Perezida Kagame arashaka uruganda rw’inkweto vuba mu Rwanda

  • NTAWITONDA JEAN CLAUDE
  • Gicurasi 1, 2022
  • Hashize imyaka 2
Image

Perezida wa Repubulika y’u Rwanda Paul Kagame, yasabye inzego zishinzwe ishoramari n’iterambere ry’Igihugu kwihutisha umushinga wo gutangiza uruganda rukora inkweto zigezweho mu mpu, anahishura amakuru y’uko abahanga mu gukora inkweto bashima umwihariko w’ubwiza bw’impu ziva ku matungo yo mu Rwanda zikoherezwa hanze.

Umukuru w’Igihugu yabigarutseho ku wa Gatandatu taliki ya 30 Mata 2022, ubwo yagezaga impanuro ku banyamuryango b’Umuryango FPR Inkotanyi babarirwa mu magana bateraniye muri Kigali Arena mu Nteko Nkuru yabaye ku nshuro ya 15.

Yagarutse ku ruganda rw’inkweto ashimangira urugero rwatanzwe n’Umuyobozi Mukuru Wungirije wa FPR-Inkotanyi Bazivamo Christophe, wagaragaje uburyo hari byinshi Abanyarwanda bibuza cyangwa bakabyiyima kandi bishoboka, hari n’intangiriro ikomeye yo ku kubaka ibifatika.

Ati: “Nk’urwo rugero rwonyine yatanze rw’inkweto. Abashinzwe ishoramari mu Gihugu twese, nk’ubu twananijwe n’iki kuba u Rwanda rwakora inkweto? Impu turazifite kuko dufite inka cyangwa n’andi matungo; abantu barabaga inka cyangwa amatungo bashaka inyama, impu bakajugunya izindi bakagurisha kandi hari abantu bakora inkweto. Kera, hashize nk’imyaka 20, nagiye mu bihugu bimwe muri Afurika, baza kumbwira ko basanze mu mpu zikora inkweto nziza, u Rwanda rufite impu za mbere, kandi twari tutaranatunga n’inka nyinshi… Ngira ngo, yavugaga ku Isi rwose sinzi impamvu…”

Perezida Kagame yavuze ko hakwiye gushakwa abashoboye gutunganya impu, n’abashoramari babishoboye bazana uruganda rukora inkweto mu mpu nziza zo mu Rwanda, aho kugira ngo rujye ruhora rwohereza izo mpu hanze kandi zakabaye zubaka ubushobozi bw’Igihugu.

Yakomeje abaza Umuyobozi w’Urwego rw’Igihugu rw’Iterambere (RDB) Clare Akamanzi, icyabuze mu myaka isaga 20 ishize aho u Rwanda rumaze kubona inganda zitunganya ibintu byinshi ariko hakaba hatarimo urutunganya inkweto n’ibindi bikoresho biva mu mpu.

Clare Akamanzi yagize ati: “Nyakubahwa Perezida wa Repubulika turi gukurikirana itunganywa ry’impu kugira ngo dukore uruhu rwujuje ubuziranenge (ruvamo ibikoresho byiza), ariko twarabitangiye ku bufatanye n’Ikigo cy’Igihugu cy’Ubushakashatsi n’Iterambere mu byerekeye Inganda (NIRDA) na Minisiteri y’Ubucuruzi n’Inganda (MINICOM). Hari abantu babitangiye, ni ugushyiramo imbaraga.”

Perezida Kagame ntiyanyuzwe n’icyo gisubizo kitagaragaramo igihe biyemeje ko uwo mushinga waba warangiye n’igihe watangiriye, icyerekezo n’inkunga bakeneye kugira ngo byihute. Yaboneyeho kubaza Minisitiri w’Ubucuruzi n’Inganda Dr. Habyarimana Uwamaliza Beata, igihe bihaye kugira ngo uwo mushinga ube warangiye, agira ati: “[…] Ndashaka igihe bizatwara…”

Minisitiri Dr. Uwamaliza, yagize ati: “Tuzakora ibishoboka byose kugira ngo tubyihutishe…”

Perezida Kagame atabonye igisubizo yashakaga, yahise ahereza Minisitiri w’Intebe Dr. Ngirente Edouard inshingano zo kubikurikirana, kugira ngo harebwe icyakorwa mu maguru mashya, ashimangira ko hazakorwa ibishoboka byose kugira ngo u Rwanda rugire uruganda rutunganya inkweto zigezweho kandi mu gihe cya vuba.  

Igikorwa cyo gukora inkweto zo mu mpu gisaba ibyiciro bitandukanye bisaba kubaka ubushobozi mu byiciro binyuranye. Uruhu ruva ku nka cyangwa irindi tungo ubwarwo rubanza kunyura mu byiciro byihariye kugira ngo rutange uruvamo inkweto, imikandara, ibikapu, amasaha n’ibindi. Abahanga babanza kurutunganya barukuraho ubwoya n’ibindi bice bishobora gutuma rubora, bakarukana (tanning) ndetse no kurunogereza.

Nyuma yo kubona urwo ruhu rutabasha kubora ni bwo hakurikiraho igikorwa cyo gutunganya inkweto n’ibindi bikoresho na byo bikorwa mu byiciro bitandukanye uhereye ku gutegura imisusire y’inkweto, kuyidoda ukageza ku kuyinogereza no kuyiha ibara n’ubwiza butandukanye.  

  • NTAWITONDA JEAN CLAUDE
  • Gicurasi 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE