Perezida Kagame yashimye ibyagezweho muri Gahunda y’Amasoko Arambye

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
Image

Gahunda y’Amasoko Arambye (SMI) yatangijwe n’Umwami w’u Bwongereza Charles mu mwaka wa 2020 mu Nama Mpuzamahanga y’Ubukungu yabereye i Davos, ubwo yari akiri Igikomangoma cya Wales. Ni Gahunda igamije guhuriza hamwe imbaraga zifasha Urwego rw’Abikorera kuba umusemburo w’impinduka zikenewe mu kubaka iterambere rirambye ry’ahazaza h’Isi.

Mu mwaka wa 2021, ni bwo Charles wa III yatangije Ihuriro Terra Carta Action Forum rishimangira intego ya Gahunda y’Amasoko Arambye yo gushyira Urwego rw’Abikorera imbere mu guharanira kubaka ahazaza haramba. Iryo huriro rishyira imbere Ibyaremwe, abantu n’Umubumbe ku isonga ryo guhanga indangagaciro mpuzamahanga.

Perezida wa Repubulika y’u Rwanda Paul Kagame, ubwo yagezaga ijambo ku bitabiriye Umuhango wo gusangira ibya mugitondo wateguwe n’Ihuriro ry’Umushinga w’Amasoko Arambye (SMI) n’Umuryango w’Ibihugu bikoresha Icyongereza (Commonwealth) kuri uyu wa Mbere, yashimye ibimaze kugerwaho muri gahunda y’amasoko Arambye.

Yagize ati: “Ndashima byimazeyo akazi karimo gukorwa binyuze mu ihuriro Terra Carta Action Forum nk’uko byashimangiwe n’umubare munini w’abayobozi bakuru n’abandi bayobozi b’ubucuruzi  bitabirye.  Ntegerezanyine ubwuzu ibiganiro tugirana muri iki gitondo na nyuma y’aho, no gukorana namwe  mu birebana n’iterambere ry’Umuryango wacu wa Commonwealth.”

Umukuru w’Igihugu cy’u Rwanda akaba n’Umuyobozi Mukuru wa Commonwealth, yishimiye kubona abayobozi benshi ba Commonwealth bahurira hamwe anagaragaza icyifuzo cyo kujya bahurira hamwe mu gihe habaye inama mpuzamahanga zibahuriza hamwe nk’Inama Mpuzamahanga y’Umuryango w’Abibumbye yiga ku Mihindagurikire y’Ikirere (COP) n’izindi.

Yakomeje ashimangira ko mu nama y’Abakuru b’Ibihugu na Guverinoma muri Commonwealth (CHOGM) iheruka kubera i Kigali, abayobozi bemeje Terra Carta nk’intangarugero mu kugaragaza ubufatanye bwa Leta n’abikorera bugamije kubaka amasoko Arambye mu gihe kizaza.

Yakomeje agira ati: “Nanone ni amahirwe kuba Umwami Charles wa III yashimangiye ko umurimo w’ingenzi wa Gahunda y’Amasoko Arambye uzakomeza gukorwa nka mbere. Ubufatanye bwa Leta n’Abikorera ni umusingi w’ibisubizo byose byashakirwa ibibazo by’imihindagurikire y’ikirere. Ibiganiro byeruye muri COP27 birafungura amahirwe y’ubucuruzi bushya, inkunga nzahurabukungu, n’ubumenyi mu guhanga udushya.”

Yavuze komu kubaka ibiramba by’ahazaza, ibigo by’ubucuruzi n’abakiriya ba byo ari bo bafite urufunguzo rw’iyo nzira isaba ukwiyemeza gushingiye ku mpande zose.

Icyo kiganiro cyabaye mu gihe abayobozi batandukanye bitabiriye Inama Mpuzamahanga y’Umuryango w’Abibumbye yiga ku muhindagurikire y’Ikirere COP27 izamara ibyumweru bibiri.

Terra Carta ni ihuriro ryatangijwe n’Umwami Charles III rigamije gufata ingamba zifatika mu gufasha urwego rw’abikorera kwihutisha iterambere ribaganisha ku hazaza harambye.  Terra Carta igamije kongera guhuza abantu n’umubumbe, aho ibyaremwe byongera gusubizwa uburenganzira bw’ibanze n’agaciro kabyo bityo hagasigasirwa umurage w’ibisekuru bizavuka mu myaka amagana iri imbere.

Imiryango ya Leta, iy’abikorera ndetse n’abagiraneza, bishobora gushyigikira iryo huriro binyuze mu kwimakaza amahame shingiro mu gutegura imishinga no gufata ibyemezo bigamije guhindura ahazaza h’Isi.

Umwami Charles arahamagarira abayobozi b’Inzego z’abikorera ku Isi yose guhuza imbaraga mu gushyigikira no gushyira mu bikorwa amahame shingiro ya Terra Carta.

Umuhango wo gusangira ibya mugitongo wanitabiriwe na Minisitiri w’Intebe wa Barbados Mia Mottley, Minisitiri w’Intebe wa Bahamas Philip Davis, ndetse n’Umunyamabanga Mukuru wa Commonwealth Patricia Scotland.

  • NTAWITONDA JEAN CLAUDE
  • Ugushyingo 7, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE