Perezida Mnangagwa yafunguye inama y’abacuruzi b’u Rwanda na Zimbabwe

  • NTAWITONDA JEAN CLAUDE
  • Werurwe 28, 2022
  • Hashize imyaka 2
Image

Guhera kuri uyu wa 28 kugeza ku ya 31 Werurwe 2022, i Harare mu Murwa Mukuru wa Zimbabwe harimo kubera inama yo ku rwego rwo hejuru ihuje abacuruzi n’abashoramari bo mu Rwanda n’aba Zimbabwe bagamije kurushaho kugenzura no kubyaza umusaruro amahirwe y’ubucuruzi n’ishoramari biboneka hagati y’ibihugu byombi.

Iyo nama yitabiriwe n’itsinda ritubutse ry’abikorera n’abahagarariye inzego za Leta baturutse mu Rwanda, yafunguwe ku mugaragaro na Perezida wa Zimbabwe Emmerson Dambudzo Mnangagwa.

Perezida Mnangagwa yavuze ko bishimishije kuba inzego z’abikorera ndetse n’iza Leta zishinzwe guteza imbere ubucuruzi n’ishoramari zongeye guhura ku nshuro ya kabiri nyuma y’uruzinduko itsinda ryo muri Zimbabwe ryagiriye mu Rwanda mu mpera z’umwaka ushize.

Yagize ati: “Iyi nama iraduha imbaraga zo gushimangira umubano w’ubucuruzi no kwihutisha ishyirwa mu bikorwa rya gahunda n’imishinga duhuriyeho bigamije kuzamura ubukungu n’imibereho y’abaturage b’u Rwanda na Zimbabwe “

Umuyobozi Mukuru w’Urugaga rw’Abikorera (PSF) mu Rwanda Robert Bafakulera, yasabye umuryango w’abacuruzi n’abashoramari muri Zimbabwe gufatirana amahirwe atangwa n’ibihugu byombi mu kurushaho kwagurira ubucuruzi bwabo mu Rwanda.  

Yagize ati: “ Dushishikajwe cyane n’abashora imari mu buhinzi, gutunganya umusaruro w’ubuhinzi, ubucuruzi bushingiye ku buhinzi, ubucukuzi bw’amabuye y’agaciro, ingufu n’ubucuruzi. Nagira ngo nsabe inshuti zacu hano muri Zimbabwe kugira ngo baduhe umwanya wo kwicarana natwe, duhuze ibitekerezo kandi dushyireho ubufatanye.”

Umuyobozi w’Ikigo gishinzwe Iterambere ry’Urwego rw’Imari (Rwanda Finance Limited/RFL) Nick Barigye,  na we uri mu bagize itsinda ryitabiriye iyo nama muri Zimbabwe, yongeyeho ko hari amahirwe menshi ku bacuruzi b’icyo gihugu mu gutangiza ishoramari ryabo mu Rwanda.

Yagize ati: “Zimbabwe ifite urwego rw’imari rwashinze imizi, kandi urwo rwego rukeneye kuba rufite ibikorwa muri Afurika y’Iburasirazuba kandi u Rwanda ni yo marembo meza kuri bo yo kwinjira mu Karere banyuze mu Ihuriro Mpuzamahanga ry’Imari rya Kigali (KIFC).

Perezida Mnangagwa ni we wafunguye ku mugaragaro iyi nama y’iminsi ine

Yakomeje agira ati: “Turabwira abashoramari ko iyo ushatse gukora ubucuruzi bwambukiranya imipaka hagati ya Zimbabwe n’ibindi bihugu by’Afurika ushobora kwifashisha amashami washinze mu Rwanda, Congo, Tanzania na Kenya ariko kugira ngo ube wagera mu bihugu byose nta nkomyi ushobora kubikora unyuze muri KIFC.”

Itsinda ry’u Rwanda ryitabiriye iyo nama rirangajwe imbere na Minisitiri w’Ubucuruzi n’Inganda Beata Habyarimana. Iyi nama ihuje abayobozi bo mu nzego z’ubucuruzi, inganda, abashoramari, abahagarariye ibigo bito n’ibiciriritse ndetse n’inzego za Leta yitezweho gutanga umwanzuro uhamye mu bijyanye n’ubutwererane bw’ibihugu byombi mu by’ubukungu.

Urwego rw’Abikorera muri Zimbabwe ruvuga ko ibiganiro bagirana birushaho kwagura imikoranire n’amahirwe yo guhanahana ibicuruzwa hagati y’ibihugu byombi.

Umuyobozi w’Ihuriro ry’Inganda muri Zimbabwe Kurai Matsheza, yagize ati: “Iterambere ry’ibyoherezwa mu mahanga hagati y’ibihugu by’Afurika ni ingenzi cyane, kandi u Rwanda ni kimwe mu bihugu abaturage ba Zimbabwe bakeneye kubyaza umusaruro.”

Umuyobozi w’Urwego rw’Igihugu rushinzwe Ubucuruzi muri Zimbabwe Tinanshe Manzungu, na we yongeyeho ati: “Muri Zimbabwe, turavuga ko turimo kuva mu bihe tumenyereye gukoramo twinjira mu kwifashisha ikoranabuhanga mu nzego zirimo ubucukuzi bw’amabuye y’agaciro, ubwikorezi ndetse n’ubuhinzi. Iryo koranabuhanga ririmo kuva mu nshuti zacu zo mu Rwanda, bityo twizeye ubufatanye bwisumbuye hagati y’abantu bacu n’abo mu Rwanda.”

Umuyobozi w’Ihuriro ry’abacuruzi bato n’abaciriritse muri Zimbabwe Denford Mutashu, ati: “Twizeye tudashidikanya ko hari amasomo menshi tuzigishanya urebye ku cyerekezo cy’Igihugu nk’u Rwanda cyatangiye urugendo ruhamye rwo kubaka urwego rw’ubucuruzi n’inganda.”

Muri Nzeri umwaka ushize, ni bwo abantu basaga 100 bahagarariye ubucuruzi n’inzego za Leta baturutse muri Zimbabwe bahuriye na bagenzi babo i Kigali mu nama ya mbere y’Ubucuruzi n’Ishoramari hagati y’u Rwanda na Zimbabwe.

Iyo nama yateguwe na AB Communications ifatanyije n’Urwego rw’Igihugu rw’Iteranbere (RDB), Umushyitsi Mukuru akaba yari Perezida wa Repubulika y’u Rwanda Paul Kagame.

Umuyobozi w’Urwego rwa Zimbabwe rushinzwe Ubucuruzi (Zimtrade) Allan Majuru, yavuze ko iyo nama ari imwe mu zijyanye n’icyerekezo cy’Igihugu cyo kurushaho kwagura ubucuruzi n’Ishoramari mu ruhando mpuzamahanga.

Majuru avuga ko kuri ubu iyi nama ibaye ku nshuro ya kabiri bayitezeho umusaruro ukomeye cyane ko iyo mu mwaka ushize yarangiye Zimbabwe isinye amasezerano afite agaciro ka miliyari zisaga 2 z’amafaranga y’u Rwanda (miliyoni 2 z’amadolari y’Amerika).

Nyuma y’umuhango wo gufungura inama y’uyu mwaka iri kubera i Harare, hasinywe amasezerano y’ubwoko butatu azafasha kwagura ubutwererane bw’ibihugu byombi mu rwego rw’ingufu, ubucuruzi n’ishoramari.

  • NTAWITONDA JEAN CLAUDE
  • Werurwe 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE