Perezida Kagame yasabye kwihutisha uruganda rw’amata y’ifu yemereye abaturage

  • NTAWITONDA JEAN CLAUDE
  • Nyakanga 25, 2022
  • Hashize imyaka 2
Image

Uruganda rw’amata y’ifu rwa Nyagatare rwitezweho guhindura uruhererekane rw’ubucuruzi bw’amata n’imikoreshereze yayo mu Ntara y’Iburasirazuba ndetse no mu Gihugu muri rusange, rukaba ari ishoramari ryagutse Perezida wa Repubulika y’u Rwanda Paul Kagame yemereye abaturage bo mu Ntara y’Iburasurazuba nyuma yo kumutakira bavuga ko babona umukamo mwinshi ariko bakabura isoko.

Minisitiri w’Ubutegetsi bw’Igihugu Gatabazi Jean Marie Vianney, yahishuye ko Perezida Kagame ashaka ko urwo ruganda rwitezweho kuzura rutwaye miliyari 19 z’Amafaranga y’u Rwanda rwihutishwa, ku buryo bitarenze mu kwezi k’Ugushyingo rwaba rwatangiye gukora.

Ubwo yasozaga Umwiherero w’iminsi ibiri w’Abayobozi b’iyo Ntara waberaga mu Karere ka Bugesera ku Cyumweru taliki ya 24 Nyakanga 2022, Minisitiri Gatabazi yavuze ko abayobozi bakwiye gufasha abaturage kwitegura guhaza urwo ruganda mu mukamo wujuje ubuziranenge, cyane ko biteganyijwe ko ruzaba rufite ubushobozi bwo kwakira no gutunganya litiro 500,000 ku munsi.

Yagize ati: “Hari amahirwe ari mu bworozi; batakiye Nyakubahwa Perezida wa Repubulika ko baba bashaka ko abaha uruganda bavuga ko amata yabuze aho ajya. Uruganda yararubahaye kandi arashaka ko rwihuta. Ese Ruzabona amata? Abayobozi nibashyashyane bajye muri abo baturage, babafashe kubona icyororo kizima, babafashe korora neza, babafashe kubona ibisubizo by’ibibazo by’amatungo akunda guhura n’uburwayi n’ibindi noneho ya mata akenewe muri rwa ruganda azaboneke.”

Minisitiri Gatabazi yakomeje avuga ko uretse mu Bworozi Intara y’Iburasirazuba ifite n’amahirwe y’ubukungu mu nzego zinyuranye zirimo ubuhinzi, ubukerarugendo, ubucuruzi, amakoperative n’ayandi.

Minisitiri Gatabazi yasabye gutanga umusanzu wabo buzuza inshingano mu nzego zinyuranye zigamije iterambere ry’abaturage n’Igihugu muri rusange, harimo kwita ku mikorere ya za Koperative kugira ngo zizamure abanyamuryango bose aho gukiza abayobozi bazo gusa, kugira uruhare mu kongera umusaruro w’amafi mu biyaga n’ibyuzi biri muri iyi Ntara y’Iburasirazuba no kongera umusaruro w’ubuhinzi kugira ngo Igihugu ntikijye gihungabanywa n’ibibazo by’ubukungu nk’ibyo Isi irimo ubu.

Minisitiri Gatabazi yashyikirije abayobozi b’Intara y’Iburasirazuba ubutumwa bwa Perezida Kagame

Yakomeje agira ati: Niba ari mu buhinzi, abayobozi bashyire imbaraga mu gushaka imbuto z’abaturage no kubafasha kubona uko bagera ku masoko. Amakoperative ari mu Burasirazuba ni menshi no hirya no hino mu Gihugu, abaturage bagiye bashyiramo amafaranga yabo kugira ngo biteze imbere.

Uwo mwiherero wabaye ku nsanganyamatsiko igira iti: “Kwihutisha imiyoborere mpinduramatwara binyuze mu kunoza imitangire ya serivisi nziza, gukora neza no kubazwa inshingano”, ukaba waritabiriwe na Guverineri, Komite Nyobozi z’Uturere, Inama Njyanama, abashinzwe igenamigambi n’abandi.

Abayobozi biyemeje gutahiriza umugozi umwe no guhindura imikorere kugira ngo amahirwe ayibonekamo abyazwe umusaruro ugirira abaturage n’igihugu akamaro. Ibi babyanzuye nyuma y’iminsi 2 bamaze mu mwiherero mu Karere ka Bugesera, wasojwe na Minisitiri w’Ubutegetsi bw’Igihugu.

Umuyobozi w’Akarere ka Rwamagana Radjab Mbonyumuvunyi yagize ati: “Wabaye n’umwanya mwiza wo kugira ngo abantu bongere bisuzume, barebe ibigenda neza babishime, barebe n’ibitaranoga na bwo babinoze. Ntabwo wagira imibereho myiza udafite aho uba, aho wiherera, udafite aho utekera, ibyo byose bisanzwe mu mihigo y’Uturere, ahubwo icyo tugiye gukora ni ukugira ngo twongere tubarure neza abasigaye inyuma mu iterambere, turebe ngo twakora iki mu buryo bwihuse…”

Abayobozi nanone biyemeje gutahiriza umugozi umwe no kunoza serivisi baha abaturage, kugira ngo ayo mahirwe abyazwe umusaruro uko bikwiye.

Muri uyu mwiherero kandi aba bayobozi biyemeje gushyira imbaraga muri gahunda Perezida Kagame yemereye abaturage muri manda y’imyaka 7 kugira ngo mu mwaka wa 2024 zizabe zagerweho 100% nk’uko byateganyijwe.

  • NTAWITONDA JEAN CLAUDE
  • Nyakanga 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE