Perezida Kagame yaganiriye na Zelensky wa Ukraine

  • KAYITARE JEAN PAUL
  • Mutarama 17, 2024
  • Hashize amezi 2
Image

Ku munsi w’ejo ku wa Kabiri tariki 16 Mutarama 2024, Perezida Paul Kagame yagiranye ibiganiro na mugenzi we wa Ukraine, Volodymyr Zelensky i Davos mu Busuwisi, aho bitabiriye Inama mpuzamahanga yiga ku bukungu (World Economic Forum).

Bimwe mu byibanzweho mu biganiro byahuje abakuru b’ibihugu bombi, ni intambara imaze iminsi muri iki gihugu n’imbaraga zikwiye gukoreshwa kugira ngo ikemuke.

Ibiganiro byitabiriwe n’abarimo Minisitiri w’Ububanyi n’Amahanga, Dr Vincent Biruta na Ambasaderi w’u Rwanda mu Busuwisi, Marie Chantal Rwakazina.

Ni ubwa mbere Perezida Zelensky ahuye na Mugenzi we w’u Rwanda Perezida Kagame.

Yamubwiye kuri gahunda iganisha Ukraine ku mahoro uko iteye ndetse kandi ko n’ijwi ry’ibihugu by’Afurika ari ingenzi mu kugira ngo amahoro agerweho.

Yagize ati “Namenyesheje Perezida Kagame uko gahunda igamije kugera ku mahoro iteye. Ijwi ry’ibihugu by’Afurika ni ingenzi kugira ngo ishyirwe mu bikorwa. Uwari uhagarariye u Rwanda yitabiriye inama ya kane ya gahunda y’amahoro yahuje abajyanama”.

Perezida wa Ukraine yavuze ko kuba u Rwanda rwarohereje umuntu uruhagararira muri iyi nama biha ubutumwa ibindi bihugu byo muri Afurika.

Ati “Ibi bitanga ikimenyetso gikomeye ku bindi bihugu byo muri Afurika. Ukraine yashyize Ambasade mu Rwanda ishaka gukomeza umubano n’akarere no kujya yoherezayo umusaruro w’ubuhinzi.”

Minisiteri y’Ububanyi n’Amahanga ya Ukraine iherutse gutangaza ko iteganya gufungura ambasade yayo mu Rwanda, Mozambique no muri Bostwana nyuma y’uko ibikoze muri Ghana.

Muri Gicurasi, Minisitiri w’Ububanyi n’Amahanga wa Ukraine, Dmytro Kuleba yagiriye uruzinduko mu Rwanda asinyana amasezerano na mugenzi we w’ububanyi n’amahanga, Dr Vincent Biruta yerekeye iby’ubujyanama mu bya politiki hagati y’ibihugu byombi.

Amafoto: Village Urugwiro

  • KAYITARE JEAN PAUL
  • Mutarama 17, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE