Perezida Doumbouya yasoje uruzinduko yagiriraga mu Rwanda

  • ZIGAMA THEONESTE
  • Mutarama 27, 2024
  • Hashize amezi 4
Image

Kuri uyu wa Gatandatu tariki ya 27 Mutarama 2024, Perezida Paul Kagame na Madamu Jeannette Kagame basezeye kuri Perezida Lt. Gen. Mamadi Doumbouya wa Guinea Conakry na Madamu we Lauriane Doumbouya bagiriraga uruzinduko mu Rwanda.

Perezida Doumbouya wa Gunea Conakry yasoje uruzindo rw’iminsi itatu yagiriraga mu Rwanda, aho mu ijambo rye yashimiye Perezida Kagame ko yamubere inshuti nziza agahamya ko umubano w’ibihugu byombi azakomeza kuwusigasira.

Yavuze ko by’umwihariko Perezida Kagame yagiriye icyizere Guverinoma ya Guinea ubwo bahuraga bwa mbere mu ruzinduko yagiriye muri icyo gihugu mu mezi icyenda ashize.

Yongeyeho ko muri Mata 2023 yishimiye kwakira Perezida Kagame, agaragaza ko uruzinduko rwe rw’akazi mu Rwanda rushingiye ku bushake bwo guharanira kurushaho gusigasira umubano hagati y’ibihugu byombi no gukomeza umurunga w’ubushuti, ubuvandimwe n’ubutwererane bushingiye ku iterambere ry’Afurika.

Perezida wa Guinea Conakry yagize ati: “Nagira ngo nongere nshimangire ubushake bwo gukorana na mwe nyakubahwa Perezida kubera ko mwatugiriye icyizere, kandi uri umwe mu baperezida ba mbere badusuye mu gihugu cyacu. Mu kutugirira icyizere bivuze ko mwizeye ibyo dukora, mbikuye ku mutima ntekereza ko mutibeshye.”

Yakomeje yizeza ko Guinea izakora ibishoboka byose mu kurushaho kwimakaza ubutwererane busanzwe buzira amakemwa hagati y’ibihugu byombi.

Perezida Kagame yavuze ko yagiranye ibiganiro bitanga umusaruro na Perezida Lt. Gen. Doumbouya, ashimangira ko ibyo u Rwanda na Guinea bishaka kugeraho ari uburumbuke, amahoro n’umutekano ku baturage b’ibihugu byombi.

Yagize ati: “Kugeza ubu umubano wacu mwiza watangiye gutanga umusaruro mu nzego zitandukanye, hari n’amasezerano menshi yamaze gusinywa. Nanone kandi dukomeje kugenzura amahirwe mu ikoranabuhanga, ubucuruzi n’ishoramari. Twishimiye gukorana na Guinea mu kuyisangiza bimwe mu bisubizo twishatsemo no gukomeza guhererekanya ubunararibonye.”

Muri urwo ruzinduko kandi Perezida Doumbouya na Madamu we   basuye Urwibutso rwa Jenoside yakorewe Abatutsi rwa Kigali ku Gisozi yunamira Inzirakarengane ziharuhukiye.

  • ZIGAMA THEONESTE
  • Mutarama 27, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE