Pires na Parlor ba Arsenal, bishimiye ibihe byiza bagize mu Rwanda

  • Sedar Sagamba
  • Gashyantare 8, 2022
  • Hashize imyaka 2
Image

Ibyamamare byakanyujijeho mu ikipe ya Arsenal FC Robert Emmanuel Pires na Ray Parlour bari mu Rwanda guhera taliki ya 6 Gashyantare 2022, aho bakomeje kuryoherwa n’ibyiza bitanze u Rwanda mu bukangurambaga bwa “Visit Rwanda” (Sura u Rwanda) Igihugu gifatanyijemo n’iyo kipe yo m Bwongereza.

Pires na Parlour, bombi byafite imyaka 48 y’amavuko, bakiniye Ikipe y’Arsenal igihe kinini. Ku Cyumweru ni bwo batangiye urugendo bazenguruka ibice bitandukanye by’ubukerarugendo n’ibyiza nyaburanga birimo Pariki y’Igihugu ya Nyungwe aho bagendeye no ku nzira yo mu kirere (canopy).

Mu bindi bice basuye harimo inkengero z’ikiyega cya Kivu mu Burengerazuba bw’u Rwanda n’ahandi, byose bikaba birimo gukorwa u bufatanye bw’u Rwanda n’Ikipe y’Arsenal mu bukangurambaga bwa Visit Rwanda, no kuzenguruka Igihugu bareba ibyiza nyaburanga u Rwanda rwihariye.

Ku munsi wa mbere bivugwa ko basuye Periki y’Igihugu ya Nyungwe, bagenda ku nzira yo mu Kirere aho barebaga ibyiza byose bitatse Pariki n’Ikirere cyose cy’amajyepfo y’u Rwanda.

Parlour yifashishije imbuga nkoranyambaga, yasangije amafoto atandukanye abakabakaba ibihumbi 500 bamukurikira, ndetse anifashishwa n’ibitangazamakuru bitandukanye byo mu Rwanda no mu mahanga byanditse ku ruzinduko rw’ibyo byamamare muri ruhago mu Rwanda.

Parlour na Pires ni bamwe mu bari bagize ikipe ikomeye y’Arsenal yatozwaga na Arsene Wenger yanditse amateka yo gutwara igikombe cy’amarushanwa ya Premier League idatsinzwe na rimwe mu mwaka wa 2004.

Ibyo bihangage kuri ubu biri mu Rwanda, bikaba biteganyijwe ko bizahura n’itangazamakuru ryo mu Rwanda n’iryo ku rwego mpuzamahanga kuri uyu wa Gatatu taliki ya 9 Gashyantare, mu muhango bazahuriramo n’inzego zitandukanye bagasuhuzanya ndetse bakanatanga amakuru arambuye ku bihe byiza bagiriye mu Rwanda.

Baje mu Rwanda bakurikiye ibindi byamamare by’abakinnyi b’Arsenal basuye u Rwanda mu bihe bitandukanye barimo David Luiz uheruka mu mpera z’umwaka wa 2019.

  • Sedar Sagamba
  • Gashyantare 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE