Perezida Kagame yashimiye Tanzania yahesheje ishema Afurika

  • NTAWITONDA JEAN CLAUDE
  • Mutarama 12, 2024
  • Hashize amezi 2
Image

“Ibyo Zanzibar yagezeho na Tanzania muri rusange, ni isoko y’ishema ry’Akarere k’Afurika y’Iburasirazuba n’umugabane wacu.”

Perezida wa Repubulika y’u Rwanda Paul Kagame yabikomojeho mu butumwa yagejeje ku bitabiriye ibirori byo kwizihiza isabukuru y’imyaka 60 y’impinduramatwara ya Zanzibar kuri uyu wa Gatanu tariki ya 12 Mutarama 2024.

Ni ibirori byabereye muri Sitade ya New Amani, yahoze yitwa Amani Stadium byitabiriwe n’abanyacyubahiro batandukanye barimo Abakuru b’Ibihugu na Guverinoma, abadipolomate, abahagarariye imiryango mpuzamahanga n’abaturage ba Tanzania.

Perezida Kagame yavuze ko yatewe ishema no kwifatanya n’ibyo bihumbi by’abantu byitabiriye ibyo birori bibaye ku nshuro ya 60.

Ati: “Nifatanyije namwe mu byishimo bayobozi n’abaturage, byo kuba mwarasigasiye intego z’Impinduramatwara ya Zanzibar no gushyira mu bikorwa inzozi n’intego z’abatangije iyo mpinduramatwara.

Kuri uyu munsi w’amateka turibuka intwari z’abagore n’abagabo barwanyije akarengane. Icyo gihe kandi cyabaye intangiriro y’ishingwa ry’ubumwe ryagenze neza hagati ya Zanzibar na Tanganyika ari na byo byagize igihugu cya Tanzania.”

Perezida Kagame yakomeje ashimangira ko ukwihuza kw’ibihugu bibiri byabaye ikimenyetso ndakuka ko Abanyafurika bashobora kwihuza bagashakira hamwe ibisubizo by’ibibazo bahur ana byo ndetse bakabyaza umusaruro amahirwe azana n’ubwo bufatanye.

Yaboneyeho kwibutsa ko u Rwanda na rwo rwabonye umusaruro wo kunga ubumwe ubwo rwangaga guheranwa n’amateka mabi yaruranze mu myaka 30n ishize.

Yagize ati: “Nta na kimwe kidashoboka igihe cyose twaba dukoreye hamwe. Ndabashimira gusigasira amahoro y’Igihugu cyanyu. Uko mwabikoze byatumye mukomeza kuba icyitegererezo cy’impinduramatwara kandi muhirwa no gushinga Ubumwe. Ni igihamya cy’uko Abanyafurika bashobora kwihuza nk’abavandimwe ndetse nk’ibihugu.”

Ku wa 12 Mutarama 1964 ni bwo habaye impinduramatwara yakuyeho ubuyobozi bwa Zanzibar bwari bwiganjemo Abarabu, hajyaho abaturage b’abanyagihugu ndetse icyo Gihugu cyahise cyihuza na Tanganyika bibyara Repubulika Yunze Ubumwe ya Tanzania.

Icyo gihugu cyari kigizwe n’ibirwa cyari kimaze igihe gikabakaba umwaka kibonye ubwigenge ku bukoloni bw’u Bwongereza, ariko nyuma y’aho Abarabu bakomeza kwegukana ubuyobozi kuko ibyo birwa byari bigifatwa nk’ubutaka bwo mu mahanga bw’Igihugu cya Oman.

Hejuru y’uko bari bababajwe no kuba badahagarariwe uko bikwiye mu Nteko Ishinga Amategeko, Ishyaka rya ba kavukire ASP riyobowe na John Okello ryahurije hamwe abagabo babarirwa hagati ya 600 na 800 ku kirwa cya Unguja mu gitondo cyo ku ya 12 Mutarama 1964.

Abo basore n’inkumi barwanyije abapolisi babambura intwaro, bakomereza mu Mujyi wa Zanzibar aho bahise bahirika Guverinoma ya Sultan.  

Ibirori by’uyu munsi byari bigamije kwishimira intambwe imaze guterwa nyuma y’imyaka 60 abaturage ba Zanzibar bakuyeho ubuyobozi butakoreraga rubanda.

Uretse Perezida Kagame, uyu muhango wanitabiriwe na Perezida wa Zanzibar Hussein Ali Mwinyi, Perezida wa Repubulika y’Ubumwe ya Tanzania Samia Suluhu Hassan, Perezida wa Uganda Yoweri Kaguta Museveni, Visi Perezida wa Kenya Rigathi Gachagu ana Minisitiri w’Intebe w’u Burundi Gervais Ndirakobuca.

Ibirori byaranzwe n’akarasisi kakozwe n’abasirikare, imyiyereko ya gisirikare ndetse n’abaturage bose bavutse kuri iyi taliki barekurira ibipurizo n’inuma mu kirere cya sitade.

Uyu munsi wasojweho kwizihiza iyabukuru, wabanjirijwe n’ibikorwa byakozwe mu byumweru bitatu bishize byarimo gufungura cyangwa  gushyira ibuye ry’ifatizo ku mishinga y’iterambere itandukanye.

Amafoto: Urugwiro Village

  • NTAWITONDA JEAN CLAUDE
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE