Perezida Kagame kwemera kuzatubera umukandida si amahitamo ye- Munyakazi Sadate

  • Imvaho Nshya
  • Ukwakira 4, 2023
  • Hashize amezi 8
Image

Nyuma y’aho Perezida wa Repubulika Paul Kagame yemeye ko aziyamamaza mu matora y’Umukuru w’Igihugu ategerejwe umwaka utaha 2024, benshi mu Banyarwanda bagaragaje ko basubijwe.

Munyakazi Sadate uzwi cyane muri Siporo y’u Rwanda akaba kandi azwi nk’uwikorera aho ayobora Sosiyete ye y’Ubwubatsi mu Rwanda ‘Karame Rwanda Ltd, aherutse kubwira Imvaho Nshya uko yakiriye igisubizo cyahawe Abanyarwanda.

Yagize ati: “Nka Munyakazi, reka mvuge ngo Nyakubahwa Perezida wa Repubulika kwemera kuzatubera umukandida umwaka utaha ntabwo ari amahitamo ye, ni amahitamo y’Abanyarwanda.

Nkeka y’uko byari kumugora cyane kutwumvisha ko ahubwo atabyemera. Njya mbwira abantu ko iyo aramuka atsimbaraye akabyanga kuko na byo ni uburenganzira bwe, ariko natwe twamubwira ngo turatsimbaraye kubikwemeza nk’Abanyarwanda kuko natwe ni uburenganzira bwacu”.

Avuga ko mu myaka 30 ishize Igihugu cyavuye kure kuko mu 1994 cyari cyasenyutse ku buryo umuntu atabasha gusobanura, abaturage bose bagiye na Jenoside yakorewe Abatutsi imaze gutwara abasaga miliyoni.

Ibyo igihugu kimaze kugeraho kandi kikaba cyarabigezeho kidafite imitungo kamere ihambaye n’ibindi nkabyo, ngo kibikesha ubuyobozi bwiza burangajwe imbere na Perezida Kagame.

Munyakazi yabajijwe uko yakiriye igisubizo cy’Umukuru w’Igihugu mu kiganiro aherutse kugirana n’Ikinyamakuru Jeune Afrique, ubwo yabazwaga niba kuba yarongeye gutorerwa kuyobora FPR Inkotanyi n’amajwi 99.8% bidashimangira ko azongera guhagararira uyu Muryango mu matora ya 2024.

Icyo gihe Perezida Kagame yasubije ko aterwa ishema n’icyizere Abanyarwanda bamufitiye, anongeraho ko kongera gutorerwa uyu mwanya w’Umukuru w’Igihugu ntawe byatungura kuko bigaragarira buri wese.

Igisubizo Perezida Kagame yatanze cyanyuze Abanyarwanda benshi

Yagize ati: “Mumaze kubyivugira ko ari ibintu bigaragarira amaso ya bose. Ni na ko bimeze. Ndishimye ku bw’icyizere Abanyarwanda bamfitiye. Nzakomeza kubakorera uko nshoboye. Yego, rero ndi Umukandida.”

Munyakazi yavuze ko icyo gisubizo cyamunyuze kimwe n’abandi Banyarwanda benshi, anashimangira ko igihe cyo gutora gitinze kugira ngo we n’abandi Banyarwanda bategereje uwo munsi bemeze akabari ku mutima mu kumushyigikira.

Ati: “Njye nka Munyakazi mbonye avuze kuriya numvise nsubijwe ahubwo ndavuga nti biratinze, yo kagira Imana! Umwaka utaha Abanyarwanda tuzabe twabirangije kare nka saa tatu, saa yine amatora tube twayarangije ahubwo dutegereje yuko batangaza nimugoroba tukibyinira intsinzi”.

Avuga ko icyemezo Umukuru w’Igihugu yafashe ari cyiza bityo ngo inama aha abikorera bazikurikiza kandi ko bamusezeranya y’uko na bo bazakomeza kumushyigikira muri gahunda zo guteza u Rwanda imbere. 

Yagize ati: “Yarahabaye ku bwacu natwe tuzahaba ku bwe kandi nanavuga y’uko Abanyarwanda ari cyo twifuza. Byari kugorana cyane ndetse cyane iyo afata icyemezo kinyuranye n’icyo yatangaje ejobundi muri Jeune Afrique kuko ntakubeshye, nari kuba uwa mbere ujya kuryama imbere y’iwe tuti tuzava hano ari uko uhinduye icyo cyemezo.

Yaradukundiye ntiyatumye tujya kurara mu mihanda, tumusaba kongera kutuyobora aratwumva kandi na we yabitangaje neza cyane ko Abanyarwanda twamugiriye icyizere, na we ubwe yemeye ko umwaka utaha azaba umukandida”.

Mu mwaka wa 2017 ubwo yarahiriraga kuyobora Igihugu, Perezida Kagame yavuze ko mu byo azashyira imbere ari uguhangira amahirwe urubyiruko afatanyije n’Abanyarwanda muri rusange.

Mu myaka irindwi ishize ibyo kimwe n’ibindi byinshi yemereye Abanyarwanda byagezweho, ndetse byanagaragaye ko amahirwe atayashakiye urubyiruko rw’u Rwanda gusa ahubwo yanabaye Ambasaderi w’urubyiruko rw’Afurika kugira ngo rurusheho kubona amahirwe ku mugabane aho gushyira ubuzima mu kaga rujya kuyashakira ahandi.

KAYITARE JEAN PAUL

  • Imvaho Nshya
  • Ukwakira 4, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE