Perezida Kagame yacyeje Howard Buffet udatenguha u Rwanda

  • NTAWITONDA JEAN CLAUDE
  • Kanama 8, 2023
  • Hashize amezi 10
Image

“Howard ntekereza ko utadutengushye!” Ni ubutumwa Perezida wa Repubulika y’u Rwanda Paul Kagame, yageneye Umuherwe Howard G. Buffett wihebeye u Rwanda akaba yaratanze umusanzu ukomeye mu kubaka umusingi w’iterambere ry’ubuhinzi n’ubworozi bugezweho ku rwego mpuzamahanga.

Perezida Kagame yongeye gushima Howard Buffet mu muhango wo gusoza amasomo kw’abanyeshuri 75 barangije mu Ishuri Rikuru ry’Ubuhinzi n’Ubworozi bubungabunga ibidukikije (RICA), barangije mu mashami anyuranye arimo ibijyane no kwita ku matungo, kongerera agaciro umusaruro no gukoresha ikoranabuhanga rigezweho mu buhinzi.

RICA ni Ishuri riri mu bigize umusaruro w’ukwiyemeza n’icyerekezo bya Buffett kuko ryashinzwe n’Umuryango Howard G. Buffett Foundation ufatanyije na Leta y’u Rwanda n’abandi bafatanyabikorwa, mu kwimakaza ubuhinzi n’ubworozi bwifashishije ikoranabuhanga rigezweho.

Ryubatswe mu Karere ka Bugesera aho ubusanzwe abaryigamo bahabwa amasomo mu gihe cy’imyaka 3, ariko icyorezo cya COVID-19 cyatumye abasoje uyu munsi biga imyaka 4 kuko batangiye mu mwaka wa 2019.

Perezida Kagame amushimira, yagize ati: “Nyuma y’imyaka mike ishize, umugambi wo guteza imbere ubuhinzi n’ubworozi watugejeje kuri uyu muhango w’akataraboneka wo gusoza amasomo uyu munsi. Howard, muvandimwe n’inshuti yanjye, nongeye kugushimira inkunga n’icyerekezo byawe.”

Yahamije ko uyu muhango wo kwishimira abanyeshuri ba mbere barangije muri iryo Shuri Rikuru ryemewe ku rwego mpuzamahanga utari gushoboka iyo hatabaho umusanzu utagira akagero wa Howard Buffett n’Umuryango yashinze, hamwe n’icyizere yagiriye u Rwanda mu kuva yarugeramo mu myaka isaga 20 ishize.  

Buffett yavuze ko mu bihugu byose by’Afurika yagezemo yabonye umufatanyabikorwa mwiza ari we u Rwanda mu kubaka Ishuri rihindura icyerekezo cy’uyu mugabane mu rwego rw’ubuhinzi.

Ati: “Ntibyaba bihagije kuvuga gusa ko twabonye umufatanyabikorwa ukwiriye mu Rwanda. U Rwanda ni we mufatanyabikorwa wenyine twabashije gutoranya ku mugabane. Biroroshye kubivuga ariko ibihugu byinshi bihora mu ntambara z’urudaca… Iyo ugeze mu Rwanda ntubona Afurika uko iri ahubwo ubona ahazaza hayo heza.”

Kuva mu mwaka wa 2000, Howard G. Buffett amaze gushora mu Rwanda miliyoni zisaga 250 z’amadolari y’amerika (asaga miliyari 327 z’amafaranga y’u Rwanda), aho igice kinini cyashyizwe mu mishinga yo guteza imbere ubuhinzi n’ubworozi no kubungabunga urusobe rw’ibinyabuzima.

Amasomo atatu Perezida Kagame yahaye abanyeshuri

Mu mpanuro yagejeje ku banyeshuri basoje amasomo, Perezida Kagame yabanje kwifatanya na bo mu munezero wo gusoza ikivi kimwe batangira icyiciro gishya cy’ubuzima bwabo, aho bitezweho gutanga umusanzu mu mpinduka zikenewe mu buhinzi n’ubworozi.

Yabasangije amasomo atatu ashobora kubabera inkoni bicumba mu rugendo batangiye.  

Yagize ati: “Isomo rya mbere: Mugire intumbero! Kuva yatangira, intumbero RICA yari iyo guhangana n’ingorane z’igihe kirekire zugarije abahinzi bato baciriritse. Ubuhinzi n’ubworozi ni umusingi w’ingenzi w’iterambere ry’ubukungu bw’Afurika, ariko ntiturabasha kububyaza umusaruro mu buryo bwuzuye. Banyeshuri basoje amasomo, muri urwo rwego ndabasaba gushaka ikibazo gihari, mucyiteho bihagije kandi mubigire intego kugikemura.”

Yabibukije ko muri urwo rugedo bazahura n’ingorane nyinshi, ndetse anababwira ko kugira icyerekezo akenshi bisobanura ikinyuranyo kiri hagati yo kurekura no gukomeza guhatana.

Yakomeje agira ati: “Isomo rya kabiri: Abenshi bazabashidikanyaho, ariko iteka mujye mukora ibyo mutekereza ko ari byo bikwiye. Kugera ku ntsinzi mugomba kunyura mu nzira igendwamo na bake. Akenshi ibyo bisobanura kutumvwa cyangwa kujorwa.”

Yavuze ko mu myaka itatu ishize ubwo hatangizwaga umushinga wo kuhira wifashisha ingufu zituruka ku mirasire y’izuba, Howard Buffett yagarutse ku kiganiro yagiranye n’abahinzi, aho yaberetse gahunda yo kubazanira imashini zuhira ku buso bunini mu Rwanda ariko ntihagira n’umwe wizera ko byashobokaga.

Uyu munsi iryo koranabuhanga ryubatswe i Nasho mu Karere ka Kirehe rikomeje kongera umusaruro w’abo bahinzi, kuko ibikorwa remezo yahubatse bifasha abarenga 2 000 kuhira hegitari zirenga 1 170.

Muri ubwo buhinzi bw’i Nasho, abanyeshuri bo muri RICA bakorana bya hafi n’imiryango ibyaza umusaruro iryo koranabuhanga, bagakoresha ubwo bunararibonye mu kuzuza ubushakashatsi bwabo.

Yasabye abanyeshuri basoje amasomo gukoresha ubuhanga, ubumenyi n’umuhate wo kuba ba rwiyemezamirimo bungukiye muri iryo shuri, mu guhanga ibishya mu rwego rw’ubuhinzi n’ubworozi.

Ageze ku isomo rya gatatatu, yagize ati: “Nta kintu cy’agaciro kigerwaho n’umuntu ku giti cye. Abafatanyabikorwa ba RICA, harimo Guverinoma y’u Rwanda n’abandi benshi, byagize uruhare mu kubaka RICA ivamo Ishuri Rikuru ryemewe mu ruhando mpuzamahanga nk’uko bimeze uyu munsi.”

Yasabye abo banyeshuri gukorana n’abo bahuje imyumvire kandi babashishikariza kuba intangarugero mu byo bakora, anabibutsa kutibagirwa umubano ukomeye bubatse hagati yabo, abarimu n’abayobozi b’Ishuri. Yabibukije ko ari ingenzi ko na bo ubwabo badakwiye kureka kuvugana mu buryo buhoraho.

Yakomeje agira ati: “Ikibazo gihari muri Afurika si icyo kutagira impano cyangwa imitungo kamere, ikibazo ni ukudakorana mu buryo butanga umusaruro no kudakoresha neza umutungo wacu muri rusange.”

Yongeyeho kandi ko kubera amateka n’imiterere y’u Rwanda, Abanyarwanda bagomba gukora ibintu mu buryo bwihariye, ariko kandi ukwihuza kw’Akarere no gukorana bya hafi n’abaturanyi bikaba byarahawe agaciro gakomeye.

Amafoto: Urugwiro Village

  • NTAWITONDA JEAN CLAUDE
  • Kanama 8, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE