Police FC yasinyishije rutahizamu Peter Agblevor

Rutahizamu Peter Agblevor ukomoka muri Ghana wakiniraga Musanze FC yaguzwe na Police FC asinya amasezerano y’umwaka umwe n’igice.

Uyu Munya Ghana yasinye amasezerano ku mugoroba wo ku wa Kane, tariki 28 Ukuboza 2023.

Umunyamabanga Mukuru wa Police FC, CIP Umutoni Claudette yahamirije Imvaho Nshya ko uyu rutahizamu yamaze kwerekeza muri iyi kipe.

Yagizwe ati: “Yasinye amasezerano y’umwaka n’igice. Nta wundi mukinnyi tuzongeramo.”

Uyu rutahizamu yaguzwe amafaranga y’u Rwanda miliyoni 10 nkuko byari mu masezerano ye ndetse biteganyijwe kuri uyu wa Gatanu ari bwo asezera kuri bagenzi be bakinanaga muri Musanze FC yagezemo mu mpeshyi ya 2022 avuye muri Etoile de l’Est.

Peter Agbrevor yasoje igice kibanza cya shampiyona atsinze ibitego icyenda.

Police FC yasoje imikino ibanza ya shampiyona iri ku mwanya wa kabiri n’amanota 31 irushwa amanota 2 na APR FC iyoboye urutonde rw’agateganyo.

Police FC izasubukura imikino yo kwishyura muri shampiyona yakirwa na Sunrise FC tariki 14 Mutarama 2024 kuri Stade ya Nyagatare.