Perezida Kagame yibukije abayobozi ko bagomba gukorera hamwe

  • NYIRANEZA JUDITH
  • Mutarama 24, 2024
  • Hashize ukwezi 1
Image

Perezida Paul Kagame yibukije abayobozi ko bagomba gukorera hamwe, kuko bitagenze bityo nta terambere ryagerwaho.

Ni ijambo yavuze mu gusoza Inama y’Igihugu y’Umushyikirano ya 19 kuri uyu wa Gatatu tariki ya 24 Mutarama 2024, inama yaberaga muri Kigali Convention Center.

Umukuru w’Igihugu yabanje gushimira abatabiriye Umushyikirano, anavuga ko yagenze neza, yihuse kandi yari isobanutse kurusha izabanje, ariko bitavuze ko bihagije ahubwo ari ugukomeza gukora haharanirwa iterambere.

Yagize ati: “Kugira ngo sisitemu ikore neza bisaba kuvugana, kuganira no guhererekanya amakuru.  Impamvu binanira abantu ngo bumvikane bavugana ni iki? Nta Minisiteri imwe ishobora gukemura ikibazo yonyine, n’umuntu umwe, umuyobozi muri Minisiteri ntiyakora wenyine. […] Ibyo wagombaga gukora uyu munsi ugikore ureke kugicumbikisha.”

Yakomeje asaba abayobozi gukora buzuzanya kugira ngo bashobore kuzuza inshingano zabo, anenga abarangwa no kuzarira mu mikorere ibyakagombye gukorwa none bakabyimurira undi munsi.

Ati: “Ibyo wagombaga gukora ugashaka ko habanza hagakorwa inama, abazizamo bakaza bakererewe, bakaza baseta ibirenge, bakanahava batavuze inama wayimazemo iki? Wafashije iki? […] muri twese harimo icyo umuntu ashobora gukora, gukorera hamwe.”

Yasabye abayobozi gukosora ibyavuzweho bitameze neza kandi bigakosorwa vuba na bwangu.

Yagize ati: “Kuvuga ko byagenze neza ntibivuze ko ari aha dukwiye kugarukira urabanza ugashimira bike byabonetse noneho ugasaba abantu ko ahubwo nizaza yindi umwaka utaha, ibyo tuganiriye ahangaha muri iyi minsi, ibyo twasanze bitameze neza, ibyiza se twashimye.

Ubu tuvuye aha tuhavanye iki kugira ngo dutere intambwe turusheho gukora neza ibyo twakoraga neza, dukosore vuba na bwangu ibyo twasanze bitagenda neza, ibyinshi twasanze bidashaka amikoro menshi biri muri mwe.”

Umukuru w’Igihugu yavuze kandi ko gusimbura abantu bikwiye mu gihe atuzuza inshingano ze ngo akorane n’abandi.

Ati: “Gusimbura abantu birakwiye mu gihe ari mu bidasobanutse […] ushobora kubikora, bamwe murabiceceka ngo batabumva nabi. […] Abayobozi mu nzego za Leta turimo ngo dukorere Igihugu, dukorere abaturage, ubuzima bwabo buhinduke, urimo ntacyo ukora, urimo urakora iki?”

Perezida Kagame kandi yabasabye guhindura imyumvire ntibumve yuko hari ugomba kubagirira imbabazi. Ati: “…imbabazi abantu batugirira, urashonje ndakugaburiye, ntufite icyo kwambara ndakwambitse akaba umuturage w’uwaturutse ikantarange utagize icyo amumariye.

Yakomoje ku biyita ko ari ibitangaza ariko mu by’ukuri baba badakwiye guhitiramo Abanyarwanda n’Abanyafurika.

Ati: “Abahoze biyita ko ari ibitangaza baje gukiza Abanyarwanda cyangwa Abanyafurika, barabakiza iki? Ariko mwakoze. Ibyo turabishima turabyishimira ko hari uwakugobotse mu rugendo wari urimo naho wajyaga ube ufite urugendo aze arugufashemo ariko ntakwiye kuguhitiramo urugendo ngo anaruherekezemo.

Abanyafurika mukwiye kugirirwa imbabazi, muteye imbabazi z’iki? Ni iki gituma abantu bagomba kuza kubagirira imbabazi, zo kubagaburira, kubambika, erega ugasanga abayobozi bararimbye bari ku matelefone kandi ntacyo bakorera igihugu, umuntu akaza kugirira imbabazi abo uyobora nawe urimo akakugirira imbabazi. Ibyo ni mitekerereze yihe?”

Inama y’Igihugu y’Umushikirano ku nshuro ya 19 yabaye umwanya wo kwibuka urugendo rw’imyaka 30 ishize igihugu kivuye mu icuraburindi rya Jenoside yakorewe Abatutsi yagaragarijwemo ibyagezweho muri manda ya 2017-2024.

  • NYIRANEZA JUDITH
  • Mutarama 24, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE