Perezida Kagame yagaragarijwe urugendo rw’ishyirwa mu bikorwa rya AfCFTA

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
Image

Kuri uyu wa Kabiri, ni bwo Perezida wa Repubulika y’u Rwanda Paul Kagame yakiriye muri Village Urugwiro Umunyamabanga Mukuru wa Gahunda y’Isoko Rusange ry’Afurika (AfCFTA) Wamkele Mene, wamugejejeho aho urugendo rwo gushyira mu bikorwa amasezerano y’iryo soko rugeze.

U Rwanda ruri mu bihugu umunani byatangirijwemo iyo gahunda, kimwe na Misiri (Egypt), Kenya, Ghana, Tanzania, Cameroon, Ibirwa bya Mauritius na Tunisia.

Wamkele Mene avuga ko intambwe u Rwanda rumaze gutera mu bijyanye n’ishyirwa mu bikorwa ry’ibikubiye mu masezerano y’iri soko, ari urugero rwiza ku bindi bihugu bikiri inyuma.

Isoko Rusange ry’Afurika ni rimwe mu mishinga 13 ikomeye ikubiye mu Cyerekezo cy’Afurika (Agenda 2063) igamije kubaka Afurika ibereye Abanyafurika, aho bazaba bahuza imbaraga mu kurwanya ubukene, inzara n’imirire mibi binyuze mu gufungurirana amasoko.

Ni umushinga watangijwe hagamijwe gukuraho inzitizi z’ubucuruzi bukorwa hagati y’Afurika, aho usanga ibyakagiriye umumaro Abanyafurika muri rusange byoherezwa hanze y’Umugabane bikazagarurwa bitunganyijwe ku giciro gihanitse.

Nanone kandi AfCFTA ifungura amahirwe y’isoko rya mbere rinini ku Isi, ribarurwamo abaguzi bakabakaba miliyari 1.3 kandi biganjemo urubyiruko rugifite imbaraga zo gukora no gukoresha amahirwe yose ritanga.

Ni isoko ryashinzwe hagendewe ku Isoko Rusange ry’Ubumwe bw’u Burayi rigira uruhare rukomeye cyane mu iterambere ry’ubukungu bwo ku mugabane wose w’u Burayi.

AfCFTA yahangiwe i Kigali bwa mbere taliki ya 21 Werurwe 2018, aho kugeza ubu ibihugu 44 bimaze gushyira umukono ku masezerano aryemeza, mu gihe 47 byasinye ku Myanzuro ya Kigali yemeza itangizwa ry’iryo soko, naho ibihugu 30 bikaba byarasinye ku masezerano yoroshya urujya n’uruza rw’abantu ku mugabane.

Iyo gahunda yo gufungura urujya n’uruza yatangijwe ku mugaragaro mu ntangiriro z’umwaka wa 2021, ikazajya ishyirwa mu bikorwa mu byiciro kugeza aho izakorwa mu bihugu byose by’Afurika uko ari 54.

Bivugwa ko intambwe imaze guterwa yatangiye gutanga umusaruro kuko hari bimwe mu bihugu byatangiye guhahirana binyuze muri iryo soko ryitezweho guhindura icyerekezo cy’ubukungu bw’Afurika.

Itangizwa ry’ubucuruzi nyir’izina ryabereye i Accra muri Ghana ku wa 7 Ukwakira 2022, ubwo igicuruzwa cya mbere cyahahwe ibirango bya AfCFTA cyageraga ku isoko giturutse mu Rwanda.

Icyo gihe Wamkele Mene yatangaje ko ibihugu bimwe na bimwe birimo u Rwanda byagaragaje umwihariko mu kugaragaza ko byiteguye gukora ubucuruzi mu mutaka wa AfCFTA.

Iri soko ryitezweho guhuza Uturere tw’ubukungu ku Mugabane w’Afurika ndetse no gufasha guhuza politiki z’ubukungu n’ubucuruzi mpuzamahanga mu bihugu byose bihuriye mu Muryango w’Afurika Yunze Ubumwe (AU).

Ubwo ryashingwaga mu 2018, Perezida Kagame yavuze ko ishyirwa mu bikorwa ry’iri soko rikabya inzozi Abakuru b’Ibihugu b’Afurika bagize mu myaka isaga 40 ishize, ubwo bahuriraga i Lagos muri Nigeria mu 1980. Ni cyo gihe hateguwe gahunda yiswe Lagos Plan of Action yaje kubyara Amasezerano y’Abuja ashyiraho Umuryango w’Ubukungu w’Afurika mu 1991.

  • NTAWITONDA JEAN CLAUDE
  • Ukwakira 18, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE