kabiri ku mupira yahawe na Bigirima Abeddy ariko abakinnyi ba APR FC ntibabyumva nyuma y’uko Pitchou yasaga n’ukorewe ikosa.

Iki gitego cyateje impagarara kubera ko umusifuzi wo ku ruhande, Mugabo Eric, yari yerekanye ko APR FC ari yo igomba kurengura.

Nyuma yo kutishimira ibyemezo by’abasifuzi abakinnyi ba APR FC bagarutse mu kibuga.

Umukino warangiye Police FC itsinze APR FC Ibitego 2-1 yegukana igikombe cy’Intwari ku nshuro ya mbere, ihabwa miliyoni 6 z’amafaranga y’u Rwanda naho APR FC ihabwa miliyoni 3 Frw.

Police FC yaheruka igikombe mu mwaka wa 2015 itwara igikombe cy’Amahoro.

Mu bagore igikombe cy’Intwari cyegukanywe na AS Kigali WFC itsinze Rayon sports WFC igitego 1-0 cyatsinzwe na Ukwinkunda Jeannette ku munota wa 61.

AS Kigali yahawe miliyoni 4 z’amafaranga y’u Rwanda, naho Rayon Sports ihabwa miliyoni 2 Frw.

  • SHEMA IVAN
  • Gashyantare 1, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE