Perezida Sassou Nguesso yashimye ubumenyi butangwa na RICA

  • Imvaho Nshya
  • Nyakanga 23, 2023
  • Hashize amezi 10
Image

Perezida wa Congo Brazzaville, Denis Sassou Nguesso yashimye uburyo amasomo y’ubuhinzi n’ubworozi atangirwa mu Ishuri Rikuru ry’Ubuhinzi n’Ubworozi butangiza ibidukikije (Rwanda Institute for Conservation Agriculture/RICA) ritanga ubumenyi bushingiye ku ikoranabuhanga. 

Ibi Perezida Sassou Nguesso wa Congo Brazaville yabigarutseho ejo hashize ku wa Gatandatu, ubwo yasuraga iryo shuri riherereye mu Karere ka Bugesera, aho yasanze ikoranabuhanga ari ryo rikoreshwa biga ubuhinzi n’ubworozi, aboneraho kugaragaza ko Umugabane w’Afurika watera imbere, ukihaza mu biribwa nta kabuza mu gihe hirya no hino hakoreshwa ikoranabuhanga, abiga ari na ko babishyira mu ngiro.

Yagize ati: “Iterambere ry’Afurika rinyura mu buhinzi. Kwihaza mu biribwa ni byo by’ibanze duharanira twese. Bizagerwaho binyuze mu gushyira imbaraga mu bushobozi bwo kongera umusaruro. 

Uburyo bwo kwigisha abantu bashyira mu ngiro ibyo biga mu ishuri bikorwa na RICA, ni uburyo bukwiye kugezwa n’ahandi hose muri Afurika.”

Yongeyeho kandi ko kuba ari urubyiruko rwinshi rwiganje mu biga bitanga amahirwe yo kuba abantu bakwihaza mu biribwa, ashimira iyo kaminuza RICA yigisha ubumenyingiro mu by’ubuhinzi n’ubworozi, hitabwa cyane ku kubungabunga ubutaka n’ibidukikije muri rusange.

Ubwo yatemberezwaga ibice bigize iyi Kaminuza mpuzamahanga, Perezida Sassou Nguesso yasobanuriwe amwe mu masomo ahatangirwa arimo ikoranabuhanga mu kuhira imyaka, kongerera agaciro umusaruro w’ibiribwa, kongera umusaruro w’ibihingwa ndetse n’ikoranabuhanga mu bworozi.

Abanyeshuri biga muri iryo shuri bavuga ko ubumenyi bahawe bufite ireme bakaba biteguye kubusangiza abandi kugira ngo bateze imbere ubuhinzi n’ubworozi.

Minisitiri w’Ubuhinzi n’Ubworozi, Dr Ildephonse Musafiri, yabwiye Perezida Sassou Nguesso ko iyo kaminuza y’ubuhinzi n’Ubworozi yashyizweho mu rwego rwo gukemura ibibazo bikigaragara mu buhinzi n’ubworozi.

Umuyobozi  w’iri shuri, Jean Claude Kayitsinga, we yagaragaje uruhare rwaryo mu gutegura ejo heza h’ubuhinzi n’ubworozi kuko babigisha gukorwa bya kinyamwuga. 

Yagize ati: “Hano twigisha ubuhinzi bw’umwuga, twigisha abanyeshuri bacu kumenya uko batangira mu murima kugeza aho bageza ibyo bahinze, ibyo basaruye ku isoko kandi banabihinduriye agaciro”.

Iyi kaminuza y’icyitegererezo mu kwigisha ikoranabuhanga rigezweho mu buhinzi n’ubworozi yashinzwe ku bufatanye bwa Guverinoma y’u Rwanda n’Umuryango Howard G. Buffet Foundation.

Biteganyijwe ko Perezida Sassou Nguesso wari mu ruzinduko rw’iminsi itatu mu Rwanda arusoza uyu munsi ku Cyumweru.

Aha Perezida Sassou Nguesso yasobanurirwaga n’Umurezi Gasana Kenny iby’imikorere yo kuri iri shuri

Yanditswe na NYIRANEZA JUDITH

  • Imvaho Nshya
  • Nyakanga 23, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE