Perezida Kagame yitabiriye COP27, u Rwanda ruramurika amahirwe y’ishoramari

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
Image

Perezida wa Repubulika y’u Rwanda Paul Kagame, yitabiriye inama Mpuzamahanga ya 27 y’Umuryango w’Abibumbye yiga ku mihindagurikire y’ikirere (COP27), ihurije hamwe Abakuru b’Ibihugu na Guverinoma, abayobozi b’ibigo n’imiryango mpuzamahanga, bose bungurana ibitekerezo ku ngamba zashyiriweho guhangana n’imihindagurikire y’ikirere nk’ikibazo gikomeye kurusha ibindi byugarije Isi.

Iyo nama iteraniye i Sharm El-Sheik mu Misiri, yatangiye ku Cyumweru taliki ya 6 ikazasozwa ku ya 18 Ugushyingo 2022. Mu byumweru bibiri izamara, u Rwanda rwiteguye kugaragaza amahirwe y’ishoramari ari mu kubaka ubukungu bw’Igihugu butangiza ibidukikije.

Perezida Kagame yaraye agiranye ibiganiro n’abayobozi batandukanye barimo Perezida wa Kenya Dr. William Samoei Ruto bagiranye ibiganiro byibanze ku mibanire y’ibihugu byombi, ndetse n’umuherwe Mo Ibrahim washinze ikigo Mo Ibrahim Foundation giteza imbere imiyoborere muri Afurika.

Nk’Umuyobozi w’Ibihugu bikoresha Ururimi rw’Icyongereza (Commonwealth), Perezida Kagame yahuye n’Umunyamabanga w’uyu muryango Patricia Scotland, wamugejejeho raporo y’ishyirwa mu bikorwa ry’imyanzuro y’inama y’Abakuru b’Ibihugu na Guverinoma (CHOGM2022) iherutse kubera mu Rwanda.

Biteganyijwe ko iyo nama yitabirwa n’Abakuru b’Ibihugu na Guverinoma barenga 100, bose bakaba bahurijwe hamwe no kwiga ku bimenyetso biteye inkeke Isi itanga mu bijyanye n’imihindagurikire y’ikirere.

Muri ibyo bimenyetso harimo ibibazo by’amapfa, imyuzure, ikigero cy’ubushyuhe bw’Isi gikomeje kwiyongera n’ibindi biza bigira ingaruka zikomeye ku bukungu n’imibereho y’abaturage cyane cyane abo mu bihugu bikiri mu nzira y’amajyambere.

Perezida Kagame yahuye na Dr. William Ruto

Ibihugu bikennye byiganjemo ibyo ku mugabane w’Afurika bigerwaho n’ingaruka ziremereye z’imihindagurikire y’ikirere, mu gihe bifite uruhare hafi ya ntarwo mu guhumanya Ikirere kuko Afurika ubwayo yohereza ibyuka bigihumanya bitarenze 4%.

U Rwanda rwo rusanga ikibazo cy’imihindagurikire y’ikirere ari rusange ku Isi ari na yo mpamvu hanakenewe n’ibisubizo rusange mu guhangana na cyo.

Mu muhango wo gutangiza COP27, u Rwanda rwari ruhagarariwe n’itsinda riyobowe na Minisitiri w’Ibidukikije Dr. Mujawamariya Jeanne d’Arc aho ryiteguye kygaragaza uburyo hakenewe ubufatanye mu gushakira umuti urambye ingaruka z’imihindagurikire y’ikirere binyuze mu bufatanye burimo n’ishoramari ritangiza ibidukikije.

Umuyobozi wungirije w’Ikigo cy’Igihugu cyo Kubungabunga Ibidukikije (REMA) Faustin Munyazikwiye, yagize ati: “Imihindagurikire y’imirere ni icyago kiruta ibindi muri iki gihe. Irateza amapfa ahantu hatandukanye, ubwiyongere bukabije bw’igipimo cy’ubushyuhe, imvura z’impangukano n’imyuzure. Dukeneye ubufatanye mpuzamahanga mu guhangana n’imihindagurikire y’ikirere, kandi twizeye ko ibiganiro bihuza inzego zinyuranye muri COP27 bihamagarira ibikorwa bifatika.”

Umuyobozi Mukuru w’Ikigo gishinzwe Urwego rw’Imari mu Rwanda (Rwanda Finance Limited/RFL) Nick Barigye, na we yunzemo ko Ikigo Mpuzamahanga cy’Imari cya Kigali (KIFC) gikomeje kongera imbaraga mu kwihutisha ubukangurambaga bwo gushora imari mu mishanga irambye kandi itangiza ibidukikije.

Ati: “Igishushanyo mbonera cy’urwego rw’imari rurambye kigaragaza ko turimo gutera intambwe ikomeye mu kuganisha u Rwanda ku ruhembe rw’imbere mu kubaka urwego rw’imari rurambye binyuze mu kwimakaza ishoramari rirambye ry’imbere mu gihugu, iryo mu Karere ndetse no ku rwego puzamahanga.”

Kuri uyu wa Mbere, ni bwo ahamurikirwa ibikorwa by’u Rwanda muri iyo nama hafungurwa ku mugaragaro.

Umunyamabanga Mukuru w’Umuryango w’Abibumbye Antonio Guterres, yagaragaje ko imihindagurikire y’ikirere igeze ku rwego rutihanganirwa kubera ibiza n’ingaruka bikomeje kugira mu bice bitandukanye by’Isi.

Antonio Guterres yanashimangiye ko ubushyuhe ku rwego rw’Isi bwazamutseho dogere selisiyusi 1.15, kandi ko i myaka umunani ishize ari yo yabayemo ibihe bidasanzwe by’ubushyuhe guhera hagati mu kinyejanna cya 18.

Yaboneyeho gusaba abitabiriye iyi nama gufata imyanzuro yo  guhangana n’iki kibazo cy’imihindagurikire y’ikirere. Iyi nama ije ikurikira iyabereye i Glasgow mu gihugu cya Écosse mu kwezi k’Ugushyingo 2021.

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE